Read kinyarwanda 2 KAWRINTHUX 13 Bible Online

2 KAWRINTHUX 13 - kinyarwanda bible

2 KAWRINTHUX 13

¹In mawh pa hoek aux ka pex loe bawg tix bawg heue. “Tak sang kieh lox ku gum kaux cong ka jheeh cao pa kham mhai rug ra loe kaux heue.”

²Aux hoik grux krai mai aux baox grux krai, awm yam ot aux mai pex ra bawg tix bawg, yam in viang aux tang ot kawx, aux ah ka kix pa hoik lud glang ka sivoe in mai ka khawm pa deuk khankix khawmuik, phan aux baox deeh hoek, aux tak ang yam kix heue.

³Kheu sawg pex mhai rug grawng pa sikah Cao Khrit ka daux aux, Kaw pa ang iak riang ka plak pex, viang mawh nan pa ting sibrawm ka daux pex,

⁴grawh grawng nawh viang hoik teei Nawh Cao yum ka piang khaox lhak kheu pa iak riang kawx, Nawh im ju kheu sibrawm Siyiex heue. Grawh grawng nawh, viang iak riang ex ka daux Nawh Cao kawx, ex tak sang im tau mai Nawh kheu sibrawm Siyiex ka plak pex heue.

⁵Chawk ka tokaux pex grawng kaux cong pex ka daux krax yum rhawm lie? Ang kaux lie? Cheu ti yaox ka tokaux pex heue. Phan ang mawh nan ang pex tawng grawng tokaux pex, grawh grawng pa ot Cao Khrit ka daux pex, phan pex ang lai mawh pa ang pon ti kham ceu pa cheu ti yaox an lie?

⁶Aux koe krax keud pot jun pot son sang kieh pex tawng grawng pa ang ex mawh pa ang pon kham ka ceu pa cheu ti yaox an heue.

⁷Ex rawg bwan ka Siyiex yuh ka mawx son ang pex sang yuh ceu pa caox caig tix ceu kawx, ang lai mawh son sang sidawng grawng pa pon ex ti kham ceu pa cheu tix yaox an, mawh son sang yuh pex ceu pa khaw pa mhawm, viang mawh ex awm pa ang pon ti kham ceu pa cheu ti yaox an kawx heue.

⁸Grawh grawng nawh ex ang koe sibrawm ti cha ti yuh ka ceu pa mawh pa meh, ex pon ti yuh plak pa mawh meh khaing heue.

⁹Grawh grawng nawh ex gaux rhawm yam iak riang iak rao ex mai ting riang pex mai sonsang grum mhawm pex kawx, ex rawg bwan heue.

¹⁰Mawh kheu jao in aux tom tiiem lai grawng ceu in khankix, yam tang ot aux khaing pex, yam ot aux mai pex aux tak ang yaox ti yuh pa lang teung ka pex, awm pa khaw mai sibrawm pa hoik tawx Simiang ka aux, son sang yuh sang sum ting mai ang mawh sonsang yieh laux heue.

¹¹Puxaik khankix eue, in mawh lox pa ghoik pa sidah, gaux rhawm heue, kieh grum mhawm heue, kieh nyawm rhawm heue, kieh mawh rhawm tix mu khaing heue, ot ka daux pa nhim mai Siyiex krax pa moh rhawm mai krax pa nhim tak sang ot tau mai pex heue.

¹²Nawb ka paox tix, tix kaux lai tix kaux, ka pa ngheut pa singax heue.

¹³Pui pa singax singeh khawmuik nawb ka pex heue.

¹⁴Kieh bwanson Simiang ex Yesux Khrit mai krax moh krax rhawm Siyiex mai pa yuh paox pie Khuan singax singeh ot tau mai pex khawmuik liak.