Read kinyarwanda 1 PETRUX 5 Bible Online

1 PETRUX 5 - kinyarwanda bible

1 PETRUX 5

¹Mawh kheu nan, aux pa mawh kuad song ka daux ceu cao tix kaux mai pa mawh pui pa kham mhai rug grawng krax kham geu Cao Khrit mai pa mawh khawm pa sang pon ti neuex ti pon min pakngai, pa tak sang lih bleeh, sidiex gau ka kuad song ceu cao khankix ka daux pex heue.

²Kia ngien ka cub yung Siyiex pa ot ka sinax pex mai giex kaing kix, viang mawh nan kieh koe rhawm tix sang yuh awm pa khaw mai alo Siyiex mai paw kieh mawh pa khin ti yuh, lheu khaing an paw kieh mawh kheu moh pex ti pon mau pa seeing, viang mawh nan kieh koe rhawm pa mie ti yuh heue.

³Paw nieb yuh ti ting piang cub ceu cao pa hoik tang tawx ka pex, viang mawh nan, kieh tokaux pex mawh mhai pa hawt cub yung tix jawh kah heue.

⁴Yam lih bleeh Cao liang yung pa ting, pex tak sang pon mhok khri min pakngai pa ang chix bheet laux heue.

⁵Awm an pex pa awn ju khankix eue, kieh cu nghiet ka kuad song ceu cao heue. Lheu khaing an, pex khawmuik rawd nyoi tix ka pa awn rhawm ti sang yuh son paox tix, tix kaux lai tix kaux, mawh kheu, “Siyiex tiebtie ka pui pa ting rhawm, viang mawh nan Nawh tawx bwanson ka pui pa awn rhawm heue.”

⁶Mawh kheu nan yuh tokaux pex awn rhawm, greem taix Siyiex pa ting sibrawm, sonsang yaog Nawh pex ting yam hoek bawg yam heue.

⁷Plee ceu pa khi rhawm pex khawmuik piang Nawh Cao, kheu kia ngien Nawh ka pex jheung jheung heue.

⁸Rien rhawm tix mai pau tix jhak, mawh kheu pa koeng pex phicaox awm sivai sangsi pa graox mai hu lailing ti sawg kug pa sang kiied nawh ti ih heue.

⁹Kieh kaux cong ka daux krax yum rhawm pex mai tiebtie nawh, kheu tawng pex puxaik pex khankix can pa ot piang haktiex khawmuik, yaox ti kham geu pa yuh nan heue.

¹⁰Siyiex pa yuh bwanson khawmuik, pa hoik kok pex laig ka daux min pakngai leeing ju Nawh, ka daux Cao Khrit, khaix hoik yaox pex ti kham geu tix vud ngie, tokaux Nawh tak sang kieh pa grum mhawm mai kieh kaux cong mai baox thien thie riang rao kah heue.

¹¹Kieh Nawh koe min pakngai mai sibrawm ku ju leeing ju liak. Amen.

¹²Aux hoik tiiem lai ka pex ceeix mai sipaox ka Silwanux, pa een aux mawh puxaik ex pa kaux sijax, sonsang sidiex gau mai kham mhai rug grawh grawng in mawh bwanson Siyiex pa mawh meh heue. Pex cung tom kaux ka daux an heue.

¹³Ceu cao pa koe ka daux veng Babulon, pa hoik laug tau mai pex mai kawn simex aux Makux nawb ka pex heue.

¹⁴Nawb ka paox tix, tix kaux lai tix kaux ka pa ngheut pa moh rhawm heue. Kieh pa nhim koe piang pex khawmuik can pa ot ka daux Cao Khrit heue. Amen.