Read wanga OBUCHACHILO 12 Bible Online

OBUCHACHILO 12 - wanga bible

OBUCHACHILO 12

¹Mana OMWAMI Nyasaye naboolela Aburamu ari, “Rula mushialoshio, eshiabeekhobo, khandi eshia abomunzuyo, otsie mushialo shiandalakhumanyia.

²Ne nasi ndalakhukhola okhuba lihanga likhongo, nende okhukhuhelesia ikhabi, nekhukhola okhuba neifuma ikhongo kho mbu, obe oweikhabi.

³Oukhuhelesia ikhabi, ndalamuhelesia ikhabi, Ne oukhulaama eshilaamo shiobubi, ndalamulaama eshilaamo shiobubi. Ne okhubirira mwiwe nende abolwibulolwo ndalahelesia abandu abetsimbia tsiosi khushialo ikhabi.”

⁴Olwa Aburamu yali nemiyika amakhumi musaafu nachirano, yarula Harani shinga olwa OMWAMI Nyasaye yali namubooleele. Naye Loti natsia ninaye.

⁵Aburamu yabukula Sarai omukhasiwe, omwana womusiani wabwe Loti nende emiandu chiabwe chiosi nende abasumba ba bali nibanyoola mushialo shia Harani, ne nibatsia mushialo shia Kanani. Olwa bali niboolile mushialo shia Kanani,

⁶Aburamu yabura mushialo eshio niyoola khumusaala omukhongo, okwalangwa mbu, omuruba kwa More, okwali mwitookho lia Shekemu. Mutsinyanga etsio, Abakanani nibo abali nibamenya mushialo omwo.

⁷Mana OMWAMI Nyasaye namuloleshela Aburamu, ne namuboolela ari, “Ndakhahelesie abolwibulolwo eshialo shino.” Kho Aburamu niyombashila OMWAMI Nyasaye, owali namulolesheele eshimalilo eshiemisango.

⁸Narulayo natsia khushikulu, ebukwe wa Beteli mana nasimikhayo ikambiye hakari wa Betseli niyili khulubeka lwomumbo walio, nende Ai niyili elubeka webukwe walio. Khandi niyombashilaho OMWAMI Nyasaye eshimalilo shiemisango ne namwinamila.

⁹Mana Aburamu natsiililila okhutsia nachoomile Negebu.

¹⁰Mutsinyanga etsio, inzala ikhongo yaliho mushialo shia Kanani. Kho Aburamu nakholomokha natsia Misiri mbu, akhole nashimenyayo, shichila inzala eyo yali indulu muno.

¹¹Olwa yali nali ahambi okhwinjila Misiri yaboolela Sarai omukhayewe ari, “Emanyile mbu, oli owelikondo lilayi muno.

¹²Ne olwa Abamisiri balakhulolakhwo, balaboola bari, ‘Uno niye omukhasiwe,’ ne balanzira isie, nawe nibakhulekhaho mwoyo.

¹³Kho obaboolele mbu, oli omukhaana wefwe, ne khulwa iwe, shibalanzira ta habula balaakholela akali amalayi.”

¹⁴Ne olwa Aburamu yenjila Misiri, Abamisiri balola mbu, Sarai yali owelikondo lilayi muno.

¹⁵Ne olwa abakhulundu bomuruchi wa Misiri balola Sarai, bamufumia khumuruchi. Kho nibayila Sarai munzu yomuruchi.

¹⁶Ne khulwa Sarai, omuruchi yakholela Aburamu akali amalayi, namuhelesia emiruko chiamakondi, tsing'ombe, tsisishili tsisaatsa netsikhasi nende abakholi beshisaatsa nende abeshikhasi nende tsingamia.

¹⁷Nebutswa khulwokhuba omuruchi yali nabukuule Sarai omukhasi wa Aburamu, OMWAMI Nyasaye yareerera omuruchi nende abomunzuye amatinyu.

¹⁸Kho omuruchi nalanga Aburamu, ne namureeba ari, “Nishiina eshia ukholeele shino? Mbushiina nolamboolela mbu, nomukhasiwo?

¹⁹Mbushiina noboola ori, ‘Nomukhaana wefwe.’ Nasi nemubukula okhuba omukhasi wanje? Bulaano omukhasiwo ngwoyo, mubukule otsie ewotsia.”

²⁰Mana omuruchi nalaka abandube mbu, baboolele Aburamu, omukhasiwe nende emianduchie chiosi, barule mushialoshie batsie.