Read wanga OBUCHACHILO 11 Bible Online

OBUCHACHILO 11 - wanga bible

OBUCHACHILO 11

¹Mukhuchaaka, abandu beshialo shiosi basunganga mulimi lulala, ne khandi balinji namakhuwa matiiti.

²Ne olwa abandu bahuuya nibarula ebukwe, boola habundu hashiangalamwe, mushialo shia Babuloni ne nibamenyaho.

³Kho nibaboolelana abeene khu beene bari, “Chende khulonje amatofari mana khukasambe kayie obulayi.” Mana nibaba nende amatofari mushilenje shiamachina nende ihula yokhumbakha.

⁴Kho nibaboola bari, “Chende khwiyumbashile litookho lirambi, eliobutenje bwalio buula mwikulu, mana khwikaasilie eliira kho mbu, khuleshe okhusalaasibwa khushialo shiosi.”

⁵Mana OMWAMI Nyasaye niyekha khushialo, okhulola litookho nende omunaara, ebiabandu abo bali niboombaashe.

⁶Mana OMWAMI Nyasaye naboola ari, “Lola, abandu bano boosi naboluyia lulala, ne khandi baboolanga mululimi lulala. Buno nobuchaachilo butswa obwamakhuwa aka balakhola. Ne libulaho elia balakhaywa okhukhola khu koosi akabenya tawe.

⁷Chende khwishe khutsie aha bali mana khukoyasie aka baboola mululimi lwabwe kho mbu, baleshe okhuhulilisania tawe.”

⁸Kho OMWAMI Nyasaye nabasalaasia buli habundu khushialo, ne nibalekha okhumbakha litookho elo.

⁹Niko akachila litookho elo nililangwa mbu, Babuloni, okhuba niho aha OMWAMI Nyasaye yakoyasiliaho amakhuwa kolulimi lwa abandu boosi. Ne okhuchaachila ebise ebio, yabasalaasia buli habundu khushialo.

¹⁰Bano nibo abolwibulo lwa Shemu. Shemu nali nemiyika eshikhumi shilala, emiyika chibili nichiwele olunyuma lwomuyembo kweifula, yebula Aripakishadi.

¹¹Ne olunyuma lwokwibulwa khwa Aripakishadi, Shemu yamenya emiyika ebikhumi birano, ne niyebula abaana bandi abasiani nabakhaana.

¹²Olwa Aripakishadi yali nemiyika amakhumi kataru nachiraano, yebula Shela.

¹³Olunyuma, Aripakishadi yamenya emiyika chindi ebikhumi bine nachitaru, ne niyebula abaana bandi abasiani nabakhaana.

¹⁴Olwa Shela yali nemiyika amakhumi kataru, yebula Eberi.

¹⁵Olunyuma, Shela yamenya emiyika chindi ebikhumi bine nachitaru ne niyebula abaana bandi abasiani nabakhaana.

¹⁶Olwa Eberi yali nemiyika amakhumi kataru nende chine, yebula Pelegi.

¹⁷Olunyuma, Eberi yamenya emiyika ebikhumi bine namakhumi kataru, ne niyebula abaana bandi abasiani nabakhaana.

¹⁸Olwa Pelegi yali nemiyika amakhumi kataru, yebula Reu.

¹⁹Ne olunyuma lwokhwibulwa khwa Reu, Pelegi yamenya emiyika ebikhumi bibili nende shienda ne niyebula abaana bandi abasiani nabakhaana.

²⁰Olwa Reu yali nemiyika amakhumi kataru nachibili, yebula Serugi.

²¹Olunyuma, Reu yamenya emiyika chindi ebikhumi bibili nende musaafu ne niyebula abaana bandi abasiani nabakhaana.

²²Olwa Serugi yali emiyika amakhumi kataru, yebula Nahori.

²³Olunyuma, Serugi yamenya emiyika chindi ebikhumi bibili ne niyebula abaana bandi abasiani nabakhaana.

²⁴Olwa Nahori yali nemiyika amakhumi kabili nende shienda yebula Tera,

²⁵olunyuma lwokhwibulwa khwa Tera, Nahori yamenya emiyika eshikhumi shilala nende ekhumi nashienda ne niyebula abaana bandi abasiani nabakhaana.

²⁶Olwa Tera yali namenyile emiyika amakhumi musaafu, yebula Aburamu, Nahori, nende Harani.

²⁷Bano nibo abolwibulo lwa Tera. Tera yebula Aburahamu, Nahori nende Harani. Naye Harani yali samwana Loti.

²⁸Harani yafwila mwitookho liabwe elilangwa mbu, Uri, mushialo shia Babuloni, Tera samwana nashiliho mwoyo.

²⁹Mana Aburamu nateeshia Sarai, naye Nahori nateeshia Milika, owali omukhaana wa Harani samwana Milika nende Isika.

³⁰Sarai yali omukumba, shiyalikhwo nomwana tawe.

³¹Tera nabukula Aburamu omusianiwe, Loti omwana wa Harani, ouli omwitsukhuluwe nende Sarai omukhasi wa Aburamu, ouli nyakhufialanyene, ne nibarula Uri, nibatsia okhumenya mushialo shia Kanani. Batsia niboola Harani ne nibamenyayo.

³²Tera yamenya emiyika ebikhumi bibili nachirano ne nafwila mushialo shia Harani.