Read kinyarwanda 2 KAWRINTHUX 1 Bible Online

2 KAWRINTHUX 1 - kinyarwanda bible

2 KAWRINTHUX 1

¹Pawlux pa mawh kawncau pa ting Yesux Khrit kheu alo Siyiex mai puxaik ex Timose, tawx ka ceucao Siyiex pa koe ka daux veng Kawrinthux mai ka khawm pui pa singax khawmuik pa ot ka daux meung Akhayax kudah kudee heue.

²Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit liak.

³Kieh Siyiex pa mawh Keeing Simiang ex Yesux Khrit, pa mawh Keeing ceu pa caux rhawm mai Siyiex ceu pa nyawm rhawm khawmuik, koe bwanson liak.

⁴Kaw pa kieh ex nyawm rhawm ka daux ceu pa kha rhawm ex khawmuik, yuh ka mawx son sang pon ex ti kieh kix pa koe krax kha rhawm kuceu nyawm rhawm kah, kheu krax nyawm rhawm pa hoik kieh Siyiex ex nyawm rhawm kah heue.

⁵Grawh grawng nawh awm krax kham krax geu Cao Khrit hoik kied nie ka ex, awm an krax nyawm rhawm ex kawx, hoik kied nie kheu Cao Khrit heue.

⁶Phan ex yaox ti kham krax kha rhawm, mawh sonsang nyawm rhawm pex mai krax taoh pex heue. Phan kieh ex nyawm rhawm, mawh sonsang nyawm rhawm pex, pa yuh ka daux krax pa chix gun yeung ti kieh pon kham ceu pa kham geu khankix, awm ex kawx yaox ti kham geu heue.

⁷Krax keud pot jun pot ex ka son pex kaux cong kah, kheu tawng ex grawng awm mawh pex pa rom ti kham krax pa kham pa geu khankix, awm an pex kawx mawh pa rom ti pon krax nyawm rhawm heue.

⁸Grawh grawng nawh, puxaik khankix eue, ang ex rhawm kieh pex mawh pa ang tawng ka grawng, krax pa kha rhawm pa hoik hoek ka piang ex ka daux meung Asix, pa mawh grawng pa raux yeen gut ex tiem, pa nie luan khaing sibrawm pa koe ex ti kham, tom hoik laux rhawm ex, pie grawng pa sang pon klawd ex kah heue.

⁹Tokaux ex hoik koe pa prawng pa ciyang krax yum ka daux tokaux ex tiru, son ang ex sang een rhawm ka tokaux tix, viang mawh nan sonsang een rhawm ka Siyiex pa kieh pa yum deeh kaoh kah,

¹⁰pa hoik taoh ex khaing krax yum pa ting ding dod mai pa tak sang baox deeh taoh ka pa mawh Kaw pa hoik deuh ex krax keud pot jun pot ex kah, grawng kawn ca sang taoh Nawh ka ex.

¹¹Viang pex kawx, mawh pa teem tau, kheu pa rawg pex bwan ka son ex heue. Kheu pui tom nie tak sang yaog yaw bwanson ka son ex, son totaix bwanson pa hoik tawx ka ex, kheu pui pa rawg bwan tom nie heue.

¹²Grawh grawng nawh krax pa yaw rangdi ex mawh in, mawh pa mawh mhai rug pa kham dee chix keud chix tawng ex, grawng pa twah pa klaung ex ka daux haktiex mai pa nie lheu mawh pa twah pa klaung ka pex, mawh pa hoik yuh ka daux pa singax mai ka daux pa viex khawm rhawm tix awm pa khaw mai Siyiex mai grawng ang lai mawh pa yuh ka daux pingnya pa dex mai nex nham, viang mawh nan mawh ka daux bwanson Siyiex heue.

¹³Grawh grawng nawh ang ex lai tiiem tang ceu ka pex, lheu khaing pa hoik phat pex mai khawm pa hoik rieb pex ti teei mai aux koe krax keud pot jun pot grawng pa sang rieb pex ti teei, tom to sidah,

¹⁴Awm pa hoik dha pex ti rieb teei ex ceeix, ti mawh dee sang yaw rangdi pex kah, viang pex kawx awm mawh dee sang yaw rangdi ex, ka daux singaix Simiang ex Yesux heue.

¹⁵Kheu hoik yum rhawm aux yuh nin, aux hoik bak ti sang hoek ka pex ka sivoe, sonsang pon pex bwanson ra bawg tix bawg heue.

¹⁶Aux hoik bak ti sang hu plak pex mai phlat hu ka meung Makedonix mai baox yaog khaing meung Makedonix mai deeh hoek ka pex mai sonsang kieh pex hu tawx aux ka krax hu ka meung Yudax heue.

¹⁷Mawh kheu nan yam keud aux nan, aux hoik koe rhawm pa keud jee keud blaong lie? Phan ang mawh nan ceu pa hoik bak aux ti sang yuh khankix, aux hoik bak ti sang yuh awm pa khaw mai nex nham, kheu hoik koe pa “Mawh heue, mawh heue,” mai pa “ang mawh, ang mawh heue,” mai aux lie?

¹⁸Viang mawh nan awm pa kaux sijax Siyiex, gumlox pa krai ex ka pex ang lai mawh, “Mawh heue,” mai “ang mawh heue.”

¹⁹Grawh grawng nawh, grawng Kawn Siyiex, pa mawh Yesux Khrit pa hoik sidiex ex ka pex, pa mawh aux mai Siluanux mai Timose, ang lai mawh, “Mawh heue,” mai “Ang mawh heue,” viang mawh nan, hoik mawh, “Mawh heue,” ka daux Nawh Cao heue.

²⁰Grawh grawng nawh, can lox mukheu pa tawx Siyiex khawmuik mawh, “Mawh heue,” ka daux Nawh Cao, mawh kheu nan ka daux Nawh Cao mawh khawm, “Amen,” tom sang koe min pakngai Siyiex kheu ex heue.

²¹Kaw pa hoik kieh ex rom tix kaux cong tau mai pex ka daux Cao Khrit mai pa hoik groi rawm bee ka ex, mawh Siyiex,

²²pa hoik tawk cum ka ex mai hoik tawx gawng pa dex mai Khuan Cao ka daux rhawm rhi ex heue.

²³Aux kok Siyiex son sang mawh cao pa kham mhai rug ka ju aux, grawng pa ang aux nyang bax hoek ka veng Kawrinthux, hoik mawh son sang deuh bawg yam ka pex heue.

²⁴Pa ah nan, ang lai mawh kheu ting ex ka piang krax yum rhawm pex, ex mawh ngie pa teem ka krax gaux rhawm pex, grawh grawng nawh pa cung pex tom kaux, hoik mawh kheu krax yum rhawm pex heue.