Read kinyarwanda 2 TIMOSE 4 Bible Online

2 TIMOSE 4 - kinyarwanda bible

2 TIMOSE 4

¹Aux tawm lox ka maix ka sivoe Simiang Siyiex mai Yesux Khrit, pa tak sang prawng sang ca ka khawm pui im pui yum, kheu pa lih bleeh Nawh meung Nawh,

²sidiex gumlox bwan, nied ti coca yam caw bawg yam ang ah, yam ang caw bawg yam ang ah, plak jhi pui yaox phimap mai ah, ne mai jeeh nyaw, gau ka krax pa lang gun lang yeung khawmuik heue.

³Bawg yam tak sang hoek yam kix tak ang pon kham tix nghiet ka lox gau pa mawh pa meh, kheu ngiex yhaok kix, kix tak sang khrawm sang pum sara cao gau, pa sang hawt alo nex nham kix heue.

⁴Kix tak sang veeh yhaok tix ang nghiet ka pa mawh pa meh, tieh ti nghiet ka lox been pa ang tie mawh khankix heue.

⁵Maix priex rhawm tix ka daux ku ceu khawmuik, kham geu ka pa nu, yuh kaing sara cao sidiex, yuh ti kieh pa yuh maix grum naog heue.

⁶Grawh grawng nawh uik tan aux awm pa prauk rawm tan mai bawg yam lih hu aux hoik hoek heue.

⁷Aux hoik yuh naing, naing pa mhawm, aux hoik sidah to, ka krax dee to, aux hoik priex ka krax yum rhawm heue.

⁸Jah tom yam in hoik deuh mhok khri pa rahsee son aux, Simiang Siyiex pa mawh cao prawng pa rah pa see tak sang tawx ka aux ka daux singaix an mai ang joeng mawh ngie ka aux viang mawh nan ka khawm pui pa moh ka pa lih bleeh Nawh Cao khawmuik heue.

⁹Nied ti coca sonsang hoek ka aux laung laung,

¹⁰mawh kheu Dema hoik prah aux, kheu moh nawh ka haktiex in mai hoik hu ka veng Thesalonix, Krisake hoik hu ka meung Kalatix, Titux hoik hu ka meung Dalamatix heue.

¹¹Mawh ngie Lukax pa ot tau mai aux khaing. Rieb ti teei Makux mai viex nawh hoek tau mai maix, kheu nawh koe bwanson son aux daux kaing sidiex aux heue.

¹²Aux hoik ploi Tukhik hu ka veng Efesux heue.

¹³Yam hoek maix viex sibex dhah pa deuh aux mai Kapux daux veng Troax mai phuk lai khankix, nie ting mawh ka lai hak khankix heue.

¹⁴Alezandre cao tiiem tawng raoh hoik yuh pa caox ka aux tom nie, Simiang Siyiex tak sang deeh tawx ka nawh awm pa hoik yuh nawh heue.

¹⁵Rien rhawm tix ka nawh khawm awx, kheu nawh hoik ting kieh raw ka lox ex heue.

¹⁶Yam tiebtie aux grawng pa deuh phimap ka aux bawg phao ka, ang ot plak aux tix kaux kawx, grham aux khawmuik, paw awt kieh hoek ka piang kix liak.

¹⁷Simiang Siyiex ot plak aux mai baox tiien riang rao ka aux, sonsang pon grum sidiex aux lox bwan mai sonsang pon mhong pui tang ceu khawmuik heue. Hoik taoh aux khaing daux jheeh sivai sangsi heue.

¹⁸Simiang Siyiex tak sang taoh aux khaing kaing pa caox ku ceu mai priex aux tom hoek ka meung raoma cie Nawh heue. Kieh Nawh Cao koe min pakngai ku ju leeing ju liak. Amen.

¹⁹Nawb ka Prisikilax mai Akulax mai pui nyiex Awnesiphaw khankix awx.

²⁰Erattux hoik ot khaix ka veng Kawrinthux, viang mawh nan kheu saux Trawphimux aux hoik prah nawh ka veng Meletux heue.

²¹Nied ti coca hoek ka sivoe bawg yam kuat awx. Upulux mai Pudix mai Linux mai Klawdix mai puxaik khankix khawmuik, nawb ka maix heue.

²²Kieh Simiang ot tau mai khuan maix liak. Kieh bwanson koe mai maix heue.