Read kinyarwanda 1 PETRUX 4 Bible Online

1 PETRUX 4 - kinyarwanda bible

1 PETRUX 4

¹Mawh kheu nan awm Khrit hoik kham geu ka daux nex nham, tokaux pex kawx, rien kraung naing pa mawh rhawm pa awm an heue. Grawh grawng nawh kaw pa hoik kham geu ka daux nex nham, ang lai deeh yuh phimap heue.

²Kheu pex tak ang baox deeh ot ka daux bawg yam pa hawt pex alo nex nham pa koe kawn pui, viang mawh nan hawt ti yuh alo Siyiex heue.

³Mawh kheu ex hoik hawt yuh alo pui tang ceu, ka daux bawg yam ju ex pa hoik luan tom kub, pa mawh pa chax nie lheu yuh mai pa hawt yuh alo nex nham mai pa chax nie miag ka plai mai pa yuh pawie pa chax nie luan mai pa chax nie luan ih mai pa krub riang grang khankix pa seeing heue.

⁴Kix daox deng kah, kheu ang pex to hu tau mai kix, ka daux pa chax nie luan yuh kix mai kix ah pa caox pa ang khaw ang jiet grawng pex heue.

⁵Kix tak lai krai grawng pa yuh tix, ka Kaw pa hoik rien ti sang prawng ca, khawm ka pui im pui yum khankix heue.

⁶Mawh kheu nin viang ka pui pa hoik yum khankix kawx hoik sidiex gau lox bwan gaux rhawm, sonsang pon prawng ca ka kix, awm pui pa ot ka daux nex nham, viang mawh nan sonsang pon im kix awm pa khaw ka Siyiex ka daux khuan heue.

⁷Dee sidah ku ceu khawmuik dex sang hoek, mawh kheu nan, priex rhawm tix mai rawg bwan heue.

⁸Lheu khaing ku ceu khawmuik kieh koe krax pa nied ti moh paox tix. Grawh grawng nawh krax moh chix tawb kheem phimap tom nie heue.

⁹Paw kieh koe rhawm pa siviien mai kia ngien ka paox tix heue.

¹⁰Awm hoik pon kaux pui mawx kaux pui an totaix, shiao sonsang koe bwanson son paox tix, awm kawncau pa mhawm pa kia pa priex bwanson Siyiex pa nie ceu heue.

¹¹Phan pui tix kaux kaux sidiex gau, kieh nawh sidiex gau lox tawm jhawm krai Siyiex heue. Phan pui tix kaux kaux yuh son pui tang kaux, kieh nawh yuh ka daux riang rao pa tawx Siyiex heue. Kheu sonsang koe min plakngai Siyiex ka daux ku ceu khawmuik kheu Yesux Khrit, kieh Nawh koe min pakngai mai sibrawm ku ju leeing ju. Amen.

¹²Pui pa moh aux khankix eue, yam yaox pex ti kham krax kham krax geu awm ngu, pa hoek piang pex sonsang cheu ti yaox pex, paw ce mawh pa khaw ti daox deng kah, awm pa hoik mawh ceu pa daox deng ka pex.

¹³Viang mawh nan, mawh kheu mawh pex pa pon ti neuex ka daux krax kham krax geu Cao Khrit gaux rhawm kah, Kheu yam lih bleeh min pakngai Nawh, pex kawx tak kied koe krax gaux rhawm heue.

¹⁴Phan pex yaox ti kham pa ang cee ang cak kheu ceu kaux Cao Khrit, pex ting bwanson, mawh kheu Khuan ting min pakngai, pa mawh Khuan Siyiex ot piang pex heue.

¹⁵Paw kieh pex yaox ti kham geu, tix kaux kawx, kheu pa pah pui yum, phan ang mawh nan kheu yuh pui briex, phan ang mawh nan kheu yuh pa caox, phan ang mawh nan kheu ceu pa chuh ka pa yuh pui tang kaux heue.

¹⁶Viang mawh nan phan pui tix kaux kaux yaox ti kham krax kham geu kheu mawh nawh kawn Khrit, paw kieh nawh koe krax kaig twa kah, viang mawh nan kieh nawh yaogyaw Siyiex ka daux ceu kaux in heue.

¹⁷Bawg yam pa sang jah ti prawng ca, ka pui geh nyiex Siyiex hoik hoek mai phan krax prawng ca an jah ka ex phao ka, dee sidah kix pa ang koe krax cu nghiet ka lox bwan gaux rhawm Siyiex, tak sang mawh pa yuh ka mawx?

¹⁸Phan pui rahsee nu ti hoek krax taoh, pui pa sang chix nab yam mai pa ang khaw ka Siyiex mai pui phimap khankix tak sang bleeh dee mawx?

¹⁹Mawh kheu nan kieh kix pa yaox ti kham krax kham geu awm pa khaw mai alo Siyiex, pong ti tawx ju tix, ka daux pa yuh pa mhawm, ka Cao phan Cao yuh pa kaux sijax heue.