Read wanga OBUCHACHILO 1 Bible Online

OBUCHACHILO 1 - wanga bible

OBUCHACHILO 1

¹Mukhuchaaka, Nyasaye yalonga likulu nende eshialo.

²Nashio eshialo shishialikhwo nobulonje bwosi bwosi tawe. Shiali butswa eshikhaya. Ne eshiilima shiafuunikha khulusiba lweinyanza. Naye Roho wa Nyasaye yali nabembanga khumaatsi ikulu.

³Nyasaye nalaka ari, “Obulafu bubeho,” ne obulafu nibubaho.

⁴Nyasaye nalola mbu, obulafu nobulayi. Mana Nyasaye niyahukhasia obulafu obwo okhurula khushiilima.

⁵Nyasaye nakulikha obulafu mbu, “Eshiteere,” nashio eshiilima mbu, “Eshilo.” Nibwila, nibushia, eyo niyiba inyanga yambeli.

⁶Mana Nyasaye nalaka ari, “Lekha likulu libeho hakari wamaatsi, mana liahukhasie amaatsi okhurula khukandi.”

⁷Nyasaye nalonga likulu okhwahukhasia amaatsi, akali khushialo okhurula khukali mwikulu, ne nikaba kario.

⁸Khandi Nyasaye nakulikha mumaleesi mbu, “Likulu.” Nibwila, nibushia, eyo niyiba inyanga yakhabili.

⁹Nyasaye nalaka ari, “Lekha amaatsi, akali hasi welikulu kekhung'asie habundu halala, mana eshibala eshiangalafu shibeho.” Kho nikaba kario.

¹⁰Nyasaye nakulikha eshibala eshiangalafu eshio mbu, “Eshialo,” ne habundu aha amaatsi kekhung'asia aho, nahakulikha mbu, “Inyanza.” Mana Nyasaye nalola mbu, nobulayi.

¹¹Khandi Nyasaye nalaka ari, “Lekha liloba limelekhwo emimela, emisaala echiamangakhwo obufwa, nende echiebiamo biachio bilimwo obufwa. Buli mulala okhulondokhana nende imbia yakwo khushialo.” Kho nikaba kario.

¹²Liloba nilimelakhwo emimela, chietsimbia tsiosi. Mana Nyasaye nalola mbu, nobulayi.

¹³Nibwila, nibushia, eyo niyiba inyanga yakhataru.

¹⁴Nyasaye nalaka ari, “Lekha obulafu bube mwikulu, okhwahukhasia eshiteere okhurula khushilo, khandi okhumanyia shinga olwa tsinyanga, emiyika nende amasabo kokhukholela Nyasaye kachaaka.

¹⁵Khandi yakaasia obulafu obwo mbu, bubeho mwikulu, okhukhosia mushialo.” Kho nikaba kario.

¹⁶Mana Nyasaye nalonga ebindu bibili ebikhongo ebiobulafu. Eliuba liokhwakha eshiteere, nakwo omwesi okhwokhwakha mushilo. Khandi nalonga tsing'ining'ini.

¹⁷Kho nabira mwikulu okhwakha khushialo,

¹⁸mbu, biashe eshiteere nende eshilo, nende okhwahukhasia obulafu okhurula khushiilima. Mana Nyasaye nalola mbu, nobulayi.

¹⁹Nibwila, nibushia, eyo niyiba inyanga yakhane.

²⁰Mana Nyasaye nalaka ari, “Lekha amaatsi akomunyanza ketsulemwo ebilonje ebili mwoyo, ebia tsimbia tsinyinji. Khandi nalonga amanyonyi aketsimbia tsiosi mbu, kapulushenje mwikulu.”

²¹Kho Nyasaye nalonga eminyeni emikhongo nende tsimbia tsiosi tsiebindu ebimenyanga mumaatsi, nende tsimbia tsiosi tsiamanyonyi. Mana Nyasaye nalola mbu, nobulayi.

²²Nyasaye nabilaamila ikhabi, ne naboola ari, “Mwibulane nimumeetekha mana mwitsule mumaatsi komunyanza, nako amanyonyi kameeteshe khushialo.”

²³Nibwila, nibushia, eyo niyiba inyanga yakharano.

²⁴Nyasaye nalaka ari, “Lekha eshialo shibemwo tsisolo tsietsimbia tsiosi, etsiokhurukwa nende tsisolo nabulimo, tsikhoongo nende tsindiiti.” Kho nikaba kario.

²⁵Khulweshio Nyasaye yabilonga biosi, ne nalola mbu, biosi nebilayi.

²⁶Mana Nyasaye naboola ari, “Lekha khulonje omundu khwikondo liefwe, okhulondana nende okhufwana khwefwe. Mana babe nobunyali khutsinyeni nende khumanyonyi, nende khutsisolo, nende khubuli shindu eshimoolanga khusialo.”

²⁷Kho Nyasaye nalonga omundu mwikondolie, ne mukhufwanakhwe nabalonga omusaatsa nende omukhasi.

²⁸Mana Nyasaye nabahelesia ikhabi, ne nababoolela ari, “Mwibulane nimumeetekha mana mwitsule khushialo nimushiruka. Mube nobunyali khutsinyeni, nende khumanyonyi, nende khubuli shindu eshichendanga khushialo.”

²⁹Khandi Nyasaye nababoolela ari, “Emuhelesiye inywe buli eshiraache, eshiamanga obufwa, eshili khushialo shiosi nende buli omusaala, okuli nobufwa mushiamo shiakwo. Emuhelesiye mbu, bibe ebienywe khulwa ebiokhulia.

³⁰Natsio tsisolo tsiosi etsiokhushialo, nende khubuli linyonyi nende khubuli shindu eshimoolanga khwiloba nende khubuli shindu shiemiuya chiobulamu, ebihelesiye obunyasi nende emimela chiamasaafu chiosi mbu, bibe eshiokhulia shiabio.” Mana nikaba kario.

³¹Mana Nyasaye nalola mbu, buli shindu eshia yali nalonjile neshilayi muno. Nibwila, nibushia, eyo niyiba inyanga yakhasasaba.