Read kinyarwanda PHILEMON 1 Bible Online

PHILEMON 1 - kinyarwanda bible

PHILEMON 1

¹Pawlux, pa mawh pui pa hoik laung son Yesux Khrit mai puxaik ex Timose, tawx ka Philemon pa moh ex mai pa mawh pui rom ti yuh kaing tau mai ex,

²ka Appix nan ex mai ka Akippux pa mawh pa rom ti mawh pui naing tau mai ex, ka ceu cao daux nyiex maix heue.

³Kieh maix koe bwanson mai pa nhim pa kaoh khaing Siyiex Keeing ex mai Yesux Khrit heue.

⁴Aux yaog yaw ka bwanson Siyiex aux jheung jheung mai simawd maix ka daux pa rawg aux bwan,

⁵Mawh kheu mhong aux grawng krax moh maix, krax yum rhawm pa koe maix plak Yesux Khrit mai khawm plak pui singax khawmuik heue.

⁶Kheu ceu pa yuh paox pie, ka krax yum rhawm maix, tak sang koe bwanson, ka daux krax tawng yung ka ceu pa mhawm kuceu, pa koe ka daux maix, ka son Cao Khrit heue.

⁷Grawh grawng nawh aux hoik kied koe krax gaux rhawm mai pa nyawm rhawm ka daux krax moh maix, mawh kheu rhawm rhi pui pa singax khankix hoik pon ti nyawm rhawm kheu maix, puxaik eue.

⁸Mawh kheu nan viang aux koe rhawm kwa daux Cao Khrit nie khin maix yuh ceu pa khaw,

⁹Aux Pawlux pa hoik kuad mai pa mawh khawm pui pa hoik laung son Yesux Khrit yam in, nie lheu koe rhawm ti sang khyox khaw ka maix ka daux krax moh krax rhawm heue.

¹⁰Aux khyox khaw ka maix son kawn aux Awnesimux, pa hoik pon hoik kieh aux keh, ka daux pa phyawk aux in.

¹¹Kaw pa ang koe bwanson son maix nhaox, viang mawh nan yam in koe bwanson ka maix mai ka aux heue.

¹²Aux deeh ploi tokaux nawh ing ka maix, pa mawh rhawm rhi aux tete, rieb ti teei nawh liak.

¹³Viang aux simie ti kawn kieh nawh ot tau mai aux, son sang teem nawh ti kia ngien ka aux, ka daux pa phyawk son lox bwan gaux rhawm,

¹⁴Phan aux ang nyang pon lox maix ang aux rhawm yuh tix ceu kawx, yuh ka mawx ceu pa mhawm pa sang yuh maix ka aux tak ang mawh pa khin ti kieh yuh, son sang mawh pa lak keud maix ti yuh hawt alo tix tiru heue.

¹⁵Ha kox hoik kieh nawh gwieh hu khaing maix tix vong, yuh ka mawx maix tak sang pon nawh son ku jheung jheung,

¹⁶Ang baox mawh awm siliex, mawh pa nie lheu khaing siliex, pa mawh puxaik pa moh, pa moh aux kah, nie lheu mawh ka maix miex ding, ka daux nex nham mai khawm ka daux Simiang heue.

¹⁷Phan maix een aux mawh paox pie, rieb ti teei nawh, awm sang rieb ti teei ka tokaux aux heue.

¹⁸Phan nawh hoik lud ka maix, phan ang mawh nan phan nawh ceuk ka maix tix ceu ceu, deuh mawh cie aux.

¹⁹Aux Pawlux tiiem lai in ka taix tix, “Aux tak sang deeh plud kah heue.” Aux ang lai krai grawng maix ceuk khawm tokaux maix ka aux heue.

²⁰Mawh heue, pux eue, kieh aux koe krax gaux rhawm khaing maix ka daux Simiang. Kieh rhawm aux nyawm rhawm daux Cao Khrit liak.

²¹Mawh kheu yum rhawm aux ka grawng pa chix cu nghiet maix, aux tom tiiem hu ka maix, Kheu tawng aux grawng maix sang nie lheu yuh khaing pa ah aux heue.

²²Lheu khaing an, viang mawh dee ot kawx, cox son aux liak, mawh kheu koe aux krax keud pot jun pot, grawng sang deeh tawx aux ka maix, kheu rawg maix bwan heue.

²³Epaphrax, pa mawh paox aux, ka daux pa laung son Yesux Khrit nawb ka maix,

²⁴Makux Aritakhux Demax Lukax, pa mawh paox yuh kaing aux khankix kawx, nawb ka maix heue.

²⁵Kieh bwanson Simiang ex Yesux Khrit ot tau mai khuan maix liak! Amen.