Read kinyarwanda 2 KAWRINTHUX 10 Bible Online

2 KAWRINTHUX 10 - kinyarwanda bible

2 KAWRINTHUX 10

¹Tokaux aux Pawlux, pa tiem rhawm rhi yam ot mai pex, pa koe rhawm kwa yam tang ot khaing pex, khyox khaw ka pex ka ceu pa awn rhawm mai ceu pa mhawm rhawm mhawm rhi Cao Khrit heue.

²Aux khyox khaw ka pex, son ang aux sang koe rhawm kwa yam hoek aux dee ot pex awm pa hoik deuh aux rhawm tix viex rhawm kwa mai yuh ka kix tix blah, pa een ex mawh pa hu awm pa khaw mai nex nham heue.

³Viang ex mawh ka daux nex nham kawx, ang ex yuh naing awm pa khaw mai nex nham,

⁴Kraung naing pa shiao ex daux naing, ang mawh pa dex mai nex nham, mawh pa ting sibrawm Siyiex sivoe pa chix yieh laux dee kaux cong khankix heue.

⁵Yam yieh ex ka ceu pa lak keud laux mai can ceu pa lhaong ku ceu pa hoik yuh ti tieb tie ka krax pa tawng ka Siyiex mai teei ti viex ka pa keud ku ceu son sang giex gang ka pa cu nghiet ka Cao Khrit heue.

⁶Ex hoik rien rhawm tix, ti sang pawk bix ka can pa ang chix cu chix nghiet khawmuik, yam hoik grum naog ceu pa chix cu nghiet pex heue.

⁷Pex jhak ngie ka grang plak praix khaing lie? Phan pui tix kaux kaux yum rhawm ka tokaux tix grawng mawh nawh cie Cao Khrit, kieh nawh baox deeh loi keud ka tokaux tix, grawh grawng awm mawh nawh cie Cao Khrit, viang ex kawx mawh nang cie Cao Khrit heue.

⁸Viang aux nie lheu yaw ka grawng sibrawm pa hoik tawx Simiang ka ex, sonsang kieh pex ting lhaong mai ang lai mawh sonsang yieh pex laux, aux ang koe dee sang kaig twa heue.

⁹Aux ang rhawm kieh mawh awm grang pa glhat aux ka pex ka lai pa tawx aux khankix heue.

¹⁰Mawh kheu kix tix blah ah nin, “Lai nawh tom mawh pa cien pa koe sibrawm tete, phan tokaux nawh ot, mawh pa iak riang mai lox sikah nawh mawh pa ang tie koe ceu.”

¹¹Kieh pui pa awm an keud sawn grawng lox lai ex mawh pa yuh ka mawx yam tang ot ex, viang yam ot ex kawx pa yuh ex tak sang mawh nang nan heue.

¹²Ex ang koe rhawm kwa ti sawn ti tiag tokaux ex ka kix pa yaw tokaux kix tix blah, viang mawh nan tokaux kix ra lai teei tokaux kix ti tiag ka tokaux tix mai ra lai teei tokaux kix ti tiag ka tokaux tix khankix mawh pa ang koe krax tawng heue.

¹³Ex tak ang nie luan yaw rangdi khaing diag ex, tak sang tiag awm pa khaw mai diag pa hoik gwieh Siyiex ti tawx ka ex, tom glang pa hoek ka pex heue.

¹⁴Ex ang lai chax nie luan sinied tokaux ex, awm ang ex lai hoek glang dee ot pex, grawh grawng nawh tom dee ot pex kawx ex hoik hoek ti sidiex lox bwan gaux rhawm Cao Khrit heue.

¹⁵Ex ang nie luan yaw rangdi khaing diag ex, ka daux kaing pa yuh pui tang kaux khankix, ex koe krax keud pot jun pot grawh grawng yam sang haok huan krax yum rhawm pex sipie sipie, ex tak sang nie ting ka daux pex awm pa khaw mai diag tiag ex, tom sang nie lheu ting vieh,

¹⁶sonsang yaox ti sidiex gau lox bwan gaux rhawm baux haktiex pa luan khaing pex plak tieh mai son ang lai sang yaw rangdi ka daux diag pa tiag pui tang kaux, pa hoik cox hoik khre kah heue.

¹⁷“Kieh kaw pa yaw, yaw rangdi ka daux Simiang heue.”

¹⁸Ang lai mawh kaw pa yaw ka tokaux tix, pa mawh pa rieb ti teei kah, viang mawh nan mawh kaw pa yaw Simiang kah, pa mawh pa rieb ti teei heue.