Read kinyarwanda 1 KAWRINTHUX 13 Bible Online

1 KAWRINTHUX 13 - kinyarwanda bible

1 KAWRINTHUX 13

¹Viang aux chix sikah ka lox pui khankix mai ka lox kawncau Siyiex khankix kawx, phan ang koe krax moh krax rhawm, aux hoik lih mawh awm lox brax tawng, phan ang mawh nan awm lox luah chiang heue.

²Viang aux koe totaix pa chix krai lox jhai mai tawng ka pa raux pa mox khawmuik mai ka krax tawng khawmuik kawx mai viang aux koe krax yum rhawm ti sang chix gah ka gawng khankix kawx, phan ang koe krax moh krax rhawm, aux mawh pa ang koe bwanson tidtix heue.

³Viang aux gwieh ti tawx kraung aux, ti tawx pui ih kawx mai viang aux tawx tokaux tix, ti sang kieh gleeing ka ngu, phan ang koe krax moh krax rhawm ang koe bwanson ka son aux tidtix heue.

⁴Krax moh krax rhawm kienie, mawh pa chix gun chix yeung tom lang mai chix yuh bwanson. Krax moh krax rhawm ang lai chix ghoing kah, Krax moh krax rhawm ang lai yaw ka tokaux tix mai ang lai ting rhawm,

⁵Ang lai nieb pon yuh pa ang khaw, ang lai sawg bwanson son tokaux tix, ang lai song rhawm rhi, ang lai keud lai sawn grawng pa caox caig,

⁶Ang lai gaux rhawm ka daux krax pa ang rahsee, viang mawh nan chix gaux rhawm ka daux pa mawh pa meh.

⁷Tawb kheem ka kuceu khawmuik, yum rhawm ka ku ceu khawmuik, keud pot jun pot ka kuceu khawmuik mai chix gun yeung ka kuceu khawmuik heue.

⁸Krax moh krax rhawm kienie, ang chix jud jai, viang koe lox jhai khankix kawx, kix tak sang grai grhup heue. Viang koe pa chix ka lox ceu pa tang pa siyox khankix kawx, tak sang jud jai heue. Viang koe krax tawng kawx, tak sang grai grhup heue.

⁹Grawh grawng nawh pa tawng ex ang lai grum naog mai pa krai ex lox jhai ang lai grum naog,

¹⁰Yam hoik hoek ceu pa grum naog, tak sang kieh pa ang grum naog an grai grhup heue.

¹¹Yam mawh aux kawn nyawm, aux sikah awm kawn nyawm, aux keud awm kawn nyawm mai krax keud krax sawn aux awm kawn nyawm heue. Yam in kheu hoik riex ju aux, aux hoik tik ka ceu pa dex mai kawn nyawm heue.

¹²Yam in ex yaox ngie vuvi ka daux siliak khaing, viang mawh nan, yam an tak sang yaox ka pakngai taw pakngai heue. Pa tawng aux yam in ang lai grum naog, viang mawh nan yam an aux tak sang grum tawng, awm pa hoik tawng ka aux heue.

¹³Yam in ca kawn koe, krax yum rhawm, krax keud pot jun pot mai krax moh krax rhawm, in loe ceu mai ka daux ceu in khankix, mawh krax moh krax rhawm pa nie lheu ting heue.