Read kinyarwanda 2 KAWRINTHUX 12 Bible Online

2 KAWRINTHUX 12 - kinyarwanda bible

2 KAWRINTHUX 12

¹Aux tak lai yaw tix, viang ang lai koe bwanson kawx heue. Aux tak sang baox loi ti krai grawng riang susai mai ceu pa plak jhi yaox khankix, pa hoik plak jhi Simiang kah heue.

²Aux tawng ka pui tix kaux ka daux Cao Khrit, hoik giex ti yaog ka pui an tom hoek ka raoma loe thaix glang ka in kao pon num heue. Hoik mawh ka daux khawm tokaux lie, aux ang tawng, phan ang mawh nan, ang mawh ka daux tokaux lie, aux ang tawng. Siyiex tawng heue.

³Aux tawng ka pui pa yuh nan tix kaux, Hoik mawh ka daux khawm tokaux lie, phan ang mawh nan mawh ka pa tang tiah khaing tokaux lie, aux ang tawng. Siyiex tawng heue.

⁴Grawh grawng pa hoik giex ti yaog nawh haok ka daux meung Paradisux mai pon ti mhong gumlox pa ang chix ah kah, pa ang kawn pui koe akhwang ti baox jiem ti krai heue.

⁵Aux tak yaw rangdi ka grawng pui pa yuh nan, viang mawh nan aux tak ang yaw grawng tokaux tix lheu khaing ceu pa iak riang aux heue.

⁶Grawh grawng nawh phan aux simie ti yaw tix, aux tak ang mawh pa daox pa aw, mawh kheu pa krai aux tak mawh ngie pa mawh pa meh, aux ang yuh, phan ang mawh nan ha pui tix kaux kaux kox een aux mawh pa nie lheu khaing pa yaox nawh aux mawh, phan ang mawh nan khaing pa mhong nawh khaing aux heue.

⁷Kheu jao pa kied lang teung ting ceu pa plak jhi kieh yaox khankix, son ang aux sang chax nie luan yaog tokaux tix ting, hoik tawx kat lawm ka daux nex aux tix mu, pa mawh kawncau Satan, ti sang klah sang tap ka aux, son ang aux sang chax nie luan yaog tokaux tix ting heue.

⁸Kheu ceu an sang lih hu khaing aux, aux hoik khyox khaw ka Simiang loe bawg heue.

⁹Nawh Cao hoik ah nin ka aux, “Bwanson Aux hoik kub ka son maix. Yuh ti kieh sibrawm Aux grum ka daux ceu pa iak riang heue.” Mawh kheu nan aux gaux rhawm tix nie lheu yaw rangdi ka daux ceu pa iak riang aux khankix, son sibrawm Cao Khrit sang tawb veei ka piang aux heue.

¹⁰Mawh kheu in aux tom gaux rhawm ka daux ceu pa iak riang aux khankix mai ka daux pa yuh pa ang cee ang cak kah mai ka daux pa lo pa hot mai ka daux pa tuktiak kah mai ka daux pa tug kha, ka son Cao Khrit, grawh grawng nawh yam iak riang aux, yam an aux tom koe riang rao heue.

¹¹Aux hoik lih mawh pui daox pui aw, pex hoik khin aux mawh nan, grawh grawng nawh pex khaw ti hoik yaw aux kah, mawh kheu viang aux ang koe bwanson tidtix kawx, aux ang doh da khaix ka daux tix ceu kawx ka kawncau pa ting pa blon ting khaing paox tix khankix heue.

¹²Hoik viex rhawm gun yeung khawmuik ti jhi mhai rug grawng mawh kawncau pa ting pa mawh pa meh, ka sinax pex, ka mhai mai ka ceu pa daox am mai ka kaing sibrawm khankix heue.

¹³Grawh grawng nawh hoik koe ceu pa yuh ka mawx, pa hoik yuh ti kieh pex cud ti ang krup ka ceu cao pa kawn deuk khankix, phan mawh pa lheu khaing pa ang tokaux aux mawh beeh glawm ka pex? Pluat ploi ceu pa lud aux ka in liak.

¹⁴Jhak heue, in mawh loe bawg tix bawg pa hoik khre hoik rien aux ti sang hoek ka pex heue. Aux tak ang lai mawh beeh glawm ka pex, mawh kheu ang aux sawg kraung cie pex, sawg ka pex khaing, grawh grawng nawh kawn praix khankix ang lai khaw ti mawh cao khrawm cao deuh sinngao son miex keeing tix, mawh miex keeing pa khaw ti khrawm deuh son kawn praix tix heue.

¹⁵Phan mawh aux, aux tak sang gaux rhawm ti cai kah mai ti kieh khawm tokaux ti uik, ka son ju pex heue. Phan aux nie lheu ting moh ka pex, pa moh ka aux tak sang iak hu kheu lie?

¹⁶Tokaux aux ang lai mawh beeh glawm ka pex, viang mawh nan kheu mawh aux pui lhak lhiem aux hoik pon taong pex ka ceu pa nieb pie lhen heue.

¹⁷Khex hoik nieb yuh aux cuyi ti ih kaing pex, ka kix pa hoik ploi aux ka pex tix kaux kaux lie?

¹⁸Aux hoik khyox khaw ka Titux mai hoik ploi puxaik an hu tau mai nawh heue. Khex hoik nieb yuh Titux cuyi ti ih kaing pex lie? Ex hoik hu ka daux Khuan tix mu khaing ang mawh lie? Ex hoik hu ka daux rhoi khaix caong pa awm paox tix ang mawh lie?

¹⁹Pex lai ce jih jang glang gleeing ex hoik sawg ti tieb tie phimap tix ka pex nieh. Ex krai ka daux Cao Khrit ka plak sivoe Siyiex heue. Pui pa moh aux khankix eue, can ku ceu khawmuik mawh son sang kieh pex ting lhaong ka heue.

²⁰Grawh grawng nawh, aux lhat yam hoek aux ka pex, ha aux kox yaox kheu tix ceu ceu tak sang yaox pex mawh, awm pa ang aux simie pex ti mawh mai viang pex kawx tak yaox tokaux aux mawh, awm pa ang pex simie ti yaox aux mawh. Phan ang mawh nan ha kheu tix ceu ceu kox tak yaox pa koe krax simah, krax boh rhawm rhi, krax song rhawm songrhi, krax pa tang siyox, krax pa nieb yuh plakngai pui laux, krax pa ah lox suk siep, krax ca nyhau ting rhawm mai krax lawh maw cuci heue.

²¹Phan ang mawh nan ha yam baox deeh hoek aux ka pex kox, Siyiex aux tak kieh aux tiem rhawm ka sivoe pex mai aux tak khi rhawm son kix pa haoh pa hun, pa hoik lud glang ka sivoe in mai ang doh keud ka pa ang singax mai ceu pa phit vao mai ceu pa hawt alo nex nham, pa hoik yuh kix heue.