Read kinyarwanda 2 KAWRINTHUX 2 Bible Online

2 KAWRINTHUX 2 - kinyarwanda bible

2 KAWRINTHUX 2

¹Aux hoik yiag yuh nin ka son tokaux tix, son ang aux lai baox deeh yaox ti hoek ka pex ka daux krax khi glawh heue.

²Grawh grawng nawh phan aux kieh pex khi rhawm kah, lheu khaing kaw pa hoik kieh aux nawh khi kah, mawh kaw pa yuh ka mawx pa sang kieh aux gaux rhawm kah lie?

³Kheu koe krax yum rhawm aux grawng krax gaux rhawm aux, hoik mawh nang krax gaux rhawm pex khawmuik, aux tom hoik tiiem lai ceu in, phan ang mawh nan yam hoek aux ka pex, ha kix pa khaw ti kieh aux gaux rhawm kox kieh aux khi rhawm kah heue.

⁴Grawh grawng nawh pa tiiem aux lai ka pex, hoik mawh ka daux pa kied kha rhawm mai ka daux pa tug rhawm rhi mai ka khawm pa roik rawm ngai tix, ang lai mawh sonsang kieh pex khi rhawm kah, hoik tiiem sonsang tawng pex ka krax moh, pa kied lang teung moh aux ka pex heue.

⁵Phan pui tix kaux kaux hoik kieh koe krax khi rhawm, nawh hoik kieh aux khi rhawm kah ang mawh, kieh pex kub khi rhawm ka khawmuik heue.

⁶Pa hoik ciyang pui tom nie ka kaw pa yuh nan hoik kub heue.

⁷Mawh kheu nan pex nie lheu khaw ti pluat ploi phimap nawh mai kieh nawh nyawm rhawm kah, phan ang mawh nan ha ceu pa cha nie khi rhawm nawh kox bleet ka pui pa yuh nan heue.

⁸Mawh kheu nan aux tom khyox khaw ka pex, son sang baox deeh moh pex ka nawh heue.

⁹Grawh grawng nawh aux hoik tiiem lai son sang sidah mawh nin, yuh ka mawx sonsang pon aux ti tawng grawng pa cheu ti yaox ka pex, grawng krax cu nghiet pex ka kuceu khawmuik koe nieh, ang koe nieh.

¹⁰Pex pluat ploi phimap tix ceu ceu ka pui mawx ang ah aux kawx pluat ploi kah heue. Grawh grawng nawh pie aux, pa hoik pluat ploi aux, phan aux hoik pluat ploi tix ceu ceu, hoik mawh son pex ka plak sivoe Cao Khrit.

¹¹Kheu son ang Satan sang pon ti pex ex sipie, grawh grawng nawh ex ang mawh pa ang tawng ka jhawm ceu pa yuh nawh heue.

¹²Yam hoek aux ka veng Troax ka son lox bwan gaux rhawm Cao Khrit mai yam hoik paoh siviex ka aux ka daux Simiang,

¹³Aux ang koe krax nyawm rhawm ceeix kawx, kheu ang aux yaox pux aux Titux, aux tom ah lox gwieh ka kix mai hu ka daux meung Makedonix heue.

¹⁴Yaog yaw ka bwanson Siyiex, pa thong ex ka daux pa pex, ka daux Cao Khrit ku jheung jheung mai kieh sidawng grawng mawh ex ceu pa sioe baux krax tawng ka Nawh Cao kudah kudee heue.

¹⁵Ex mawh ceu pa sioe baux cie Cao Khrit ka Siyiex, ka daux kix pa hoek krax taoh mai ka daux kix pa hoek krax laux leeing heue.

¹⁶Ka kix pa hoek krax laux leeing mawh ceu pa sioe baux krax yum tom hoek krax yum heue. Ka kix pa hoek krax taoh mawh ceu pa sioe baux, krax im ju tom hoek krax im ju heue. Mawh mawx pa dak pon yuh ceu in khankix?

¹⁷Ex ang lai awm ka pui tom nie, pa nieb lak baox, lak teei lih khaing gumlox Siyiex, ex viex khawm rhawm tix sidiex ka daux Cao Khrit, awm pa khaw mai Siyiex, ka plak sivoe Siyiex heue.