Read wanga OBUCHACHILO 15 Bible Online

OBUCHACHILO 15 - wanga bible

OBUCHACHILO 15

¹Olunyuma lwamakhuwa ako koosi, OMWAMI Nyasaye yaboolela Aburamu mwilolelo ari, “Shiolaria ta, ndalakhushingachilila okhurula khubutinyu, khandi ndalakhuhelesia eshihaanwa eshikhongo muno.”

²Nebutswa Aburamu yakalusia naboola ari, “Iwe OMWAMI Nyasaye, eshihaanwashio shilaba nende obukhonyi shiina khwisie, olwa emba nembula abaana? Omulaame wemiandu chianje nomusumba wanje, Eleazari wa Damasiko yemyene.

³Shiwayambelesiakhwo omwana ta. Khulweshio omusumba, owebulilwa munzu wanje niye owakhabe omulaame wemiandu chianje.”

⁴Mana OMWAMI Nyasaye namukalusia naboola ari, “Omusumbawo Eleazari shiyakhabekhwo omulaame wemianduchio ta, habula omwanawo mwene niye owakhabe omulaame wemianduchio.”

⁵Mana OMWAMI Nyasaye namurusia elwanyi ne namuboolela ari, “Henga mwikulu mana obasiekhwo tsing'ining'ini noba nonyala okhutsibasia. Obolwibulolwo bakhabe abanji bario butswa.”

⁶Mana Aburamu nasuubila mu OMWAMI Nyasaye, naye OMWAMI Nyasaye nasaangasibwa ninaye khandi namufuchilila.

⁷Mana OMWAMI Nyasaye naboolela Aburamu ari, “Nisie OMWAMI Nyasaye owakhurusia mu Uri, litookho lia Babuloni, okhukhuhelesia eshialo shino mbu, shibe eshishio.”

⁸Mana Aburamu namureeba ari “Iwe OMWAMI Nyasaye, ndakhamanya endie mbu, eshialo shino shiakhabe obulaame bwanje?”

⁹Naye OMWAMI Nyasaye namukalusia ari, “Ndeerera ing'ombe imoosi yemiyika chitaru, imbusi isubini, eyemiyika chitaru, likondi limiiku liemiyika chitaru nende lihusi nende likuuku libuukha.”

¹⁰Mana Aburamu namureerera ebindu ebio biosi, nabiarasiamwo hakari, ne narechekha ebitonye ebio mumikhosi chibili nibihengaane. Habula amanyonyi ako shiyakakhalakamwo hakari tawe.

¹¹Ne, buli olwa tsingosia tsiayeelanga khu inyama eyo, Aburamu yatsilondanga.

¹²Olwa eliuba liali niliyeelanga, Aburamu yakona tsindoolo tsinyinji muno, ne eshialo nishiilima ti, mana oburi nibumutiila.

¹³OMWAMI Nyasaye naboolela Aburamu ari, “Omanye toto mwene mbu, obolwibulolwo bakhabe ababiri mushialo shilali eshiabwe ta, khandi bakhabe abasumba nibasandibwa khulwemiyika ebikhumi bine (400).

¹⁴Nebutswa ndilihaana eshinyasio eshikhongo khwihanga eliakhabasandie, ne olunyuma bakhakalushe ewabwe nende emiandu eminji.

¹⁵Ne iwe mwene wakhamenye emiyika eminji, mana wakhafwe ne noyabilwa mumulembe.

¹⁶Abolwibulolwo lwakhane bakhachelele hano, shichila nilwo olwa Abamori bakhabe nibakholile obwonooni obuhela okhuheebwa eshinyasio.”

¹⁷Mana olwa eliuba liali niliakhayeela eshialo nishiakhelima, inyungu yomulilo niyituumanga omwosi nende eshichienga nishiakhanga omulilo, biabira hakari webitonye bieyinyama ebio.

¹⁸Mana ebise ebio OMWAMI Nyasaye nakhola indakano nende Aburamu ne naboola ari, “Esuubisia okhuhelesia abolwibulolwo eshialo shino, okhurula khumwalo kwa Misiri okhuula khumwalo omukhongo kwa Yufurate,

¹⁹halala nende eshialo eshia Abakeni, eshia Abakenizi, eshia Abakadamoni,

²⁰eshia Abahiti, eshia Abaperisi, eshia Abarefahimu

²¹eshia Abamori, eshia Abakanani, eshia Abagirigashi nende eshia Abayebusi.”