Read kinyarwanda 1 KAWRINTHUX 8 Bible Online

1 KAWRINTHUX 8 - kinyarwanda bible

1 KAWRINTHUX 8

¹Phan mawh grawng ceu pa hoik tan ka riang grang, ex tawng grawng ex khawmuik hoik koe krax tawng heue. Pingnya mawh pa chix kieh ting rhawm, krax moh krax rhawm mawh pa chix kieh ting lhaong haok huan heue.

²Phan pui tix kaux kaux ce ti hoik tawng tix ceu ceu, nawh ang nyang bax tawng awm pa khaw nawh ti tawng,

³Phan pui tix kaux kaux moh ka Siyiex, Nawh Cao tawng ka nawh heue.

⁴Mawh kheu nan grawh grawng ih ceu pa hoik tan ka riang grang, ex tawng grawng riang grang ang mawh tidtix ka daux haktiex in mai grawng ang koe siyiex tang kaux lheu khaing Siyiex tix kaux khaing heue.

⁵Grawh grawng nawh viang koe pa kok mawh siyiex ka daux raoma ang ah, phan ang mawh nan ka piang haktiex ang ah, mawh tete, koe siyiex pa yuh nan tom nie mai simiang pa yuh nan tom nie,

⁶Ka ex koe ngie Siyiex tix kaux khaing, pa mawh Keeing Cao, can pa koe kuceu khawmuik hoik lih mawh ka daux Nawh Cao, ex kawx mawh son Nawh heue. Koe ngie Simiang tix kaux khaing, pa mawh Yesux Khrit, can pa koe ku ceu khawmuik hoik lih mawh kheu Nawh mai ex kawx lih mawh kheu Nawh heue.

⁷Pui khawmuik hoik koe krax tawng yung ka grawng an ang mawh, pui tix blah viang kix hoik tawng grawng riang grang tom yam in kawx, yam ih ceu pa hoik tan ka riang grang, kix kawn keud ce grawng pa dex mai riang grang mai kheu dee chix keud chix tawng kix iak riang, kix seeing brai sipiag heue.

⁸Pa ih tak sang kieh ex koe plakngai ka Siyiex ang mawh. Phan ex ang ih, ex ang lai nie lheu caox, phan ang mawh nan, phan ex ih, ex ang lai nie lheu mhawm heue.

⁹Rien rhawm tix, yuh ka mawx ceu pa koe akhwang pex ti yuh, tak ang lih mawh pa sideeing ka pa iak riang khankix heue.

¹⁰Grawh grawng nawh phan pui yaox maix pa koe krax tawng ngawm neung ti sawm ka daux nyiex vad riang grang, phan nawh iak riang rao, dee chix keud chix tawng nawh, tak sang nie baox kwa ti ih ceu pa tan ka riang grang ang mawh lie?

¹¹Phan mawh nan, kaw pa iak riang, pa mawh puxaik pa hoik yum Cao Khrit son nawh, hoek krax laux leeing kheu krax tawng maix heue.

¹²Kheu phit ka puxaik khankix yuh nan, pex kieh dee chix keud chix tawng kix mat, yam iak riang nawh mai pex phit ka Cao Khrit sipiag heue.

¹³Phan pa ih kieh puxaik aux sideeing kah, aux tak ang ih nex leeing ju, son ang aux sang kieh puxaik tix sideeing kah heue.