Read kinyarwanda 2 TIMOSE 2 Bible Online

2 TIMOSE 2 - kinyarwanda bible

2 TIMOSE 2

¹Kawn aux eue, kieh baox thien riang ka daux bwanson pa koe ka daux Yesux Khrit heue.

²Ceu pa hoik mhong maix khaing aux khankix, ka sinax pui kham mhai ruk tom nie maix tawx pong ka pui pa kaux sijax khankix, pa sang chix gau ka khawm pui tang kaux khankix heue.

³Kham geu ka ceu pa nu tau mai aux, awm pui naing pa mhawm cie Yesux Khrit awx.

⁴Pui mawx ang ah pa yuh pui naing, yuh ti ang kieh tokaux tix koe dee tuh dee fak ka grawng pa tang yuh tix, sonsang pon yuh nawh pa khaw caw rhawm ka kaw pa hoik kieh nawh mawh pui naing.

⁵Phan pui tix kaux kaux cha paox tix ka daux pa klieh, ang lai tawx nawh ceep mhok khri, phan nawh ang hawt yuh awm pa koe been.

⁶Pui pa yuh kaing ka daux ma, tak lai mawh pa pon plix ka sivoe paox tix heue.

⁷Keud ka grawng pa krai aux. Grawh grawng nawh Siyiex Leeing ju tak sang tawx krax tawng ka maix ka daux ku ceu khawmuik heue.

⁸Doh keud ka Yesux Khrit pa mawh ru Davit, pa hoik deeh kaoh im khaing krax yum, awm pa khaw mai lox bwan gaux rhawm pa sidiex aux heue.

⁹Mawh kheu lox sidiex an, aux yaox ti kham geu pa nu, tom phyawk aux awm pui caox, viang mawh nan ang pon ti phyawk ka gumlox Siyiex heue.

¹⁰Aux tom kham geu ku ceu khawmuik, son pui pa hoik laug khankix, yuh ka mawx kix kawx, sang pon krax taoh pa koe ka daux Yesux Khrit tau mai min pakngai leeing ju heue.

¹¹Lox pa ah nin mawh pa kaux sijax, “Phan ex hoik yum tau mai Nawh, ex tak sang im tau mai Nawh heue.

¹²Phan ex gun pa kham pa geu, ex tak sang pon ti giex kaing tau mai Nawh heue. Phan ex thiang ti tik Nawh, Nawh Cao kawx tak sang thiang ti tik ex heue.

¹³Viang ex ang kaux sijax kawx, Nawh Cao kawn kaux sijax, mawh kheu ang Nawh pon thiang ti tik tokaux tix heue.

¹⁴Kieh kix deeh doh keud ka grawh grawng ceu in khankix mai tawm lox ka kix sivoe Simiang Siyiex, son ang kix sang coca grawng pa thung thiang ka lox pa ang tie koe bwanson tidtix, pa kieh pui pa nghiet khankix laux leeing kah heue.

¹⁵Nied ti coca sonsang pon maix ti tawx tokaux tix ka Siyiex, pa mawh pui pa hoik cheu ti yaox kah, pa mawh pui yuh kaing pa ang koe dee kaig tua pa chix gwieh ka gumlox pa mawh meh awm pa khaw heue.

¹⁶Via khaing lox bied pa caox khankix, mawh kheu gumlox khankix sang nie kieh lud hu ka daux pa ang khaw ka Siyiex.

¹⁷Lox kix chix sawm hu awm kaman. Kiex Humenex mai Philit kawx mawh ka daux kix heue.

¹⁸Pa mawh pui pa hoik lud hu khaing pa mawh meh mai ah “Krax pa deeh kaoh im hoik luan,” mai kieh krax yum rhawm pui tix blah laux kah heue.

¹⁹Viang mawh nan jaong num Siyiex kaux cong, pa koe cum yuh nin, “Simiang Siyiex tawng kix pa mawh cie tix,” mai khawm pa ah, “Kieh pa kok ka ceu kaux Simiang Siyiex ku kaux daux pui lih hu khaing pa ang rahsee heue.”

²⁰Ka daux nyiex pa ting koe ngie klong khri klong mau khaing ang mawh, koe khawm tawg khaox klong tiex, tix blah mawh pa koe min pakngai mai tix blah mawh pa ang koe min pakngai heue.

²¹Phan pui tix kaux kaux kieh tokaux tix singax khaing in khankix, nawh tak mawh klong pa koe min pakngai, pa singax mai pa mhawm sonsang shiao cao nyiex, pa hoik cox khre ka son kaing pa mhawm ku ceu heue.

²²To khaing alo nex nham sinaw mai hawt khaix pa rahsee mai krax yum rhawm mai krax moh krax rhawm mai krax nhim tau mai kix pa kok ka Simiang Siyiex, khaing daux rhawm rhi pa singax singeh heue.

²³Via khaing pa chawk cheng pa daox pa aw mai tawng grawng khankix mawh pa chix kieh simah simiang heue.

²⁴Siliex Simiang Siyiex tak ang lai simah simiang, tak lai viex rhawm awn ka pui khawmuik, pa jiet chix gau mai pa pon gun pon yeung,

²⁵tak lai viex rhawm awn rhawm tiem mai gau ka kix pa deeh kieh raw ka tokaux tix, ha Siyiex kox deeh kieh kix doh keud ka phimap tix hoek ka pa tawng pa mawh pa meh,

²⁶sonsang pon kix ti deeh taoh tokaux tix khaing daux kie phicaox, pa hoik giex kix sonsang kieh hawt alo nawh heue.