Read kinyarwanda 1 PETRUX 2 Bible Online

1 PETRUX 2 - kinyarwanda bible

1 PETRUX 2

¹Mawh kheu nan tik ka pa caox khawmuik mai pa kheem pa veux mai pie kheem khawmuik mai pa boh rhawm mai pa sikah lox caox khawmuik,

²Awm kawn ngie pa tak khraox keh khankix, simie ka rawm teeih gumlox bwan pa singax singeh, sonsang haok hwan pex tom pon krax taoh.

³Phan pex hoik cim ti yaox grawh grawng mawh Simiang Yesux pa koe rhawm ti tawx bwanson heue.

⁴Mawh kheu nan hoek ka Nawh, pa mawh Simaox pa im ju, pa hoik tik kawn pui ka tete, viang mawh nan pa hoik laug Siyiex mai een ti mawh pa ting min pakngai heue.

⁵Pex kawx awm simaox pa im pa sum ti yuh nyiex pa dex dawd mai khuan, sonsang mawh cub cao giex kaing li pa singax singeh, pa sang tan, ceu pa tan pa dex dawd mai khuan, pa khaw caw ka Siyiex ka daux Yesux Khrit heue.

⁶Mawh kheu hoik koe ka daux phuk lai sigang khri yuh nin, “Jhak heue, Aux hoik deuh Simaox kaing ka daog ka daux Zion, pa hoik laug ti teei mai ting min pakngai mai kaw pa yum rhawm ka Nawh tak ang hoek krax kaig tua heue.”

⁷Mawh kheu nan min pakngai an mawh son pex pa yum rhawm khankix heue. Viang mawh kawx nan son pui pa ang yum rhawm khankix, “Simaox pa hoik tik pui pa yuh nyiex hoik yuh kieh mawh kaing ka daog heue.”

⁸“Simaox dee sideeing mai Rang pa kieh lud heue.” Kix sideeing caong tix ka gumlox bwan, kheu ang kix cu nghiet kah mai hoik ciak ka kix tix sang mawh nan heue.

⁹Viang mawh nan pex mawh ceu pui pa hoik laug, pa mawh cao giex kaing li Siyiex, pa mawh ceu pui pa singax singeh, pa mawh pui Siyiex tete, sonsang jhi pex grawh grawng ceu pa ting lhaong, pa mhawm, Kaw pa hoik kok pex lih khaing daux pa faik mai laig ka daux pa riang pa daox deng cie tix heue.

¹⁰Ka daux bawg yam pa hoik luan, pex ang mawh ceu pui pa yuh nan, viang mawh nan yam in pex hoik mawh ceu pui Siyiex heue. Glang ka in viang pex ang pon bwanson pa caux rhawm kawx, yam in pex hoik pon bwanson pa caux rhawm heue.

¹¹Pa moh aux khankix eue, aux khyox khaw ka pex pa awm nyo sinie, son ang sang yuh ceu pa dex dawd mai alo nex nham khankix, pa yuh krax naing ka ju heue.

¹²Kieh pa yuh pex mawh pa nyawm ti jhak ka sinax pui tang ceu khankix, yuh ka mawx viang kix ah lox deuh phimap ka piang pex awm mawh pex pui pa yuh pa caox kawx, kix tak sang yaox kaing pa yuh pex pa mhawm mai yaogyaw Siyiex ka daux singaix pa kia pa prawng heue.

¹³Kieh koe krax cu nghiet ka been kawn pui ku ceu son Siyiex, ka simiang pa ting khaing paox tix ang ah,

¹⁴mai ka simiang giex kaing khankix ang ah, pa hoik ploi Nawh, sonsang ciyang pui pa yuh pa caox khankix mai sonsang yaogyaw kix pa yuh pa mhawm heue.

¹⁵Pex tak lai pon kieh lox pui daox pa ang chix tawng khankix yiien glaik tix kheu ceu pa yuh tix pa mhawm grawh grawng nawh Siyiex koe alo yuh nan heue.

¹⁶Kieh mawh pui ploi, viang mawh nan paw vi teei ceu pa ploi pex, yuh mawh dee du dee jhan, sonsang mawh sibex pa tawb ceu pa caox pa yuh tix, viang mawh nan kieh awm siliex Siyiex heue.

¹⁷Yungyi ka pui khawmuik heue. Moh ka puxaik khankix heue. Lhat ka Siyiex heue. Yungyi ka simiang heue.

¹⁸Kawncau khankix eue, kieh koe krax lhat mai cu nghiet ka cao pex khankix heue. Ang lai mawh ngie ka pa mhawm rhawm awn rhawm khankix, viang ka pa riex khankix kawx, kieh koe krax cu nghiet kah heue.

¹⁹Phan pui tix kaux kaux jhak ka pakngai Siyiex mai kham geu ceu pa ang khaw, mawh pa khaw ti yaogyaw nawh kah heue.

²⁰Mawh kheu phan pex chix viex rhawm gun yeung mai kham geu pa tap toi, yam lud, chix yaogyaw yuh ka mawx? Viang mawh kawx nan yam yuh pex ceu pa mhawm mai yaox ti kham geu kheu an, pex tak lai viex rhawm gun yeung, kheu in mawh pa khaw caw mai Siyiex heue.

²¹Grawh grawng nawh, hoik kok pex sonsang yuh nan heue. Mawh kheu Cao Khrit kawx hoik kham geu son pex mai hoik deuh ceu pa jhak ti hawt jawh son pex, sonsang hawt pex ka khaix caong Nawh heue.

²²Kaw pa ang sax yuh phimap mai pa ang sax yaox lox pie lhen ka jheeh Nawh heue.

²³Yam yuh pa ang cee cak ka Nawh, Nawh ang deeh pawk ti yuh pa ang cee cak mai yam kham geu Nawh, Nawh ang deeh bak deeh viang ti yuh tidtix, viang mawh nan Nawh tawx pong tokaux tix ka Kaw pa chix prawng ca rahsee heue.

²⁴Kaw pa hoik kham geu phimap ex piang khaox, ka daux tokaux tix, sonsang mawh ex pa hoik yum ka phimap mai deeh im ka pa rahsee heue. Kheu khaix rhoi Nawh, pex hoik pon ti deeh moi heue.

²⁵Grawh grawng nawh, glang ka in pex lud krax hu awm yung, viang mawh nan yam in pex hoik deeh hoek ka Cao liang pex, pa mawh Cao giex kaing ju pex heue.