Read kinyarwanda 2 PETRUX 1 Bible Online

2 PETRUX 1 - kinyarwanda bible

2 PETRUX 1

¹Simon Petrux, pa mawh siliex mai kawncau pa ting Yesux Khrit, tawx ka kix, pa hoik pon krax yum rhawm pa awm paox tix, pa mhawm pa ngawh, tau mai ex, ka daux pa rahsee Siyiex ex mai Yesux Khrit Cao Taoh heue.

²Kieh bwanson mai pa nhim baox thien thie ka pex, ka daux pa tawng ka Siyiex mai Yesux heue.

³Sibrawm Nawh Cao hoik tawx ka ex ku ceu khawmuik pa dex dawd mai pa im ju mai pa chix nab yam mai pa yuh pa khaw ka Siyiex, ka daux pa tawng ka Kaw pa hoik kok ex, ka min pakngai mai pa mhawm cie tix heue.

⁴Mawh kheu ceu an tom tawx lox sijax mukheu pa kied ting mai pa ngawh khankix heue. Kheu lox sijax mukheu an khankix, pex tak sang mawh pa neuex mai pa pon ceu pa dex dawd ka tokaux Siyiex, kheu hoik luan khaing pa seeing ceu pa koe ka daux haktiex in kheu alo nex nham heue.

⁵Mawh heue, mawh kheu jao in nied ti coca sonsang baox thien thie pa mhawm mhiem ka krax yum rhawm pex mai pa chix tawng ka pa mhawm an,

⁶mai ka pingnya an, pa jhi pex tokaux tix, pa chix gun yeung mai ka daux pa chix gun yeung pex an, kieh mawh pa chix nab yam mai pa yuh pa khaw ka Siyiex heue.

⁷Ka daux pa chix nab yam mai pa yuh pa khaw ka Siyiex, krax pa moh ka puxaik khankix niet ti yuh krax moh krax rhawm heue.

⁸Grawh grawng nawh phan ceu in khankix mawh cie pex mai chix haok hwan, kix tak ang kieh pex mawh pui nieh mai pa ang chix plix plix, ka daux krax pa tawng ka Simiang ex Yesux Khrit heue.

⁹Viang mawh nan kaw pa ang koe ceu in khankix hoik dug ngai mai chix yaox ngie pa koe dee dex khaing mai hoik piawm grawh grawng pa hoik sigrah phimap pa prim nawh heue.

¹⁰Mawh kheu nan puxaik khankix eue, nie baox nied ti coca, sonsang kieh pa hoik kok mai pa hoik laug pex kaux cong. Grawh grawng nawh phan pex yuh ceu in khankix, pex tak ang lai sideeing caong tix, tix bawg kawx heue.

¹¹Mawh kheu ka daux pa yuh nin, tak sang blon tawx akhwang ka pex son sang laig ka daux meung leeing ju mai Yesux Khrit Cao Taoh ex heue.

¹²Mawh kheu nan aux tak sang rien tokaux tix jheung jheung, son sang kieh pex doh keud ka grawh grawng ceu in khankix, viang pex hoik tawng grawng khankix mai kaux cong ka daux pa mawh meh pa hoik koe tau mai pex heue.

¹³Yam kawn ot kawn koe aux ka daux nyiex gox man in, aux keud aux ce ceu pa sang kieh aux pex doh keud uik khaw heue.

¹⁴Kheu hoik tawng aux bawg yam pa sang peeik aux ti deuh nyiex gox man in nied ti hoek, awm hoik grux jhi Yesux Khrit ka aux heue.

¹⁵Mawh heue, aux tak nied tix coca sonsang pon pex ti doh keud ka grawng ceu in khankix, khaix ang aux koe heue.

¹⁶Yam kieh ex pex tawng grawng sibrawm mai pa hoek Yesux Khrit, ex hoik hawt lox been pa nieb yuh cuyi ti keud ang mawh, viang mawh nan ex mawh pa hoik yaox min pakngai mai pa ting lhaong Nawh Cao ka ngai tix heue.

¹⁷Mawh kheu hoik pon Nawh Cao pa yungyi mai min pakngai khaing Siyiex pa mawh Keeing Cao, yam lih hoek lox ka Nawh khaing pa ting lhaong mai pa ting min pakngai, pa ah nin, “In mawh Kawn pa moh Aux, pa khaw caw rhawm Aux heue,”

¹⁸lox in tokaux ex kawx hoik mhong yam lih hoek khaing raoma, yam ot ex tau mai Nawh Cao ka gawng pa singax singeh heue.

¹⁹Ex hoik koe lox jhai pa hoik yuh nie blon kaux. Pex hoik yuh pa khaw ka pa nghiet pex ka in, awm ka kawk ngu pa jhan riang ka daux dee faik, tom hoek singaix bah riang praix mai simuing griang hoik lih ka daux rhawm pex heue.

²⁰Kieh tawng in phao ka, dee bleeh lox jhai pa koe ka daux phuk lai sigang khri, ang chix pon ti teei lih nong nong heue.

²¹Grawh grawng nawh lox jhai ang sax lih hoek kheu alo kawn pui tix bawg kawx, viang mawh nan Khuan Singax Singeh hoik kieh pui pa singax singeh khankix, krai lox pa kaoh khaing Siyiex heue.