Read kinyarwanda 2 KAWRINTHUX 5 Bible Online

2 KAWRINTHUX 5 - kinyarwanda bible

2 KAWRINTHUX 5

¹Grawh grawng nawh ex hoik tawng phan yieh laux ka nyiex gox ex pa mawh nyiex pa dex mai haktiex, ex koe nyiex pa yuh Siyiex, pa mawh nyiex pa ang yuh ka taix, pa kaux pa koe leeing ju ka daux meung raoma heue.

²Yam kawn ot ka daux nyiex gox in, ex ngia mai simie ti ceep ka dee sang ot cie ex ka meung raoma.

³Phan yaox ti ceep kraung yuh nan, tak ang yaox ex mawh pa kakaong heue.

⁴Grawh grawng nawh kheu klawm ex kraung cien, ex pa kawn ot ka daux nyiex gox in ngia tete heue, ang lai mawh kheu simie ex ti peeik kraung ceep tokaux tix, mawh kheu simie ex ti baox kieh ceep kraung kah, son sang bleet ceu pa im ka ceu pa chix yum uik heue.

⁵Kaw pa hoik yuh hoik cox ex ka son ceu in mawh Siyiex, pa hoik tawx gawng pa dex mai Khuan Cao ka ex heue.

⁶Ex tawng grawng yam kawn ot ka daux tokaux tix, ex tang ot khaing Simiang, mawh kheu nan ex tom koe rhawm kwa ku jheung jheung heue.

⁷Grawh grawng nawh ex hu kheu krax yum rhawm mai ang mawh kheu pa chix yaox heue.

⁸Mawh kheu nie lheu koe rhawm ex ti sang tang ot khaing tokaux tix mai ti sang ot tau mai Simiang, aux tom ah, “Ex koe rhawm kwa heue.”

⁹Mawh kheu nan ex tom hoik een rhawm tix, ti sang yuh ceu pa khaw caw rhawm Nawh Cao, viang ex yaox ti ot ang ah, tang ot ang ah heue.

¹⁰Grawh grawng nawh tak sang kieh ex khawmuik sidawng ka sivoe dee ngawm ti prawng ca cie Cao Khrit, son sang pon kaux pui mawx pui an, ka ceu pa hoik yuh tix ka daux tokaux, awm pa khaw mai pa hoik yuh nawh, pa mhawm ang ah, pa caox ang ah heue.

¹¹Mawh kheu tawng ex ka krax lhat graung pa dex mai Simiang, ex tom jeeh nyaw ka kawn pui khankix mai hoik sidawng ex ka Siyiex heue. Aux keud pot jun pot son sang sidawng ex kah, khawm ka daux dee chix keud chix tawng pex heue.

¹²Ex baox deeh yaw tokaux tix ka pex ang mawh, viang mawh nan ex tawx jao dee sang pon pex ti yaw rangdi ka ex, sonsang koe ceu pa pawk pex ka kix pa yaw rangdi ngie ka ceu pa chix yaox mai ang yaw riang di ka pa koe ka daux rhawm heue.

¹³Grawh grawng nawh, phan ex mawh pui yhot kawx, hoik mawh ka son Siyiex, phan ex mawh pui pa ang yhot kawx, hoik mawh ka son pex heue.

¹⁴Grawh grawng nawh krax moh Cao Khrit pex ka ex, mawh kheu hoik deuh rhawm ex grawng phan tix Kaux hoik yum ka son pui khawmuik, pui khawmuik kawx hoik yum kheu an,

¹⁵Nawh Cao hoik yum son khawmuik, kix pa im tak ang lai baox im ka tokaux tix tiru, son sang im ka Nawh Cao pa hoik yum son kix mai pa hoik deeh kaoh im heue.

¹⁶Jah tom yam in, ex ang lai tawng ka pui tix kaux kawx hawt nex nham, viang ex hoik tawng ka Cao Khrit hawt nex nham kawx, yam in ex ang lai baox tawng ka Nawh Cao yuh nan heue.

¹⁷Phan pui tix kaux kaux ot ka daux Cao Khrit, nawh mawh ceu pa khraox heue. Ceu pa prim khankix hoik grai hoik grup hu mai jhak heue, ceu an kix hoik lih mawh pa khraox heue.

¹⁸Ku ceu khawmuik hoik mawh kheu Siyiex, Kaw pa hoik kieh ex deeh khaw caw paox tix ka tokaux Nawh, kheu Cao Khrit mai hoik tawx ex kaing pa sidiex grawng ceu pa deeh khaw caw paox tix an ka ex heue.

¹⁹Pa mawh grawng pa hoik ot Siyiex ka daux Cao Khrit, ti kieh pui haktiex deeh khaw caw paox tix ka tokaux Nawh Cao mai pa ang Nawh sawn ti deuh phimap kix ka kix mai grawng pa hoik tawx hoik pong gumlox bwan grawng deeh khaw caw paox tix an ka ex heue.

²⁰Mawh kheu nan ex tom mawh pui pa yuh tang, ka son Cao Khrit heue. Mawh awm hoik teei Siyiex ti kieh ex jeeh nyaw ka pex heue. Ex khyox khaw ka pex tang Cao Khrit, son sang kieh pex deeh khaw caw paox tix ka Siyiex heue.

²¹Siyiex hoik kieh Kaw pa ang tawng phimap, mawh phimap ka son ex, son sang lih mawh ex pa rahsee Siyiex ka daux Nawh heue.