Read kinyarwanda 2 YOHAN 1 Bible Online

2 YOHAN 1 - kinyarwanda bible

2 YOHAN 1

¹Kaw pa riex ju tiiem ti tawx ka bun pa hoik laug mai kawn praix kiex khankix pa moh aux kah tete mai ang joeng mawh ngie aux, viang mawh nan mawh khawm kix khawmuik can pa hoik tawng ka pa mawh meh heue.

²Ex moh pex kheu pa mawh meh pa hoik ot ka daux ex mai pa tak sang ot tau mai ex leeing ju heue.

³Bwanson mai pa caux rhawm mai pa nhim, pa kaoh khaing Siyiex pa mawh Keeing Cao mai khaing Yesux Khrit pa mawh Kawn Keeing Cao, tak sang ot tau mai ex, ka daux pa mawh meh mai krax moh krax rhawm heue.

⁴Aux kied koe krax gaux rhawm kheu hoik yaox aux kawn praix pax tix blah, pa hu ka daux pa mawh meh, awm pa hoik pon ex lox tawm khaing Keeing Cao heue.

⁵Yam in, bun eue, aux khyox ka pax, awm pa tiiem aux lox pingnyap pa khraox ka pa ang mawh, viang mawh nan mawh pa hoik koe ex, khaing tom yam jah, sonsang moh ex ka paox tix heue.

⁶Pa hawt ex khaix lox tawm Nawh khankix, mawh krax moh krax rhawm heue. In mawh lox pingnyap awm pa hoik mhong pex khaing tom yam jah, sonsang hu pex ka daux lox pingnyap an heue.

⁷Grawh grawng nawh pui pie lhen hoik lih hu piang haktiex tom nie, pa mawh kix pa ang kham grawng pa hoek Yesux Khrit ka daux nex nham heue. In mawh kaw pie lhen mai mawh antikhrit heue.

⁸Rien tokaux pex, son ang ceu pa hoik yuh ex khankix sang nai sang grai, viang mawh nan sonsang pon pex bwanson pa grum naog heue.

⁹Pui mawx ang ah pa lheu luan yuh mai ang ot ka daux lox pa gau Cao Khrit, ang lai koe Siyiex mai kaw pa ot ka daux lox gau Cao Khrit, koe khawm Keeing Cao mai Kawn Cao heue.

¹⁰Phan pui tix kaux kaux hoek ka pex pa ang viex lox gau in, paw vi kwan ti rieb nawh laig daux nyiex pex mai paw vi ah lox nawb ka nawh heue.

¹¹Grawh grawng nawh kaw pa nawb bwan ka pui pa yuh nan, hoik kleuk hoik neuex ka daux krax twah klaung ceu pa caox nawh heue.

¹²Viang aux koe grawng ceu sang tiiem tom nie hu ka pex kawx, aux ang rhawm teei rawm nam meug tiiem ka ce, viang mawh nan aux keud pot jun pot ti sang hoek ka pex mai ti sang sikah taing tawx pakngai paox tix, sonsang grum naog krax gaux rhawm pex heue.

¹³Kawn praix puxo cie pax, pa hoik laug khankix, nawb ka pax heue.