Read kinyarwanda 2 KAWRINTHUX 11 Bible Online

2 KAWRINTHUX 11 - kinyarwanda bible

2 KAWRINTHUX 11

¹Aux simie ti kieh pex yeung ka aux, ka grawng ceu pa daox pa aw ceeix ceeix, viang mawh nan pex hoik yeung ka aux tete heue.

²Grawh grawng nawh aux viang ka pex, ka krax viang pa dex mai Siyiex, mawh kheu aux hoik teei ti tawx pex ka mex tix kaux khaing, sonsang pon aux ti tawx pex ka Cao Khrit awm pa mawh bunkrih pa singax heue.

³Viang mawh nan aux lhat pa keud pex sang laux hu khaing ceu pa viex khawm rhawm mai pa singax ka plak Cao Khrit, awm siuing hoik lak yuh cuyi ti pie lhen ka Evax heue.

⁴Grawh grawng nawh phan kaw pa hoek ti sidiex, grawng Yesux tang kaux, khaing Yesux pa sidiex ex, phan ang mawh nan phan pex pon Khuan pa tang pa siyox, pa ang pex sax pon, phan ang mawh nan lox bwan gaux rhawm pa tang pa siyox pa ang pex sax rieb ti teei, pa yeung pex ka nawh mhawm heue.

⁵Grawh grawng nawh aux sawn tokaux tix ang lai doh da khaix kawncau pa ting pa blon ting khaing paox tix khankix heue.

⁶Viang aux ang chix sikah ti krai lox kawx, aux ang mawh pa ang koe krax tawng, ka daux krax ku blawng ex hoik kieh grawng ceu in sidawng ka daux ku ceu khawmuik ka pex heue.

⁷Mawh hoik yuh aux phimap, ka pa yuh tokaux tix tiem sonsang yaog pex ting, kheu hoik sidiex aux lox bwan gaux rhawm Siyiex ka pex giex giex mai ang teei ngawh lie?

⁸Aux hoik briex ka ceu cao tang ceu cao khankix, ka pa teei aux mau riang khaing kix, son sang pon aux ti yuh kaing jhaw son pex heue.

⁹Yam ot aux tau mai pex mai koe dee lo dee cud, aux ang mawh beeh glawm ka pui tix kaux kawx, grawh grawng nawh yam hoek puxaik khankix khaing meung Makedonix kix tawx ceu pa lo pa cud aux. ka daux can ku ceu aux hoik priex tokaux tix son ang sang mawh beeh glawm ka pex mai aux tak ca kawn priex tokaux tix yuh nan heue.

¹⁰Awm koe pa mawh meh Cao Khrit ka daux aux, pui tix kaux kawx ang pon kieh aux naox yawg tix ka pa yaw rangdi aux in, grawng baux haktiex meung Akhayax khankix heue.

¹¹Mawh kheu patix? Mawh kheu ang aux moh ka pex lie? Siyiex hoik tawng heue.

¹²Pa hoik yuh aux, aux tak ca kawn yuh nan, son sang pon aux ti tat dud ka jao kix, pa simie ti koe jao pa yuh ka mawx son sang yaox sidawng grawng kix pa yaw rangdi tokaux tix, mawh pa awm ex heue.

¹³Pui pa mawh nan, mawh kawncau pa ting pa ang mawh ang meh, pa mawh pui yuh kaing pie kheem, pa loh tokaux kix mawh awm grang kawncau pa ting Cao Khrit heue.

¹⁴Ang koe dee daox deng kah, grawh grawng nawh pie Satan kawx loh tokaux ti mawh awm grang kawncau Siyiex pa riang heue.

¹⁵Mawh kheu nan ang ot koe dee daox deng kah, phan pui cau pui soi nawh, loh tokaux kix mawh awm grang pui cau pa rahsee. Dee sidah kix tak sang mawh awm pa khaw mai kaing pa yuh kix heue.

¹⁶Aux baox deeh ah tix bawg, paw kieh pui tix kaux kawx ce aux mawh pui daox aw, viang mawh nan phan pex ce aux mawh pui daox pui aw, rieb ti teei aux awm pa mawh aux pui daox aw, son aux kawx sang pon ti yaw tix ceeix ceeix heue.

¹⁷Ceu pa krai aux, aux krai hawt Simiang ang mawh, mawh ka daux ceu pa daox pa aw mai ka daux pa yum rhawm ka grawng pa yaw tix heue.

¹⁸Kheu yaox grawng pui tom nie yaw rangdi ka grawng pa dex mai nex nham, tokaux aux kawx sang yaw rangdi kah heue.

¹⁹Mawh kheu mawh pex pui lhak lhiem, pex tom gaux rhawm ti yeung ka pui daox aw heue.

²⁰Grawh grawng nawh pex chix yeung ka pui, viang nawh kieh pex mawh siliex ang ah, viang nawh ih mai pex ang ah, viang nawh giex gang pex ang ah, viang nawh yaog tokaux ti ting ang ah, viang nawh simang pakngai pex ang ah heue.

²¹Pa krai aux mawh ka daux krax pa map tix, awm pa hoik mawh pa iak riang. Pui tix kaux kaux kwa ka daux ceu pa yuh ka mawx ang ah, aux kawx kwa kah heue.

²²Kix mawh pui Hebrie lie? Aux ka mawh heue. Kix mawh pui Isarelax lie? Aux kawx mawh heue. Kix mawh ru Abraham lie? Aux ka mawh heue.

²³Kix mawh pui cau pui soi Cao Khrit lie? Aux ka nie lheu mawh heue. Aux nie lheu mawh ka daux kaing pa nyhap pa mao khankix mai ka pa nie lheu ot ka daux thawng mai ka pa sivied pa lheu khaing pa chix tiag ti yaox mai ka pa dex yum tom nie bawg heue.

²⁴Ka tawm taix pui Yudax khankix aux hoik pon kham pa sivied ka tixpon taix, yawm tix taix khaing, tom sidah phwan bawg heue.

²⁵Hoik tap toi aux ka khaox loe bawg, hoik dheem aux ka simaox tix bawg, aux hoik yaox ti kham geu pa laux reu loe bawg, aux hoik yaox ti ot ka daux rawm sigrit sigra tix ngaix mai tix sawm,

²⁶Ka daux pa hu krax tom nie bawg, ka daux krax lhat graung ka rawm klawng ting khankix, ka daux krax lhat graung ka pui tud rhim khankix, ka daux krax lhat graung khaing pui ceu aux khankix, ka daux krax lhat graung khaing pui tang ceu khankix, ka daux krax lhat graung ka daux veng, ka daux krax lhat graung ka daux tiagtu, ka daux krax lhat graung ka daux rawm sigrit sigra, ka daux krax lhat graung khaing puxaik pa ang mawh ang meh khankix,

²⁷Ka daux kaing pa nyhap pa mao, ka daux pa krox pa pau law lawx, ka daux pa cai rhawm mai pa sang nyaux nie rawm, ka daux pa twah pa ih law lawx, ka daux pa kuat mai pa ot kakaong heue.

²⁸Lheu khaing ceu pa mawh ka plak praix khankix, kawn koe ceu pa yeen ka piang aux ku singaix, pa mawh krax khi son ceu cao khawmuik heue.

²⁹Mawh kaux pui mawx pa iak riang, pa ang aux rom ti iak riang tau? Mawh kaux pui mawx pa hoik kieh sideeing ka, pa ang aux hax rhawm chu rhawm kheu?

³⁰Phan aux tak lai yaw tix, aux tak sang yaw ka grawh grawng ceu pa iak riang aux khankix heue.

³¹Siyiex pa mawh Keeing Simiang ex Yesux Khrit, pa ting bwanson leeing ju, tawng grawng ang aux pie lhen heue.

³²Ka daux veng Damase simiang giex kaing pa ot greem simiang Aretax, pau ka veng pui Damase an son sang giex sang teei aux,

³³hoik koi ploi aux lih khaing siviex ka daux phliex, ka guh veng mai pon ti luan khaing tawm taix nawh heue.