Read kinyarwanda 2 TIMOSE 3 Bible Online

2 TIMOSE 3 - kinyarwanda bible

2 TIMOSE 3

¹Een ti tawng ceu in, ka daux bawg yam singaix sidah khankix sax, tak mawh bawg yam pa lang teung nu heue.

²Pui tak sang mawh pui pa moh tokaux tix, pa moh mau, pa yaw tix, pa ting rhawm, pa salao, pa ang nghiet lox miex keeing, pa ang tawng bwanson, pa ang singax singeh,

³pa ang koe krax moh, pie been moh pa sax koe pui, pa ang rhawm pluat phimap pui, pa nieb deuh phimap ka pui, pa ang chix priex rhawm tix, pa lang teung caox, pa ang moh ka pa mhawm,

⁴Pui lulie pa ang kaux sijax, pui pa nieb yuh ti tawng uik, pui ca nyhau, pui pa nie lheu moh krax gaux rhawm haktiex khaing pa moh ka Siyiex,

⁵pui pa yuh grang awm mawh kix pa nab yam pa yuh pa khaw ka Siyiex, kix hoik thiang ti tik ka sibrawm cie an heue. Via hu khaing khawm inkix awx.

⁶Inkix mawh pa laig daux nyiex khankix miep miep, giex ka bun daox khankix, pa peeh phimap, pa tuk hu alo nex nham ka ku ceu heue.

⁷Viang kix meung ti gau kawx, kix ang sax hoek ka krax tawng yung ka pa mawh meh heue.

⁸Awm Yanne mai Yambre kieh raw ka Mose, pui inkix kawx, kieh raw ka pa mawh meh heue. Pa mawh pui pa hoik sium daux rhawm dee chix keud tix, pa ang koe bwanson tidtix ka krax yum rhawm heue.

⁹Kix tak ang pon ti baox yuh hu sivoe, mawh kheu pa nieb yuh kix tak sang sidawng ka pui khawmuik, awm pa hoik yuh kiex Yanne mai Yambre heue.

¹⁰Viang mawh nan maix hoik hawt ti tawng ka pa gau aux, ka krax twah krax klaung, ka pa keud, ka krax yum rhawm, ka krax pa lang gun lang yeung, ka pa moh rhawm, ka pa gun pa yeung,

¹¹ka pa tuktiak tukte, ka pa kham pa geu, ceu pa hoik mawh ka aux khankix, ka daux veng Antiuk, ka veng Ikawnix, ka veng Lusatrax, grawng ceu pa tuktiak tukte pa hoik kham geu aux heue. Khaing ceu an khankix khawmuik Simiang Siyiex hoik taoh ka aux heue.

¹²Mawh heue, can pui pa simie ti yuh pa khaw caw mai Siyiex ka daux Yesux Khrit khawmuik, tak sang yaox ti kham pa tuktiak tukte heue.

¹³Pui caox khankix mai pui pa nieb kroh ti pie khankix, tak sang nie caox sinyek sinyek mai pie ka pui tang kaux mai kieh pie ka khawm tokaux tix heue.

¹⁴Maix ot kaux cong ka daux ceu pa hoik gau maix mai pa hoik tawng maix mawh pa mawh tete, kheu hoik tawng grawng pa gau maix ceu an khankix khaing pui pa yuh ka mawx,

¹⁵mai jah tom yam mawh maix kawn nyawm maix hoik tawng phuk lai sigang khri pa singax singeh, pa chix kieh maix koe pingnya tom hoek ka krax taoh kheu pa yum rhawm ka daux Yesux Khrit.

¹⁶Phuk lai sigang khri can pa koe khankix, mawh pa hoik phlu Siyiex bhawm mai koe bwanson, son pa gau, sonsang plak jhi ti tawng phimap mai son pa cox dee lud mai son pa gau ceu pa rahsee,

¹⁷sonsang kieh pui Simiang Siyiex mawh pa grum naog mai pa hoik rien tix son kaing pa mhawm ku ceu heue.