Read kinyarwanda 1 PETRUX 1 Bible Online

1 PETRUX 1 - kinyarwanda bible

1 PETRUX 1

¹Petrux, pa mawh kawncau pa ting Cao Yesux Khrit tiiem ka nyo sinie, can pa prung prang ti ot ka daux meung Pawntux, meung Kalatix, meung Kappadawkix, meung Asix mai meung Bisunix,

²pa hoik laug awm pa khaw mai pa grux tawng Siyiex Keeing Cao sonsang kieh singax singeh ka daux Khuan Cao, sonsang koe krax cu nghiet mai pa phruah ka nham Yesux Khrit heue. Kieh bwanson mai pa nhim baox thiem thie ka pex liak awx.

³Kieh Siyiex mai Keeing Simiang ex Yesux Khrit ting bwanson, pa hoik kieh ex deeh keh awm pa khaw mai krax caux rhawm Nawh pa kied ting, ti koe krax keud pot jun pot pa im, ka daux krax pa deeh kaoh im Yesux Khrit khaing krax yum,

⁴sonsang pon sin pa ang chix laux leeing mai pa ang seeing, pa ang chix bheet laix, pa hoik priex son pex ka daux meung raoma,

⁵pa mawh pui pa pau Siyiex ka sibrawm Nawh kheu krax yum rhawm sonsang kieh pon krax taoh, pa hoik rien khre ti plak kieh sidawng bawg yam sidah khaix sax heue.

⁶Pex kied koe krax gaux rhawm ka daux an, viang mawh yam in son bawg yam tix vud ngie, phan pex tak lai yaox krax khi kawx, ka daux krax cheuk cheu tom nie ceu,

⁷sonsang cheu ti yaox krax yum rhawm pex, pa lheu mhawm lheu ngawh khaing khri, pa chix laux leeing, viang hoik cheu ti yaox ka ngu kawx, yuh ka mawx tak yaox pa mawh ceu pa yaogyaw mai min pakngai mai pa nab yam, yam lih bleeh Yesux Khrit heue.

⁸Kaw pa ang pex sax yaox mai moh ka heue. Viang pex ang pon yaox Nawh yam in kawx, pex yum rhawm ka Nawh mai kied koe krax gaux rhawm pa ang chix uik krai, pa naog min pakngai,

⁹mai pex sang pon bwanson krax yum rhawm tix, pa mawh krax taoh ju pex heue.

¹⁰Grawh grawng krax taoh in cao jhai khankix hoik nied ti sawg chawk cheng mai krai lox jhai grawng bwanson pa sang pon pex heue.

¹¹Kix sawg ti tawng bawg yam, mawh yam pa yuh ka mawx, Khuan Cao Khrit pa ot ka daux kix, pa jhi yaox yam grux kham Nawh mhai rug, grawh grawng pa tak sang kham geu Cao Khrit mai min pakngai pa tak sang koe khaix hoik kham geu ceu an khankix heue.

¹²Hoik plak kieh kix tawng grawh grawng pa yuh kix ang mawh son tokaux tix, viang mawh nan mawh son pex, yam grux krai kix grawh grawng ceu pa hoik krai sidawng ka pex yam in, ka pui pa hoik sidiex gau lox bwan gaux rhawm ka pex, ka daux pa teem Khuan Cao pa hoik ploi lih khaing raoma heue. Grawh grawng ceu an khankix kawncau Siyiex mie ti jhak mai tawng heue.

¹³Mawh kheu nan nhawt maox rawd nyoi rhawm pex mai priex rhawm tix, keud pot jun pot tom sidah, son bwanson pa tak sang viex hoek ka pex, yam lih bleeh Yesux Khrit heue.

¹⁴Kieh awm kawn praix pa chix nghiet chix cu lox mai paw yuh tokaux tix yaung awm alo nex nham, ceu pa sax yuh pex glang ka, yam ang pex lai tawng.

¹⁵Viang mawh nan, awm singax singeh Kaw pa hoik kok pex, kieh tokaux pex singax singeh yuh nan ka daux can pa yuh tix khawmuik heue.

¹⁶Mawh kheu hoik tiiem ti deuh ah nin, “Kieh tokaux pex singax singeh, kheu singax singeh Aux heue.”

¹⁷Phan pex kok ka Nawh awm pa mawh Nawh Keeing, pa mawh Kaw pa ang jhak pakngai pui mai prawng ca awm pa khaw mai pa yuh kaux pui mawx kaux pui an, kieh koe krax lhat graung yam kawn ot koe pex heue.

¹⁸Mawh kheu tawng pex, grawng ang teei mau khri ceu pa chix laux leeing mai taoh pex khaing pa giex going pa yuh tix, pa hoik toe ti tawx ka pex khaing tax du pex dix heue.

¹⁹Viang mawh nan hoik taoh pex ka nham pa ngawh, pa awm nham kawn yung pa ang koe dee ne pa loig, pa mawh nham Cao Khrit heue.

²⁰Cao Khrit an, mawh pa hoik grux ciak ti deuh ka sang jah ti kaw haktiex, viang mawh nan pa hoik kieh sidawng, daux bawg yam sidah in, son pex,

²¹pa mawh pui pa hoik yum rhawm ka Siyiex ka daux Nawh, pa hoik kieh Nawh deeh kaoh im khaing krax yum mai tawx min pakngai ka Nawh, son krax pa yum rhawm mai krax keud pot jun pot pex, tak mawh ka daux Siyiex heue.

²²Kheu hoik kieh pex ju tix singax singeh ka daux krax cu nghiet pex ka pa mawh meh, tom sang koe krax moh krax rhawm pa ang pie lhen ka puxaik khankix, pex nied ti moh paox tix, tix kaux lai tix kaux tom daux rhawm tix mhawm mhawm heue.

²³Mawh kheu pex hoik baox deeh keh ka daux simie pa chix laux leeing ang mawh, viang mawh nan pex hoik deeh keh ka daux simie pa ang chix laux leeing, pa mawh gumlox Siyiex pa im pa tak kaux leeing ju heue.

²⁴Grawh grawng nawh, ceu kawn pui khawmuik awm num rib num riem mai min pakngai kawn pui awm tai rib tai riem heue. Rib kienie, chix kroh chix fit hu mai tai nawh chix khrom hu,

²⁵viang mawh nan gumlox Siyiex tak kaux leeing ju heue.” in mawh gumlox gaux rhawm pa hoik sidiex gau ka pex heue.