Read wanga OBUCHACHILO 14 Bible Online

OBUCHACHILO 14 - wanga bible

OBUCHACHILO 14

¹Mutsinyanga tsia Amurafeli yali omuruchi wa Babulonia, Arioko omuruchi wa Elasari, Kedorilaomeri omuruchi wa Elama, nende Tidali omuruchi wa Goimu,

²baseera Bera, omuruchi wa Sodomu, Birisha omuruchi wa Gomora, Shinabu omuruchi wa Adima, Shemeberi omuruchi wa Zeboimu nende omuruchi wa Bela (noho Zoari).

³Abaruchi barano abo, bahambaania abamahe babwe halala mwibanda lia Sidimu, (nilio inyanza eyilangwa mbu, Eyomunyu).

⁴Khulwa emiyika ekhumi nachibili, bali abakhalabani ba Kedorilaomeri, nebutswa mumuyika kwekhumi nakhataru, bamukalukhanakhwo nibamufukula.

⁵Omuyika kwekhumi nakhane, Kedorilaomeri nende abamahe babaruchi bashie bahula Abarefahimu mu Ashaterotsi Karinaimu, khandi nibahula Abazuzumu mushialo shia Hamu, Abaemimu mushiangalamwe shia Kiriatsaimu.

⁶Khandi nibahula Abahori mubikulu bia Edomu, nibabalonda okhuula Eleparani, eyili khundulo khweshitsiimi.

⁷Kho nibashiukhana niboola Enimishipati (niyo Kadeshi). Nibahula eshialo shia Abamaleki nende Abamori, abamenyanga Hazazoni Tamari.

⁸Mana abaruchi ba Sodomu, Gomora, Adima, Zeboimu nende Bela (niyo Zoari) nibemanula, nibeetsa mwibanda mwa Sidim.

⁹Nibakhupana lihe nende Kedorilaomeri omuruchi wa Elamu, Tidali wa Giomu, Amurafeli wa Babulonia nende Arioki wa Elasari. Lihe liabaruchi barano khu banane.

¹⁰Libanda lia Sidimu elo liali namatikho amanji akeihula, khulweshio, olwa abaruchi ba Sodomu nende Gomora bali nibelukhanga, abandi khubo bakwamwo, nebutswa abandi beelushila mushikulu okhuhonokokha.

¹¹Kho abasuku abo nibayaaya emiandu chia Sodomu nende Gomora chiosi, nende ebiokhulia ebialimwo biosi ne nibarulaho nibatsia.

¹²Khandi babukula Loti omwana womusiani wabwe Aburamu, owamenyanga Sodomu, nibabukula halala emianduchie chiosi ne nibatsia.

¹³Mana omundu mulala, owali nahonokooshe okhurula mumakhono kabaruchi abo, yetsa naboolela Aburamu, Omuheburania wali niyamenya ahambi nende emiruba chia Mamure, khandi naboolela Omuamori, owali omusiani wabwe Eshekoli nende Aneri, abali nibakhola indakano nende Aburamu okhumunga omukhono.

¹⁴Olwa Aburamu yahulila mbu, batiilile omwikhowe Loti, yakhung'asia abelihebe ebikhumi bitaru nende ekhumi namunane, ne nabalondachila okhuula Dani.

¹⁵Ne mushilo, yakabula abandube belihe mumikanda, nibelukhasia abasuku ne nibabahula. Aburamu nabelukhasia okhuula Hoba, litaala elili emasaba wa Damasiko.

¹⁶Mana nabanunula nende okhuchelesia emiandu chiali nichiyayilwe chiosi. Nachelesia Loti nabakhasibe, emianduchie nende abandu bandi boosi abali nibatiililwe.

¹⁷Olwa Aburamu yachelela okhurula mwihe, omwa yali nahulile Kedorilaomeri khandi nahulile abaruchi bandi, omuruchi wa Sodomu yarula natsia okhumwakaanila mwibanda lia Shawe (elilangwa khandi mbu, Libanda elia Omuruchi).

¹⁸Kho Melikizedeki, owali omuruchi wa Salemu khandi omwisaaliisi wa Nyasaye Omukhongo Muno, yareerera Aburamu omukaate nende idivai,

¹⁹namulaamila tsikhabi naboola ari, “Nyasaye Omukhongo Muno, owalonga likulu nende eshialo, ahelesie Aburamu tsikhabi!

²⁰Nyasaye Omukhongo Muno, owakhunyalila okhuhula abasukubo, yeetsoomibwe!” Mana Aburamu namuhelesia Melikizedeki eshitonye shielikhumi shiokhubindu biosi ebia yachelesia.

²¹Mana omuruchi wa Sodomu naboolela Aburamu ari, “Tong'a nemiandu chioyayile echio, nebutswa ungalusilie abandu banje boosi.”

²²Nebutswa Aburamu yamukalusia naboola ari, “Nditsuba imbeli ewa OMWAMI Nyasaye, Omukhongo Muno, omulonji welikulu nende eshialo

²³mbu, shienyala okhubukula eshindu shiosi shiosi eshishio kata oluusi noho olutsaha lweshilaaro tawe, wakhetsukhana waboola ori, ‘Nisie ouyindihasiye Aburamu.’

²⁴Shindalabukulakhwo eshindu shiosi shiosi ta, habula ebiokhulia ebiabandu banje barumishiile. Khandi oleshe abetsa banje Aneri, Eshikoli nende Mamure babukule omukabo kwabwe.”