Read kinyarwanda 2 KAWRINTHUX 8 Bible Online

2 KAWRINTHUX 8 - kinyarwanda bible

2 KAWRINTHUX 8

¹Lheu khaing an, puxaik khankix eue, ex kieh pex tawng grawng bwanson Siyiex pa hoik tawx ka daux ceu cao meung Makedonix khankix.

²Viang cheu ti yaox kix ka krax tug krax kha tom nie, kix kied ting gaux rhawm mai ceu pa kied hot sibhawm kix, nie lheu kieh ceu pa sibieh kix mi koe heue.

³Aux kham mhai rug grawng ang joeng mawh awm pa chix kix, pie pa lheu khaing pa chix kix kawx, kix lak tawx heue.

⁴Kix teei lox jeeh nyaw tom nie mai khyox khaw ka ex son sang kieh kix rom ti yuh paox teem ka bwanson in mai kaing pa teem ka pui pa singax khankix heue.

⁵Pa yuh nan, ang lai mawh awm pa keud pot jun pot ex, kix teei ti tawx tokaux tix ka Simiang mai ka ex phao ka, awm pa khaw mai alo Siyiex heue.

⁶Ex tom khyox khaw ka Titux, yuh ka mawx son sang yuh nawh kaing bwanson in ka daux pex tom hoik sidah, mawh kheu hoik jah nawh ti yuh phao ka heue.

⁷Awm pa pre pex ka ku ceu, ka daux krax yum rhawm mai ka daux pa sikah mai ka daux krax tawng mai ka daux pa chix viex rhawm tix yuh khawmuik mai ka daux krax moh pex ka ex, viang ka daux khawm bwanson in kawx yuh tix kieh pre kah awx.

⁸Pa ah aux nin ang mawh lox tawm pa nhie pex yuh, aux teei grawng pa viex pui tang kaux khawm rhawm tix yuh mai cheu ti yaox grawng krax moh krax rhawm pex mawh pa mawh meh nieh, ang mawh nieh.

⁹Grawh grawng nawh pex tawng grawng bwanson Simiang ex Yesux Khrit, grawng hoik mawh Nawh pa mi pa koe kawx, Nawh Cao hoik lih mawh pa hot pa sibhawm, sonsang lih mawh pex pa mi pa koe, kheu pa hot pa sibhawm Nawh Cao heue.

¹⁰Aux krai ceu pa keud pa sawn aux ka pex grawng ceu in, grawh grawng nawh in mawh pa mhawm son pex, pa ang joeng mawh ngie pa liang ti jah yuh, khawm pa simie ti yuh, tom num pa luan heue.

¹¹Yam in yuh pa yuh pex tom hoik sidah, awm pa hoik koe rhawm pa simie pex ti yuh, sonsang koe khawm pa hoik yuh tom sidah, awm pa chix tix heue.

¹²Grawh grawng nawh phan koe rhawm ti yuh, pa tan an mawh ceu pa khaw rhawm pa rieb ti teei kah, mawh awm pa khaw mai pa koe pui mai ang lai mawh awm pa khaw mai pa ang koe nawh heue.

¹³Pa ah aux nin ang lai mawh son sang kieh pui tang kaux nghie rhawm mai kieh pex khi rhawm kah,

¹⁴Mawh kheu grawng pa kieh sidu koe, son pa lheu pex yam in sang mawh pa thiien thie ka pa cud kix, son pa lheu kix kawx, tak sang mawh pa thiien thie ka pa cud pex, son sang koe ceu pa sidu heue.

¹⁵Awm pa hoik tiiem ti deuh ah nin, “Kaw pa hoik pon tom nie ang lai lheu mai kaw pa hoik pon ceeix ngie ang lai cud kah heue.”

¹⁶Yaogyaw bwanson Siyiex, pa hoik kieh Titux koe rhawm pa sang nied ti yuh son pex, awm pa koe aux heue.

¹⁷Nawh hoik rieb ti teei lox pa khyox khaw ex kah, kheu tokaux nawh koe rhawm pa sang nied ti yuh, nawh tom hoik tang hu ka pex awm pa khaw mai alo tix heue.

¹⁸Ex ploi puxaik an hu tau mai nawh, ka ceu pa yaw ka nawh ka daux lox bwan gaux rhawm hoik tah ka ceu cao khawmuik heue.

¹⁹Ang joeng mawh ngie nan, pa mawh kaw pa hoik laug ti ciak ceu cao ti sang hu mai ex, ka grawng pa dex mai bwanson pa tan in, pa hoik teei ex ti yuh son sang koe min pakngai Simiang kah mai son sang plak jhi pa koe rhawm ex ti yuh heue.

²⁰ex rien rhawm tix son ang lai sang koe dee deuh pui phimap kah, ka grawng pa tan pa nie in, pa hoik kieh ex kia ngien kah.

²¹Grawh grawng nawh ex keud ka grawh grawng ceu pa khaw ka plak sivoe ngai Simiang khaing ang lai mawh, ex keud ka grawng khawm pa khaw plak sivoe ngai kawn pui heue.

²²Ex ploi puxaik ex tang kaux hu mai kiex, pa hoik cheu ex ti yaox ka daux tom nie ceu, tom nie bawg mai tawng grawng pa chix viex nawh khawm rhawm tix yuh heue. Phan mawh yam in nawh nie lheu viex khawm rhawm tix, ti nied yuh, kheu kied yum rhawm nawh ka pex heue.

²³Phan pui tix kaux kaux chawk ka grawng Titux, nawh mawh paox grawm aux mai paox pa rom ti yuh kaing tau mai aux ka plak pex, phan ang mawh nan phan chawk ka grawng puxaik ex an kiex, kiex mawh pui cau pui soi ceu cao khankix mai min pakngai Cao Khrit heue.

²⁴Mawh kheu nan pex jhi mhai rug grawng krax moh pex mai ceu pa yaw rangdi ex ka pex, ka kix plak sivoe ngai ceu cao khankix awx.