Read kinyarwanda 2 KAWRINTHUX 9 Bible Online

2 KAWRINTHUX 9 - kinyarwanda bible

2 KAWRINTHUX 9

¹Phan mawh grawng pa dex mai kaing teem ka pui singax khankix, ang aux shiao lai tiiem ka pex,

²grawh grawng nawh aux tawng grawng pa koe rhawm pex ti sang yuh, pa yaw rangdi aux ka grawng pex ka pui meung Makedonix khankix, grawh grawng meung Akhayax hoik dawg cox rien tix been tix num pa hoik luan mai ceu pa viex pex khawm rhawm tix yuh an hoik so kaoh ka rhawm kix tom nie heue.

³Aux hoik ploi puxaik khankix hu, son ang pa yaw rangdi ex ka pex tak mawh pa giex going ka grawng in mai sonsang cox rien pex awm pa hoik krai aux heue.

⁴Phan pui meung Makedonix tix blah hoek tau mai aux mai yaox pa ang pex cox rien tix, pie ex kawx tak sang hoek krax kaig tua, ka pa yum rhawm grawng ceu in heue.

⁵Mawh kheu nan aux tom yiag grawng tak lai khyox khaw ka puxaik khankix, son sang grux hu kix ka pex sivoe mai son sang grux dha cox, pa tan pa hoik tawx pex lox mukheu kah, yuh ka mawx son sang tak mawh an pa tan pa hoik cox khre mai son ang sang mawh pa khin ti kieh tan heue.

⁶Phan mawh grawng in, kaw pa rhuat ngie ceeix ceeix khaing, tak sang yaox ti vawg ngie ceeix ceeix heue. Kaw pa rhuat tom nie, tak sang yaox ti vawg tom nie heue.

⁷Kieh kaux pui mawx kaux pui an yuh awm pa keud nawh ti sang yuh ka daux rhawm tix, ang lai mawh ka daux pa lhawk ti tawx, phan ang mawh nan ka daux pa khin ti kieh tawx, grawh grawng nawh Siyiex moh ka kaw pa gaux rhawm ti tawx heue.

⁸Siyiex chix kieh bwanson khawmuik pre ka pex, sonsang grum kub pex ka ku ceu mai son sang pre ka krax twah krax klaung pa mhawm ku ceu,

⁹Awm hoik tiiem ti deuh ah nin, “Nawh hoik roi ka kudah kudee, nawh hoik tawx ka pui hot pui sibhawm. Pa rahsee nawh ca ot koe leeing ju heue.”

¹⁰Kaw pa tawx simie ka cao pa rhuat mai tawx blah son cao pa ih, tak sang tawx mai nie lheu kieh simie son sang rhuat pex haoh sinyek sinyek mai kieh plix pa rahsee pex piien kah heue.

¹¹Pex tak sang mi koe ka ceu pa mhawm ku ceu khawmuik, tom grum koe rhawm sibieh ti tawx pa yuh tix, kieh koe krax yaog yaw bwanson Siyiex, kheu ex heue.

¹²Kaing pa teem in, ang joeng mawh ngie pa kieh ceu pa lo pui pa singax khankix grum naog, viang mawh nan mawh pa kieh koe khawm pa yaog yaw bwanson Siyiex tom nie heue.

¹³Mawh kheu yaox grawng ceu pa cheu ti yaox pex kheu kaing pa teem in, mawh kheu pa yaog yaw kix bwanson Siyiex, kheu grawng pa chix cu nghiet pex ka lox bwan gaux rhawm Cao Khrit pa hoik rieb pex ti teei mai kheu grawng pa sibieh pex ti tan ka kix mai ka pui khawmuik heue.

¹⁴Tokaux kix kawx rawg bwanson pex mai ca byaong son pex, kheu bwanson Siyiex pa kied ting ka piang pex heue.

¹⁵Yaog yaw bwanson Siyiex son totaix Nawh Cao pa ang lai dak chix uik krai heue.