Read kinyarwanda 2 TIMOSE 1 Bible Online

2 TIMOSE 1 - kinyarwanda bible

2 TIMOSE 1

¹Pawlux pa mawh kawncau pa ting Yesux Khrit, kheu alo Siyiex, awm pa khaw mai lox sijax mukheu grawng ju pa im pa koe ka daux Yesux Khrit.

²Tawx ka Timose, kawn pa moh aux heue. Kieh koe bwanson mai pa caux rhawm mai pa nhim, pa kaoh khaing Siyiex Keeing Cao mai Simiang ex Yesux Khrit liak.

³Aux yaogyaw ka Siyiex, pa yuh aux kaing krub kah, ka daux rhawm dee keud pa singax singeh, awm hoik yuh tax keeing aux khankix, yam doh keud aux ka maix, ka daux pa rawg aux bwan ang jud ang jai khawm ponngaix ponsawm,

⁴kied byaong mai simie ti yaox maix, yam doh keud aux ka pa lih rawm ngai maix, sonsang naog krax gaux rhawm aux heue.

⁵Kheu hoik kieh aux doh keud ka krax yum rhawm pa ang koe dee ne, pa koe ka daux maix, pa hoik koe phao ka ka daux yiex Lo-ix maix mai ka daux miex maix Unik mai pa hoik yum rhawm aux grawng pa koe ka daux maix khawm heue.

⁶Mawh kheu jao in aux tom kieh maix deeh doh keud, sonsang sigwiex maix tix so totaix Simiang Siyiex, pa hoik koe ka daux maix, kheu deuh aux taix kah heue.

⁷Siyiex hoik tawx rhawm pa chix lhat chix graung ka ex ang mawh, hoik tawx rhawm pa koe sibrawm, pa moh rhawm, pa chix priex rhawm tix heue.

⁸Mawh kheu nan paw kaig ka pa kham mhai ruk grawng Simiang ex mai ka grawng aux pa mawh pui pa hoik laung cie Nawh, viang mawh nan neuex mai aux daux pa kham geu pa nu son lox bwan gaux rhawm, awm pa khaw mai sibrawm Siyiex,

⁹pa hoik taoh ex mai pa hoik kok ex kah, pa kok pa singax singeh, ang mawh ka pa khaw mai kaing pa yuh ex, mawh pa khaw mai pa hoik yiag hoik bak Nawh mai bwanson pa hoik tawx ka ex ka daux Yesux Khrit, tom ka sivoe yam jah ti koe bawg yam,

¹⁰hoik sidawng yam in ka pa lih bleeh Cao Taoh ex Yesux Khrit, kaw pa hoik kieh kloi krax yum mai pa viex pa im mai pa ang chix yum, ti kieh sidawng ka daux lox bwan gaux rhawm,

¹¹pa hoik ciak ti kieh aux mawh cao sidiex mai kawncau pa ting mai sara cao gau ka pui tang ceu khankix heue.

¹²Mawh kheu grawng in aux tom yaox ti kham geu ceu in khankix, aux ang lai kaig tua, mawh kheu hoik tawng aux kaw pa hoik yum rhawm aux kah mai aux tawng grawng chix pau Nawh ka ceu pa hoik tawx hoik pong aux ka Nawh tom singaix an heue.

¹³Giex tom sied ka gumlox pa mawh pa meh, ceu pa hoik mhong maix khaing aux, ka daux pa yum rhawm mai pa moh rhawm pa koe ka daux Yesux Khrit heue.

¹⁴Ceu pa mhawm pa hoik tawx hoik pong ka maix an, pau ka daux Khuan Singax Singeh pa ot ka daux ex heue.

¹⁵Maix hoik tawng grawh grawng pui meung Asix khawmuik hoik tieh ti hu khaing aux, khawm kiex pa mawh Pukilux mai Heramogen heue.

¹⁶Kieh Siyiex leeing ju caux rhawm ka piang nyiex Awnesiphaw liak, mawh kheu hoik kieh nawh aux nyawm rhawm law lawx mai ang lai kaig ka grawng ceng cie aux heue.

¹⁷Viang mawh nan yam hoek aux ka veng Romax nawh nied ti coca sawg aux mai yaox ka aux heue.

¹⁸Kieh Siyiex Leng ju kieh nawh pon pa caux rhawm khaing Simiang Siyiex ka daux singaix an liak. Maix hoik tawng mhawm mhawm grawng hoik yuh nawh miex ceu son aux ka daux veng Efesux heue.