Read wanga OBUCHACHILO 13 Bible Online

OBUCHACHILO 13 - wanga bible

OBUCHACHILO 13

¹Kho Aburamu narula Misiri natikulukha natsia Negebu halala nende omukhasiwe, Loti nende emianduchie chiosi.

²Mutsinyanga etsio, Aburamu yali omuyinda muno. Ne khandi yali nemiruko chietsing'ombe, amakondi, tsimbusi halala nende ifeetsa neitsahabu.

³Mana natsiililila noluchendo okhurula Negebu okhuula Betseli, ewa yali niyasimiishe ikambiye olwambeli, hakari wa Betseli nende Ai.

⁴Mana namwinamila OMWAMI Nyasaye, aha yali niyombakha eshimalilo eshiemisango olwambeli.

⁵Loti yesi yali nende emiandu chiamakondi, tsimbusi, tsing'ombe nende abeinzuye namaheemake.

⁶Khulweshio, olwayilo olwo niluba oluleemu, olwa boosi, Aburamu nende Loti balanyala okhumenyamwo halala tawe, shichila bali nende emiruko eminji.

⁷Ne obusoolo bwamala bubeho hakari wabaayi bemiruko chia Aburamu nende abemiruko chia Loti. Mutsinyanga etsio, Abakanani nende Abaperisi bali nibamenya mushialo eshio.

⁸Mana Aburamu naboolela Loti ari, “Isie ninawe khuli abekho, ne shinobulayi abaayi bemiruko chianje nende abemirukochio basoolanenje tawe.

⁹Khulweshio chenda khukabukhane. Henga omukunda okuli imbeliwo okwo kwosi! Mana wawule, noba niwenya okhutsia khumukhono mukhasi, nasi ndalatsia khumukhono musaatsa. Ne noba notsia khumukhono musaatsa, nasi ndalatsia khumukhono mukhasi.”

¹⁰Mana Loti nachinguula tsimonitsie nahenga tsimbeka tsiosi, ne nalola mbu, libanda lia Yorodani okhuula Zoari liali namaatsi amanji shinga omukunda kwa Edeni, okwa OMWAMI Nyasaye, khandi shinga omukunda kwa Misiri (Kano kekholekha olwa OMWAMI Nyasaye yali nashili okhumulula amatookho ka Sodomu nende Gomora).

¹¹Mana Loti niyeyahulila libanda lia Yorodani liosi, ne nahuuya natsia ebukwe. Nolwa babili abo bakabukhana bario.

¹²Aburamu yatong'a namenya mumukunda kwa Kanani, ne Loti naye namenya mumatookho komwibanda, ne nasitia liheemalie okhuula ahambi nende litookho lia Sodomu.

¹³Nabo abandu ba Sodomu bali abamayanu khandi abonooni imbeli ewa OMWAMI Nyasaye.

¹⁴Olunyuma lwokhukabukhana khwa Loti nende Aburamu, OMWAMI Nyasaye yaboolela Aburamu ari, “Chinguula tsimonitsio mana ohenje tsimbeka tsiosi okhurula aha oli yaho, emasaba, emulambo, ebukwe nende mumbo.

¹⁵Eshialo shiololanga eshio, ndalakhuhelesia iwe nende abolwibulolwo. Shilaba eshienywe emiyika chiosi.

¹⁶Ndalakhola olwibulolwo lube olunji khushialo shinga omuyeshe, olulanyala okhubasibwa tawe.

¹⁷Buukha olambuule oburambi nende obuchiikha bwomukunda tsana okhuba ndalakhuhelesia kwosi.”

¹⁸Khulweshio, Aburamu yahuuyia liheemalie ne natsia okhumenya ahambi nende emiruba chia Mamure, echiali Heburoni ne niyombashilaho OMWAMI Nyasaye eshimalilo shiemisango.