Read kinyarwanda 1 KAWRINTHUX 6 Bible Online

1 KAWRINTHUX 6 - kinyarwanda bible

1 KAWRINTHUX 6

¹Phan pex koe lox koe see ka paox tix, pex khex ang ring ti hu prawng ca ka sivoe pui pa ang rahsee, khaing ka sivoe pui pa singax lie?

²Phan ang mawh nan ang pex tawng grawng pui singax khankix tak sang prawng ca ka haktiex lie? Phan pex tak sang prawng ca ka haktiex, ang pex keung ti prawng ca ka ceu pa nie iak khaing paox tix khankix lie?

³Ang pex tawng grawng ex tak sang prawng ca ka kawncau Siyiex khankix lie? Mawh kheu nan tak sang nie lheu yaox ti prawng ca ka ceu pa dex mai ju in miex ding?

⁴Mawh kheu nan phan pex tak sang prawng ca ka ceu pa dex mai ju in khankix, pex lai teei kix pa ang koe bwanson ka daux ceu cao, ti kieh mawh cao prawng ca lie?

⁵Aux ah nin sonsang kieh pex kaig tua kah, khex ang koe pui pa koe pingnya ka daux pex, pa chix ti prawng ca ka sinax puxaik tix khankix lie?

⁶Ang joeng mawh ngie yuh see ka paox puxaik tix pex yuh nang nan ka sivoe pui pa ang yum rhawm khankix heue.

⁷Pa yuh pex see ka paox tix mawh pa som nai son pex. Kheu lai yuh nan, khaing pa kham pex ka ceu pa lud? Khaing pa kham pex ka ceu pa lhen ti teei kraung tix?

⁸Ka piang ang yuh nan, pex yuh pa lud mai lhen ti teei kraung puxaik tix heue.

⁹Phan ang mawh nan ang pex tawng grawng pui pa ang rahsee ang pon ti cie sin pa mawh meung Siyiex lie? Paw kieh pie lhen phit vao, pui pa krub riang grang ang ah, pui pa phit vao mai moeng pui ang ah, pui simex bun ang ah, pui pa deeh phit vao ka paox simex tix ang ah,

¹⁰Pui briex ang ah, pui pa ghoing ang ah, pui pa yoek ka plai ang ah, pui pa salao ang ah, pui pa tud rhim ang ah, tak ang pon ti cie sin pa mawh meung Siyiex heue.

¹¹Glang ka in, viang pex tix blah kawx hoik mawh pui pa awm an, hoik sigrhah ka pex, hoik kieh pex singax, hoik kieh pex rahsee ka daux ceu kaux Simiang Yesux Khrit mai ka daux Khuan Siyiex ex heue.

¹²Aux koe akhuang ti pon yuh kuceu khawmuik, viang mawh nan to mhawm son aux khawmuik ang mawh. Aux koe akhuang ti pon yuh kuceu khawmuik, aux ang doh kieh ot ka greem sibrawm tix ceu kawx heue.

¹³Pa ih mawh son vaig tu mai vaig tu mawh son pa ih, viang mawh nan Siyiex tak sang kieh laux khawm ra ceu heue. Tokaux ang lai mawh son pa phit vao, viang mawh nan mawh son Simiang mai Simiang mawh son tokaux heue.

¹⁴Lheu khaing an Siyiex hoik kieh Simiang deeh kaoh mai ka khawm ex kawx tak sang kieh deeh kaoh kheu sibrawm Nawh heue.

¹⁵Ang pex tawng grawng tokaux pex mawh kraung grang Cao Khrit lie? Phan mawh nan aux tak sang teei kraung grang Cao Khrit mai kieh kix mawh kraung grang bun coh kaux lie? Paw doh kieh mawh nan.

¹⁶Phan ang mawh nan, ang pex tawng grawng kaw pa hu kleuk tix tau mai bun pa coh kaux, hoik mawh tokaux tix mu khaing mai nawh lie? Grawh grawng nawh, Nawh Cao hoik ah nin, “Kiex ra kaux tak mawh nex nham tix mu khaing. ”

¹⁷Kaw pa kleuk tokaux tix tau mai Simiang, mawh khuan tix mu khaing mai Nawh heue.

¹⁸To khaing pa phit vao awx. can pa yuh pui ku ceu mawh pa koe plak praix tokaux, kaw pa phit vao yuh phimap ka tokaux tix tiru heue.

¹⁹Phan ang mawh nan, ang pex tawng grawng mawh tokaux pex nyiex bwan Khuan Singax, pa ot ka daux pex, pa hoik pon pex khaing Siyiex lie? Pex ang lai mawh cie tokaux tix,

²⁰Grawh grawng nawh hoik liag pex ka pa ngawh, mawh kheu nan kieh Siyiex koe min pakngai ka daux tokaux pex awx.