Read kinyarwanda 1 KAWRINTHUX 14 Bible Online

1 KAWRINTHUX 14 - kinyarwanda bible

1 KAWRINTHUX 14

¹Hawt leue ka krax moh krax rhawm, viang mawh nan nied ti simie ka totaix pa dex mai khuan khankix, viang mawh nan pex nie lheu simie ti sang pon pa chix ah lox jhai awx.

²Grawh grawng nawh kaw pa sikah ka lox ceu pa ang pui tawng, ang lai sikah ka kawn pui, viang mawh nan sikah ka Siyiex, mawh kheu ang pui tix kaux kawx chix nghiet kah heue. Nawh ah ceu pa raux pa mox ka daux khuan heue.

³Kaw pa krai lox jhai, sikah ka kawn pui, son sang ting lhaong son sang sidiex gau mai sonsang nyawm rhawm nyawm rhi kah heue.

⁴Kaw pa sikah ka lox pa ang pui tawng, kieh ngie tokaux tix ting lhaong khaing, kaw pa krai lox jhai kieh ceu cao ting lhaong heue.

⁵Aux koe rhawm ti sang kieh pex chix sikah ka lox ceu pa tang siyox khankix, viang mawh nan aux nie lheu koe rhawm ti sang kieh pex chix krai lox jhai heue. Grawh grawng nawh kaw pa chix krai lox jhai nie lheu ting khaing kaw pa chix sikah ka lox ceu pa tang siyox khankix, phan nawh ang plak jhi dee bleeh, son sang ting lhaong ceu cao kah heue.

⁶Puxaik khankix eue, phan aux hoek ka pex mai sikah ka lox ceu pa tang siyox khankix, aux chix koe bwanson son pex yuh ka mawx? Phan aux ang lai sikah ka pex ka krax pa plak jhi pex yaox, phan ang mawh nan ka krax tawng, ka krax pa krai lox jhai, ka krax pa gau heue.

⁷Awm an ceu pa ang koe ju pa chix luah lox, pa mawh pi lawk leh ang ah, phan ang mawh nan ting ang ah, phan lox pa luah kix ang koe dee tang, chix tawng grawng lox pa phlu pi, phan ang mawh nan lox pa tah ting, mawh lox pa yuh ka mawx lie?

⁸Viang mawh teet tawng kawx phan luah lox pa ang sidawng, mawh mawx pa sang khre tokaux tix son naing.

⁹Awm an pex kawx phan pex ang ah lox pa yie ti nghiet kah, chix tawng ka lox pa krai an yuh ka mawx? Grawh grawng nawh pex tak sang sikah ngie ka bhawm heue.

¹⁰Tee koe ceu lox sikah tom nie hun ceu piang ca haktiex in mai ceu mawx ceu an koe dee bleeh nang heue.

¹¹Mawh kheu nan phan aux ang tawng dee bleeh lox an, aux tak mawh pui tang ceu ka kaw pa sikah an mai kaw pa sikah an kawx tak mawh pui tang ceu ka aux heue.

¹²Mawh kheu nan viang pex kawx, viex khawm rhawm tix, ti simie ka totaix pa dex mai khuan khankix, nied ti sawg ti sang nie lheu grum ka daux ceu an khankix, pa sang kieh ceu cao ting lhaong kah heue.

¹³Mawh kheu nan kieh kaw pa sikah ka daux lox ceu pa tang siyox, rawg bwan, sonsang chix krai nawh dee bleeh heue.

¹⁴Grawh grawng nawh phan aux rawg bwan ka daux lox ceu pa tang pa siyox, mawh khuan aux pa rawg bwan, viang mawh nan krax tawng aux ang koe bwanson heue.

¹⁵Tak sang yuh ka mawx? Aux tak sang rawg bwan ka daux khuan mai ka daux khawm krax tawng heue. Aux tak sang ah lox rhax ka daux khuan mai ka daux khawm krax tawng yung heue.

¹⁶Phan ang mawh nan, phan maix nawb bwan ka daux khuan, kaw pa ang chix, chix ah “Amen,” yam yaog yaw maix bwanson, kheu ang nawh tawng ka lox pa ah maix yuh ka mawx?

¹⁷Grawh grawng nawh pa yaog yaw maix bwanson mhawm tete, pui tang kaux ang chix ting lhaong kheu heue.

¹⁸Aux yaog yaw ka bwanson Siyiex, kheu sikah aux ka lox ceu pa tang siyox khankix, nie lheu khaing pex khawmuik heue.

¹⁹Phan mawh daux ceu cao, aux nie lheu koe rhawm ti sang sikah ngie lox phwan gum ka krax tawng aux, sonsang gau ka pui tang kaux khankix khaing pa sikah lox ceu pa tang siyox tix mheen gum heue.

²⁰Puxaik khankix eue, paw kieh mawh kawn nyawm ka daux krax pa tawng pex, ka daux krax pa caox caig kieh pex mawh kawn ngie, ka daux krax pa tawng kieh mawh pa hoik riex ju awx.

²¹Ka daux lai beenli hoik tiiem ti deuh ah nin, “Aux tak sang sikah ka pui ceu in ka dak ceu pa tang pa siyox mai ka siyieb jheeh pui pa tang pa ang meed ang tawng, viang yuh nan kawx kix ang nghiet ka Aux, Simiang ah nan heue.”

²²Mawh kheu nan lox ceu pa sikah pa tang siyox khankix, mawh son sang mawh mhai ka kix pa yum rhawm khankix ang mawh, mawh son kix pa ang yum rhawm heue. Pa ah lox jhai mawh mhai son kix pa yum rhawm khankix mai ang mawh ka son kix pa ang yum rhawm heue.

²³Mawh kheu nan yam krawk khrawm pui ceu cao paox tix khawmuik, phan khawmuik lai sikah ka lox ceu pa tang pa siyox khankix mai phan pui pa ang chix, phan ang mawh nan pa ang yum rhawm hoek ti laig, kix tak sang ah, “Yhot pex heue.” Ang mawh lie?

²⁴Phan khawmuik ah lox jhai mai phan pui tix kaux pa ang yum rhawm, phan ang mawh nan pa ang chix, hoek ti laig, pui ceu cao khawmuik plak jhi phimap nawh mai chawk cheng ti prawng ca ka nawh heue.

²⁵Ceu pa hoik mox ka daux rhawm rhi nawh, plak kieh sidawng Mawh kheu nan nawh tak sang goh gup, ti krub Ka Siyiex ah nin, “Siyiex ot ka sinax pex tete heue.”

²⁶Puxaik khankix eue, tak sang yuh ka mawx? Yam krawk khrawm pex paox tix, kaux pui mawx kaux pui an tang koe, lox rhax yaogyaw, koe lox pa sang gau kah, koe pa sang plak jhi kieh yaox, koe pa sikah ka lox ceu pa tang pa siyox, koe pa teei lih dee bleeh heue.

²⁷Phan pui tix kaux kaux sikah ka lox ceu pa ang pui tawng, kieh sikah, ra kaux mai paw doh kieh lheu khaing loe kaux, kieh sikah tix kaux lai tix kaux mai kieh tix kaux krai dee bleeh heue.

²⁸Phan ang koe cao pa krai dee bleeh, kieh kaw pa sikah yuh nan yawg tix ka daux ceu cao mai kieh nawh sikah ka tokaux tix mai ka Siyiex khaing heue.

²⁹Kieh cao jhai khankix sikah ra kaux, phan ang mawh nan loe kaux mai kieh pui tang kaux khankix keud ti chix gwieh chix prawng ka lox an heue.

³⁰Phan plak jhi kieh yaox tix ceu ceu ka tang kaux yam ngawm nawh, kieh kaw phao ka yawg tix heue.

³¹Grawh grawng nawh, can pex khawmuik pon ti krai lox jhai, tix kaux lai tix kaux, son khawmuik sang pon ti gau kah mai son sang pon pa nyawm rhawm khawmuik heue.

³²Khuan cao jhai khankix, mawh pa cu pa ot greem cao jhai khankix.

³³Grawh grawng nawh, Siyiex ang lai mawh Siyiex pa kieh sung sang, mawh Siyiex pa nhim heue. Awm ka daux ceu cao pui pa singax khankix khawmuik,

³⁴Kieh bun khankix yawg tix ka daux ceu cao khankix awx. Grawh grawng nawh ang kix koe akhwang ti sikah, kieh kix mawh pa ot greem, awm pa khaw mai lox pa krai lai beenli heue.

³⁵Phan kix simie ti gau ka tix ceu ceu, kieh kix chawk ka mex tix, ka nyiex, grawh grawng nawh phan bun sikah ka daux ceu cao mawh pa kaig tua heue.

³⁶Mawh pa yuh ka mawx? Khex kaoh gumlox Siyiex khaing pex lie? Phan ang mawh nan hoik hoek ngie ka pex nong lie?

³⁷Phan pui tix kaux kaux ce tokaux tix mawh cao jhai, phan ang mawh nan pa dex mai khuan, kieh nawh rieb ti teei grawng ceu pa tiiem aux ka pex khankix mawh lox tawm Simiang heue.

³⁸Phan pui tix kaux kaux mawh pa ang tawng, kieh nawh ca kawn mawh pa ang tawng awx.

³⁹Mawh kheu nan, puxaik aux khankix eue, nied ti simie ti chix krai lox jhai, mai paw kiex tieb tie ka pa sikah ka lox ceu pa tang siyox khankix.

⁴⁰Viang mawh nan kieh yuh kuceu khawmuik awm pa khaw mai pa nyawm ti jhak heue.