Read kinyarwanda YUDAX 1 Bible Online

YUDAX 1 - kinyarwanda bible

YUDAX 1

¹Yudax, pa mawh siliex Yesux Khrit mai pux Yakop tiiem ti tawx ka kix pa hoik kok kah, pa moh Keeing Siyiex kah mai pa hoik priex ka daux Yesux Khrit heue.

²Kieh pa caux rhawm koe ka piang pex mai kieh pa nhim mai pa moh rhawm baox tiien baox thie ka pex heue.

³Pui pa moh aux khankix eue, yam nied aux ti coca ti tiiem lai ka pex grawh grawng krax taoh pa hoik pon ex awm paox tix, hoik kieh aux tiiem ka pex, sonsang gau pex nied ti yuh, nied puing, son krax yum rhawm pa hoik tawx tix bawg son ku jheung jheung ka pui pa singax singeh khankix heue.

⁴Mawh kheu pui tix blah hoik briex ti laig ka sinax pex, pa mawh kix pa hoik grux tiiem grawh grawng pa tak sang prawng sang ciyang kix yuh nin, glang ka dix, pa mawh pui pa ang chix nab yam mai pa yuh pa ang khaw ka Siyiex, kix deeh tieh bwanson Siyiex ti kieh mawh dee du sonsang yuh alo nex nham pa seeing brai mai thiang ti tik Cao ex pa koe tix kaux khaing mai Simiang Yesux Khrit heue.

⁵Viang pex hoik tawng grawh grawng ku ceu khawmuik tix bawg son ku jheung jheung, aux simie ti kieh pex doh deud doh sawn ka grawng khaix hoik taoh Siyiex Leeing ju pui Isarelax khaing meung Ejiptux, khaix an deeh yieh kix pa ang yum rhawm laux heue.

⁶Kawncau Siyiex khankix pa ang priex ti hawt yuh ceu pa kieh kix yuh phao ka, viang mawh nan pa hoik tik grham glawk dee khaw ti ot, Nawh hoik laung ka ceng leeing ju, ka daux pa faik, tom hoek bawg yam sang prawng sang ca, singaix pa ting lhaong an heue.

⁷Awm veng Sawdom mai veng Gawmawrax mai veng khankix pa koe praok sivie veng an ankiex pa chax nie lud vao mai yuh pa lud pa ang lai doh mawh jhawm jheet pui mai kix hoik mawh mhai dee teh rhawm ex kah, pa kham geu pa ciyang daux ngu leeing ju heue.

⁸Awm an pui pa nieb camaox in khankix kawx, yuh tokaux tix seeing brai mai nieb een ti ang koe ceu ka simiang khankix mai nieb ah lox pa salao ka kix pa ting min pakngai khankix heue.

⁹Viang mawh nan yam thung thiang Mikkhelax simiang kawncau Siyiex ka phicaox ka grawh grawng tokaux yum Mose, nawh ang ring ah lox sa lox lao ti deuh pa prawng pa ciyang ka piang nawh, viang mawh nan nawh ah ngie nin, “Kieh Siyiex ah ka maix heue.”

¹⁰Pui in khankix nieb salao ka grawng pa ang kix tawng, viang mawh nan kix chix teei pa lak tawng tix, awm totiag pa ang koe pa chix keud mai kieh tokaux tix laux sium kah heue.

¹¹Kix tak kha rhawm heue, mawh kheu hoik hawt kix daux krax Ka-inax, sonsang pon kix ngawh kix hoik plab ti laig ka daux pa lud Balam mai hoik laux leeing ka daux lox chao Korax heue.

¹²In mawh kix pa mawh simaox pa hoik moh, ka daux pawie krax moh krax rhawm pex, yam ih kix tau mai pex, kix mawh cao liang pa ang lhat ti tawx tokaux tix sawm khaing, kix mawh paiawm pa ang koe rawm, pa tah bhaung hu, kix mawh khaox that lhax pa ang koe plix, pa hoik yum ra bawg, pa hoik reeig ti tik khawm riah.

¹³Kix mawh pukpak rawm sigrit sigra pa he, pa lih bai krax kaig twa tokaux tix, kix mawh simuing pa vung viang, pa faik pa lung hoik priex son kix leeing ju heue.

¹⁴Enawk,pa hoik toe ti koe aliah ju khaix Adam, krai lox jhai in mawh khawm grawng kix, “Jhak heue, yam Simiang hoek tau mai pui singax singeh, cub kaing mheen tix khankix,

¹⁵sonsang prawng sang ca ka pui khawm mu khawm miang mai sonsang kieh pui pa ang chix nab yam mai pa yuh pa ang khaw ka Siyiex ka daux kix khawmuik tawng grawng pa yuh kix pa ang nab ang yam mai pa yuh pa ang khaw ka Siyiex, pa ang kix nab ang yam mai yuh pa ang khaw ka Siyiex mai hoik yuh ka lox pa riex khawmuik, pui ting map pa ang nab yam mai pa yuh pa ang khaw ka Siyiex khankix hoik ah ka Nawh Cao heue.”

¹⁶Pui inkix mawh pui pa riex salao, pa mawh pui brax bleh brax sibriem, pa hawt ti hu khaix alo nex nham tokaux tix mai jheeh kix riex ah lox ting lox vao mai jhak ka pakngai pui sonsang pon tix bwan kah heue.

¹⁷Viang mawh nan pui pa moh aux khankix eue, pex doh keud ka lox pa hoik grux krai kawncau pa ting Simiang ex Yesux Khrit khankix,

¹⁸pa hoik ah nin ka pex, “Yam hoek bawg yam ghoik khaix sax tak koe pui pa map pa ang cee ang cak, pa hu hawt alo nex nham tokaux tix, pa ang nab yam mai pa yuh pa ang khaw ka Siyiex heue.”

¹⁹Pui inkix mawh kix pa kieh cub gwieh paox tix mai pa nieb hawt yuh alo nex nham, pa ang koe Khuan Cao heue.

²⁰Viang mawh nan pui pa moh aux khankix eue, pex yuh pex sum tokaux tix ka piang krax yum rhawm pex pa lang teung singax singeh mai rawg bwan ka daux Khuan Singax Singeh heue.

²¹Kieh tokaux tix ot ka daux krax moh krax rhawm Siyiex mai krox ti jhak son krax caux rhawm Simiang ex Yesux Khrit, tom sidah pon ju leeing ju.

²²Yam thung thiang pui tix blah ka pex, kieh kix tawng dee lud kix sidawng.

²³Grhawm teei ti taoh kix tix blah khaing daux ngu mai piang kix tix blah kieh koe pa caux rhawm tau mai pa lhat pa graung mai viang mawh ka kraung ceep pa kawb pa preeh ka alo nex nham kawx koeng kah heue.

²⁴Yam in ka kaw pa chix pau pex, son ang pex sang sideeing caong tix mai sonsang deuh pex mawh pa loig pa ang koe dee cha, daux pa kied gaux rhawm sivoe min pakngai Nawh Cao,

²⁵pa mawh Siyiex Cao Taoh ex tix kaux khaing, kieh koe min pakngai mai pa ting lhaong mai pa giex kaing uik mai sibrawm, kheu Simiang ex Yesux Khrit, ka sivoe sang koe bawg yam dix mai yam in mai leeing ju liak. Amen.