Read kinyarwanda 1 KAWRINTHUX 16 Bible Online

1 KAWRINTHUX 16 - kinyarwanda bible

1 KAWRINTHUX 16

¹Grawh grawng krax tan son pui pa singax khankix, aux hoik tawx lox ka ceucao Kalatix khankix, pex kawx yuh awm an awx.

²Daux aliah ngaix, ngaix tix, kieh pex kaux mawx kaux an gwieh ti een mai priex ka kraung tix, awm pa pon nawh ti koe, son ang lai koh pa tan yam hoek aux heue.

³Yam hoik hoek aux, pex khaw caw rhawm ka pui mawx ang ah, aux tak sang ploi kix viex lai mai teei ti tawx bwanson pa tan pex ka veng Yerusaliem heue.

⁴Viang mawh nan aux kawx khaw ti hu, kix tak sang hu tau mai aux heue.

⁵Yam hu preeng aux ka meung Makedonix lai mawx ang ah, aux tak sang hoek ka pex, grawh grawng nawh aux tak sang hu preeng ka meung Makedonix heue.

⁶Aux tee ot tau mai pex tix vong, phan ang mawh nan yaox ti ot tom sidah yam kuat yung, son sang pon hu tawx pex aux ka krax dee hu aux dee mawx ang ah heue.

⁷Grawh grawng nawh ang aux simie ti yaox pex yam hu krax yam in, mawh kheu aux keud pot jun pot ti sang yaox ti ot mai pex tix vong, phan Simiang tawx akhwang heue.

⁸Aux tak sang ot ka veng Efesux tom hoek yam pawie Pientekote.

⁹Grawh grawng nawh hoik paoh siviex pa ting, dee sang pon aux ti yuh mai pui pa sang kieh sang raw kawx haoh hun heue.

¹⁰Phan Timose hoek, yuh son sang ot nawh tau mai pex ka daux pa ang koe krax lhat graung awx, grawh grawng nawh, nawh kawx yuh kaing jhaw Simiang, awm yuh aux heue.

¹¹Mawh kheu nan paw kieh pui tix kaux kawx nieb pon yuh ka nawh awx. Pex ploi nawh phlat hoek ka aux nhim mhawm mhawm, kheu aux ca keud pot son sang hoek nawh tau mai puxaik khankix heue.

¹²Phan mawh grawng Apawlux pa mawh puxaik, aux hoik khyox khaw nawh tom nie son sang hoek nawh ka pex tau mai puxaik khankix mai ang nawh doh rhawm hu ceeix kawx yam in, nawh tak sang hoek, phan nawh pon bawg yam ti sang pon hoek sax heue.

¹³Pau ti jhak heue, cung kaux cong ka daux krax yum rhawm, yuh kieh awm simex, kieh ting riang awx.

¹⁴Can pa yuh pex khawmuik kieh yuh ka daux krax moh krax rhawm heue.

¹⁵Puxaik khankix eue, aux khyox khaw ka pex, pex hoik tawng grawng geh nyiex Sathephanax, pa mawh plix pa liang khankix ka daux meung Akhayax mai grawng hoik deuh kix tokaux tix, yuh son pui pa singax khankix,

¹⁶Pex kawx cu nghiet ka kix pa awm khankix mai ka khawm ku kaux pa rom ti yuh kaing mai pa nyhap pa mao kah heue.

¹⁷Aux gaux rhawm kheu hoik hoek Sathephanax mai Fawtunatux mai Akhayakhux, grawh grawng nawh ceu pa deuk pa cud pex, kix hoik baox tiien grum heue.

¹⁸Grawh grawng nawh kix hoik kieh rhawm aux mai khawm rhawm pex nyawm rhawm kah heue. Mawh kheu nan yuh ti tawng mhawm mhawm ka pui pa yuh nan heue.

¹⁹Ceu cao meung Asix khankix nawb ka pex heue. Akulax mai Prisikilax nawb ka pex tom nie ka daux Simiang, tau mai khawm ceu cao pa koe ka daux nyiex kiex heue.

²⁰Puxaik khawmuik nawb ka pex tix kaux lai tix kaux nawb ka paox tix ka pa ngheut pa singax awx.

²¹Aux Pawlux tiiem lai nawb ka pex, ka taix tokaux tix heue.

²²Phan pui tix kaux kaux ang moh ka Simiang, kieh nawh mawh pa jhax lawg kah awx. Simiang ex eue hoek heue.

²³Kieh bwanson Simiang Yesux Khrit ot mai pex liak.

²⁴Kieh krax moh krax rhawm aux ot mai pex khawmuik ka daux Yesux Khrit. Amen.