Read kinyarwanda 2 KAWRINTHUX 4 Bible Online

2 KAWRINTHUX 4 - kinyarwanda bible

2 KAWRINTHUX 4

¹Mawh kheu nan, kheu koe ex kaing cau kaing soi in, awm pa hoik pon ex krax caux rhawm, ex ang lai khrup rhawm kah heue.

²Ex hoik tik ka ceu pa kaig pa tua pa mox khankix mai ang hu ka daux ceu pa lak keud ti yuh cuyi, viang ka gumlox bwan Siyiex kawx ang nieb muan ti pie lhen kah, viang mawh nan kheu plak jhi pa mawh meh sidawng, ex yuh ti kieh tokaux ex caw rhawm ka dee chix keud chix tawng pui ku kaux ka plak sivoe Siyiex heue.

³Phan hoik tawb ka lox bwan gaux rhawm ex ka man tawb, hoik tawb ka daux kix pa hoek krax laux leeing khankix heue.

⁴Ka daux kix pa ang yum rhawm khankix siyiex haktiex in hoik kieh rhawm dee chix tawng kix dug kah, son ang pa riang lox bwan gaux rhawm min pakngai Cao Khrit, pa mawh riang grang Siyiex, sang jhan ka piang kix heue.

⁵Grawh grawng nawh pa sidiex ex ang lai mawh grawng tokaux tix, mawh grawng mawh Yesux Khrit Simiang mai grawng mawh ex siliex pex, ka son Yesux heue.

⁶Grawh grawng nawh Siyiex pa hoik ah, “Kieh pa riang lih jhan khaing daux pa faik,” hoik jhan riang ka daux rhawm rhi ex, son sang tawx pa riang krax tawng ka min plakngai Siyiex, ka daux pakngai Yesux Khrit heue.

⁷Ex koe sinngao in ka daux aw tiex, son siawp sibrawm pa kied ting sigrien sigre an, tak sang mawh cie Siyiex mai ang mawh pa kaoh khaing tokaux ex heue.

⁸Viang hoik yeen ka ex ku plak kawx, ang ot hoek krax kha rhawm. Viang keud ang doh kawx, ang ot hoek krax laux rhawm lauxrhi.

⁹Viang tuktiak kawx, ang lai tik lai grham. Viang lah bang lia kawx, ang lai hoek krax laux leeing heue.

¹⁰Ex ca dai ti viex ka ceu pa teei Yesux yum ka daux tokaux tix jheung jheung, son sang sidawng khawm ceu pa im Yesux ka daux tokaux ex heue.

¹¹Grawh grawng nawh hoik tawx pong ex pa im khankix ka krax yum ku jheung jheung son Yesux, son sang sidawng khawm ceu pa im Yesux ka daux nex pa chix yum ex heue.

¹²Mawh kheu nan krax yum ca yuh kaing ka daux ex, viang mawh nan yuh pa im ju ka daux pex heue.

¹³Kheu koe rhawm pa yum rhawm awm pa khaw mai pa hoik tiiem ti deuh ah nin, “Mawh kheu yum rhawm aux, aux tom hoik krai heue,” mawh kheu ex kawx yum rhawm, ex tom krai heue.

¹⁴Mawh kheu hoik tawng grawng Kaw pa hoik kieh Simiang Yesux deeh kaoh, tak sang kieh khawm ex deeh kaoh tau mai Yesux, tak sang teei ti tawx ex tau mai pex heue.

¹⁵Grawh grawng nawh ku ceu khawmuik hoik mawh son pex, son sang nie haoh nie teen bwanson, mawh kheu pui nie lheu yaogyaw bwanson, tom nie lheu kieh min pakngai Siyiex koe kah heue.

¹⁶Mawh kheu nan ex tom ang lai khrup rhawm kah, Viang pui plak praix cie ex ca rau ti laux hu kawx, pui plak daux cie ex baox cox ti khraox tix ngaix hoik tix ngaix heue.

¹⁷Grawh grawng nawh krax kha rhawm pa chaong cie ex, pa mawh ti vud ti cu khaing, yuh son sang kieh ex nie lheu ting koe sinyek sinyek ka min pakngai pa cien leeing ju heue.

¹⁸Ang ex jhak ka ceu pa chix yaox tix khankix, jhak ka ceu pa ang tix chix yaox khankix, grawh grawng nawh ceu pa chix yaox khankix mawh pa chix laux leeing, ceu pa ang chix yaox khankix mawh pa kaux pa koe leeing ju heue.