Read kinyarwanda 1 KAWRINTHUX 5 Bible Online

1 KAWRINTHUX 5 - kinyarwanda bible

1 KAWRINTHUX 5

¹Hoik tah krai lao grawng koe ceu pa phit vao ka daux pex, pa mawh ceu pa lang teung phit vao, pie pa ang koe ka daux pui tang ceu khankix, pa mawh, pui ka daux pex tix kaux, pa nieb teei ka moeng keeing tix heue.

²Jalao pex sang khi rhawm kah mai grheu ti tik kaw pa yuh nan khaing daux pex, pex briex ti ting rhawm kah heue.

³Viang tokaux aux ang ot mai pex kawx, aux hoik ot daux khuan mai aux hoik prawng ca ka kaw pa yuh ceu an, awm hoik ot aux tau mai pex heue.

⁴Yam khrawm pex paox tix ka daux ceu kaux Simiang ex Yesux mai yam ot khuan aux mai pex, tau mai sibrawm Simiang ex Yesux,

⁵tawx pong pui pa yuh nan ka Satan ti kieh yuh nex nham nawh laux, yuh ka mawx sonsang hoek khuan nawh krax taoh ka daux singaix Simiang Yesux heue.

⁶Pa yaw rangdi pex ang lai mhawm. Ang pex tawng grawng susaix ceeix ngie chix laig ti kieh blah ploh khawm pum lie?

⁷Khawt ti tik susaix pa prim singax pak lawg, sonsang mawh pex pum blah pa khraox, awm pa mawh pex blah pa ang sau susaix heue. Grawh grawng nawh, Kawn Yung Pasakha ex, pa mawh Cao Khrit, hoik tan heue.

⁸Mawh kheu nan kieh ex priex ti yuh pawie an, ang mawh ka susaix pa prim mai viang ka susaix ceu pa ang khaw ang jiet mai pa caox caig kawx ang mawh, viang mawh nan mawh ka blah pa ang sau susaix pa singax mai pa mawh meh heue.

⁹Daux lai pa hoik tiiem aux ti tawx ka pex, hoik nhie pex ang yuh paox pie ka pui pa phit vao heue.

¹⁰Pa ah aux nan, ang lai ah ka pui phit vao pa dex mai haktiex, phan ang mawh nan ka pui pa ghoing, ka pui pa tud rhim, ka pui pa krub riang grang khankix, phan raux ah nan, pex tak lai lih hu khaing haktiex heue.

¹¹Viang mawh nan, lai pa hoik tiiem aux ka pex, mawh pa nhie pex ang yuh paox pie ka pui pa hoik kok mawh puxaik, pa mawh pui phit vao, phan ang mawh nan pui pa ghoing, pui pa krub riang grang, pui pa salao, pui pa yoek ka plai, pui pa tud rhim heue. Pui pa yuh nan pie sawm kawx paw sawm tau mai nawh awx.

¹²Grawh grawng nawh, pa prawng ca ka kix pa ot plak praix, chix dex mai aux yuh ka mawx? Pex prawng ca ka kix pa ot plak daux ang mawh lie?

¹³Viang mawh nan ka kix pa ot plak praix khankix, Siyiex prawng ca kah heue. “Grheu ti tik pui pa caox caig an khaing ka daux pex heue.”