Read kinyarwanda 1 KAWRINTHUX 15 Bible Online

1 KAWRINTHUX 15 - kinyarwanda bible

1 KAWRINTHUX 15

¹Lheu khaing an, puxaik khankix eue, aux baox kieh pex tawng grawng lox bwan gaux rhawm pa hoik sidiex aux ka pex, pex kawx pa hoik rieb ti teei mai dee ot dee cung pex kah,

²kheu pa mawh dee sang pon hoek pex krax taoh, phan pex giex tom kaux cong ka gumlox pa hoik sidiex aux ka pex mai phan pex ang hoik nieb yum rhawm kah giex going heue.

³Grawh grawng nawh ka sivoe paox tix khawmuik, aux hoik tawx pong ka pex, pa mawh ceu pa hoik pon aux, grawng pa hoik yum Cao Khrit son phimap ex, awm pa khaw mai lox phuk lai sigang khri,

⁴grawng pa hoik sipaung Nawh mai pa hoik kieh Nawh Cao deeh kaoh, khaix daux loe singaix, awm pa khaw mai lox phuk lai sigang khri,

⁵grawng pa hoik lih bleeh Nawh ka Kephax mai khaix an ka kix kao ra kaux.

⁶Khaix an Nawh Cao lih bleeh ka puxaik pa lheu phwan yieh tix dom neh mai kix plak nie kawn deuk kawn koe tom yam in, viang mawh nan tix blah hoik laig it heue.

⁷Khaix an Nawh lih bleeh ka Yakop mai khaix an ka kawncau pa ting khawmuik.

⁸Ghoik khaix khawmuik Nawh Cao lih bleeh khawm ka aux, pa mawh kawn pa keh daux bawg yam pa ang khaw heue.

⁹Grawh grawng nawh aux mawh pa nie iak ka daux kawncau pa ting khankix, pa ang keung ti kok mawh kawncau pa ting, mawh kheu aux hoik tuktiak ka ceu cao Siyiex heue.

¹⁰Mawh kheu bwanson Siyiex aux pon ti mawh, awm pa mawh aux mai bwanson cie Nawh pa hoik tawx ka aux, ang lai kieh mawh pa giex going, viang mawh nan aux hoik nied ti nie lheu blon yuh khaing kix khawmuik, viang mawh nan ang mawh aux pa yuh, mawh bwanson Siyiex pa ot tau mai aux pa yuh heue.

¹¹Mawh kheu nan viang mawh aux ang ah, mawh kix ang ah, ex sidiex nang yuh nin mai pex hoik yum rhawm kah yuh nin heue.

¹²Yam in phan hoik sidiex grawh grawng pa deeh kaoh im Cao Khrit khaing krax yum, ka daux pex tix blah lai ah, “Ang lai koe ceu pa deeh kaoh im khaing krax yum,” yuh ka mawx?

¹³Phan ang lai koe pa dee kaoh im khaing krax yum, pie ka Cao Khrit kawx, ang lai kieh deeh kaoh heue.

¹⁴Phan ang nyang kieh Cao Khrit deeh kaoh, ceu pa sidiex ex mawh pa ang koe bwanson, pa yum rhawm pex kawx ang koe bwanson heue.

¹⁵Lheu khaing mawh nan, ex hoik mawh cao pa kham mhai rug pa ang mawh meh grawng Siyiex, mawh kheu ex hoik kham mhai rug grawng Siyiex, ka grawh grawng Nawh Cao hoik kieh Cao Khrit deeh kaoh, pa mawh Kaw pa ang Nawh Cao deeh kieh kaoh, phan ang lai kieh pa yum deeh kaoh kah tete.

¹⁶Grawh grawng nawh phan ang lai kieh pa yum deeh kaoh kah, pie ka Cao Khrit kawx, ang lai kieh deeh kaoh kah heue.

¹⁷Phan ang nyang kieh Cao Khrit deeh kaoh, krax yum rhawm pex ang koe bwanson tidtix mai pex ca kawn ot ka daux phimap tix heue.

¹⁸Lheu khaing an, kix pa hoik laig it ka daux Cao Khrit khankix kawx, hoik laux leeing heue.

¹⁹Phan ex hoik keud pot jun pot ngie ka daux Cao Khrit khaing ka daux ju in, ex mawh pa khaw tix caux rhawm kah, nie lheu khaing can pui khawmuik heue.

²⁰Yam in, hoik kieh Cao Khrit deeh kaoh im khaing krax yum, pa mawh plix pa liang ti plix khaing daux kix pa hoik laig it heue.

²¹Grawh grawng nawh, mawh kheu krax yum hoik hoek kheu pui tix kaux, viang ceu pa deeh kaoh im khaing krax yum kawx, hoik hoek kheu Pui tix kaux heue.

²²Grawh grawng nawh, awm yum pui khawmuik ka daux Adam, awm an tak sang kieh pui im khawmuik ka daux Cao Khrit heue.

²³Kaux pui mawx kaux pui an, yam caw glhawk nawh, Cao Khrit pa mawh plix liang, khaix an yam hoek Nawh Cao, kix pa mawh cie Cao Khrit tak sang pon ti im heue.

²⁴Khaix an hoek bawg yam sidah, yam tak sang tawx pong Nawh Cao meung an ka Siyiex, pa mawh Keeing Cao, khaix hoik yuh Nawh laux pak lawg ka ceu pa giex kaing khawmuik mai min pakngai mai sibrawm khawmuik heue.

²⁵“Grawh grawng nawh, Nawh tak sang giex kaing tom sidah hoik kieh Nawh pui pa koeng ka Nawh khawmuik, ot greem caong Nawh heue.”

²⁶Ceu pa koeng pa tak sang yuh laux ghoik khaix paox tix mawh krax yum heue.

²⁷“Grawh grawng nawh, Nawh Cao tak sang teei ti deuh can pa koe ku ceu khawmuik ka greem caong Nawh heue.” Yam ah Nawh Cao, “Tak sang teei ti deuh can pa koe ku ceu khawmuik ka greem Nawh,” hoik sidawng grawng ang lai ah ka Kaw pa mawh Cao pa kieh can ku ceu khawmuik ot ka greem Nawh heue.

²⁸Khaix hoik kieh can ku ceu khawmuik ot ka greem Nawh, khaix an tokaux Kawn Cao kawx, tak sang ot ka greem Cao pa hoik kieh can ku ceu Siyiex ku ceu khawmuik, ka daux khawmuik heue.

²⁹Phan ang mawh nan kix pa cubcom tang pui pa hoik yum, tak sang yuh ka mawx? Phan raux ang kieh pui yum deeh kaoh kah tete, kix lai cubcom rawm ka tang kix yuh ka mawx?

³⁰Mawh kheu patix, ex kawx, lai yaox krax lhat krax caox ku nari?

³¹Puxaik khankix eue, aux ca yum ku singaix, kheu pa yaw rangdi ka grawng pex, pa koe aux ka daux Simiang ex Yesux Khrit heue.

³²Phan aux hoik lah paox tix ka totiag hawt been pui ka veng Efesux, koe bwanson son aux yuh ka mawx? Phan pa yum ang lai deeh kaoh, “Kieh ex ih mai nyaux, grawh grawng nawh pasax ex tak yum heue.”

³³Paw kieh pie ka tokaux tix, ceu pa yuh paox pie ka pa caox caig, chix kieh been pa yuh pa mhawm laux heue.

³⁴Siduad ti priex rhawm tix ka pa rahsee mai paw lai kawn baox yuh phimap, grawh grawng nawh pui tix blah ang lai tawng grawng Siyiex. Pa ah aux nan, mawh sonsang kieh pex kaig tua heue.

³⁵Viang mawh nan tix kaux kaux tee sang chawk ah nin, “Tak sang kieh pa yum deeh kaoh yuh ka mawx? yam deeh hoek kix, kix tak sang koe tokaux pa yuh ka mawx?”

³⁶Maix pa mawh pui daox eue, phan simie pa rhuat maix ang laux, nawh ang lai chix im chix kuah.

³⁷Yam rhuat maix simie maix ang lai rhuat tokaux pa tak sang mawh sax, viang mawh nan rhuat ngie simie giex, viang mawh simie nghox ca ang ah, simie tang ceu ang ah,

³⁸Mawh Siyiex heue, pa tawx tokaux ka simie an, awm pa khaw caw rhawm Nawh mai pa tang tawx tokaux ka simie ceu mawx simie ceu an heue.

³⁹Ceu nex khawmuik ang lai mawh ngie nex tix ceu khaing, koe nex pui tix ceu mai nex totiag tix ceu mai nex sim tix ceu mai nex kax tix ceu heue.

⁴⁰Viang tokaux raoma khankix kawx koe nang mai tokaux haktiex khankix kawx koe nang, viang mawh nan min pakngai tokaux raoma mawh tix ceu mai min pakngai tokaux haktiex mawh tang ceu heue.

⁴¹Singaix koe min pakngai tix ceu mai khix koe min pakngai tang ceu mai simuing khankix kawx koe min pakngai tang ceu, ang mawh ngie nan, pie min pakngai simuing mawx simuing an kawx tang siyox kah heue.

⁴²Ceu pa deeh kaoh im khaing krax yum kawx awm an heue. Yam rhuat nawh mawh ka daux pa cux sium, yam deeh kieh nawh kaoh mawh ka daux pa ang chix cux sium heue.

⁴³Yam rhuat nawh mawh ka daux pa ang koe min pakngai, yam deeh kieh nawh kaoh mawh ka daux min pakngai heue. Yam rhuat nawh mawh ka daux pa iak riang, yam deeh kieh nawh kaoh mawh ka daux sibrawm heue.

⁴⁴Yam rhuat nawh mawh tokaux pa dex mai nex nham, yam deeh kieh nawh kaoh mawh tokaux pa dex mai khuan heue. Phan koe tokaux pa dex mai nex nham, viang tokaux pa dex mai khuan kawx koe heue.

⁴⁵Awm hoik tiiem ti deuh ah nin, “ Adam pa mawh pui ka sivoe paox tix, hoik lih mawh ju pa im. ” mai Adam pa mawh khaix, lih mawh khuan pa tawx ju pa im heue.

⁴⁶Ang lai mawh pa dex mai khuan ka sivoe paox tix, mawh pa dex mai nex nham phao ka mai khaix tom mawh pa dex mai khuan heue.

⁴⁷Pui pa koe ka sivoe paox tix an, kheu hoik mawh khaing tiex, tom mawh pa dex mai haktiex heue. Pui ra kaux tix kaux an, hoik mawh khaing raoma heue.

⁴⁸Kix pa dex mai haktiex khankix, awm kaw pa dex mai haktiex an heue. Viang kix pa dex mai raoma kawx, awm Kaw pa dex mai raoma an heue.

⁴⁹Awm hoik koe ex riang grang pa dex mai haktiex, viang riang grang pa dex mai raoma kawx, ex tak sang koe heue.

⁵⁰Puxaik khankix eue, aux ah nin, mawh kheu nex mai nham ang lai pon tix cie sin meung Siyiex, viang pa cux sium kawx, ang lai pon ti cie sin pa ang chix cux sium heue.

⁵¹Jhak heue, aux tak sang krai ka pex, lox pa raux pa mox tix ceu. Ex can pa koe khawmuik tak ang lai laig it, ex khawmuik tak sang tieh loh,

⁵²Ka daux ti vud khaing, ka daux ti khiep ngai khaing, yam phlu teet tawng bawg ghoik khaix heue. Grawh grawng nawh tak sang phlu teet tawng mai tak sang deeh kieh pa yum kaoh, ka pa ang chix cux sium mai ex tak sang tieh sang loh kah heue.

⁵³Grawh grawng nawh ceu pa cux sium in tak sang ceep ka pa ang chix cux sium mai ceu pa chix yum in tak sang ceep ka ceu pa ang chix yum heue.

⁵⁴Viang mawh nan khaix ceu pa chix cux sium in hoik ceep ka ceu pa ang chix cux sium mai ceu pa chix yum in hoik ceep ka ceu pa ang chix yum, yam an tak sang mawh awm lox pa hoik tiiem ti deuh ah nin, “Ceu pa pex hoik bleet ka krax yum uik heue.”

⁵⁵“Pa yum eue, pa pex maix koe dee mawx? Pa yum eue, nyeeig maix koe dee mawx?”

⁵⁶Nyeeig pa yum mawh phimap mai sibrawm mawh lox lai beenli heue.

⁵⁷Yaog yaw bwanson Siyiex, pa hoik tawx ex pex kheu Simiang ex Yesux Khrit heue.

⁵⁸Mawh kheu nan puxaik pa moh aux khankix eue, kaux cong, paw kieh chix gah greed mai nied ti yuh kaing Simiang ku jheung jheung, mawh kheu tawng pex grawng kaing pa yuh pex ka daux Simiang ang lai mawh pa giex going heue.