Read kinyarwanda 2 KAWRINTHUX 3 Bible Online

2 KAWRINTHUX 3 - kinyarwanda bible

2 KAWRINTHUX 3

¹Ex baox deeh jah ti yaw ka tokaux tix lie? Phan ang mawh nan ex lo lai pa yaw pui ka ex, ti tawx ka pex, phan ang mawh nan khaing pex lie?

²Pex mawh lai ex, pa hoik tiiem ka daux rhawm rhi ex, pa tawng mai pa phat pui khawmuik kah heue.

³Tokaux pex sidawng mawh lai Cao Khrit pa hoik yuh ex, ang lai mawh pa hoik tiiem ka rawm nam meug, viang mawh nan mawh pa hoik tiiem ka Khuan Siyiex pa im ju heue. Ang lai mawh pa hoik tiiem ka khlawp simaox khankix, viang mawh nan mawh pa hoik tiiem ka daux khlawp rhawm rhi nex heue.

⁴Ex koe krax yum rhawm yuh nin, kheu Cao Khrit ka plak Siyiex heue.

⁵Ang lai mawh kheu kub sibrawm ex ti pon yuh ka tokaux tix, ti sang keud tix ceu ceu mawh pa mawh khaing tokaux tix, viang mawh nan pa to pon ex ti yuh mawh khaing Siyiex.

⁶Kaw pa hoik kieh ex kub sibrawm ti pon yuh pui cau pui soi ka sijax mukheu pa khraox heue. Ang lai mawh ka pa dex mai lox ngai lai beenli, viang mawh nan mawh pa dex mai Khuan, grawh grawng nawh, lox ngai lai beenli mawh pa chix teei yum, Khuan mawh pa chix tawx pa im heue.

⁷Phan lox been krax yum pa hoik tiiem hoik saik ka simaox, hoik hoek tau mai min pakngai, tom ang pui Isarelax pon jawg ti jhak ka pakngai Mose, kheu min pakngai pa jhan khaing pakngai nawh, pa mawh min pakngai pa chix grai grhup.

⁸Lox been pa dex mai Khuan, tak ang nie lheu tawx tau mai min pakngai yuh ka mawx?

⁹Grawh grawng nawh phan lox been pa dex mai pa prawng pa ciyang phimap hoik koe min pakngai, lox been pa dex mai pa rahsee tak sang kied nie lheu koe min pakngai heue.

¹⁰Pa hoik kieh koe min pakngai phao ka, hoik kieh ti ang koe min pakngai, kheu min pakngai pa nie lheu ting an heue.

¹¹Grawh grawng nawh phan ceu pa chix grai grup an, hoik hoek tau mai min plakngai, ceu pa kawn ca koe an mawh pa nie lheu koe min pakngai heue.

¹²Mawh kheu nan, kheu koe ex krax keud pot jun pot yuh nan, ex tom shiao lox pa sidawng,

¹³ang awm Mose pa hoik tawb pakngai tix ka man tawb, son ang kawn praix Isarelax khankix sang pon jawg ti jhak ka dee sidah dee ghoik ceu pa grai grhup hu,

¹⁴viang mawh nan rhawm kix hoik kiien, grawh grawng nawh sidah tom hoek singaix yam in yam phat ka lox sijax mukheu pa prim, man tawb an kawn ca koe, mawh kheu ang nyang plak jhi kix yaox, grawng pa sang teei ti tik man tawb an mawh ka daux Cao Khrit heue.

¹⁵Tom hoek singaix yam in kawx, yam phat lai Mose lai mawx ang ah, man tawb hoik tawb ka rhawm rhi kix heue.

¹⁶Yam deeh veeh pui tix ka plak Simiang lai mawx ang ah, teei ti tik man tawb an khaing heue.

¹⁷Simiang kienie, mawh Khuan heue. Dee ot Khuan Simiang koe ceu pa ploi luan heue.

¹⁸Can ex khawmuik pa hoik bhang tix ang tawb pakngai, mawh pa deeh jhan gaih min pakngai Simiang awm siliak mai ca tieh loh ex ti awm riang grang Nawh Cao, khaing min pakngai ka min plakngai, awm pa kaoh khaing Simiang, pa mawh Khuan heue.