Read wanga OBUCHACHILO 16 Bible Online

OBUCHACHILO 16 - wanga bible

OBUCHACHILO 16

¹Sarai omukhasi wa Aburamu shiyali niyebulilakhwo Aburamu omwana tawe. Nebutswa Sarai yali nomukholiwe omukhaana, Omumisiri oweliira mbu, Hagari.

²Kho Sarai naboolela Aburamu ari, “Bulaano OMWAMI Nyasaye yanzikaliile okhwibula abaana, tsia okone nomukholi wanje oyo haundi ndakhetsukhana ndanyoolakhwo abaana okhubirira muye.” Mana Aburamu nafuchilila aka Sarai yamuboolela.

³Kho olwa Aburamu yali namenyile emiyika ekhumi mushialo shia Kanani, omukhasiwe Sarai yabukula Hagari, omukholiwe omumisiri oyo, ne nahelesia Aburamu omusaatsawe mbu, abe omukhasiwe.

⁴Mana Aburamu nakona nende Hagari, naye Hagari nahela inda. Ne olwa yalola mbu, ahelile inda, yalechelesia Sarai.

⁵Kho Sarai naboolela Aburamu ari, “Amabi kekholeelwe kano kakhoya okhuba khwiwe! Ndakhuhelesia omukholi wanje okhukona ninaye, ne olwa yalola mbu, ahelile inda ne nachaaka okhundechelesia. OMWAMI Nyasaye akhoya yakhalaka okhumanya omubi hakari wanje ninawe!”

⁶Nebutswa Aburamu yaboolela Sarai ari, “Omukholiwo ali hasi wobunyalibwo. Mukholekhwo shinga olwochama.” Kho Sarai nakholela Hagari amakhuwa amabi, nikachila Hagari niyelukha namurulakhwo.

⁷Omumalaika owa OMWAMI Nyasaye nanyoola Hagari mushitsiimi khusebele yamaatsi, eyali khunjila eyitsia Shuri,

⁸Mana omumalaika oyo namureeba ari, “Hagari, omukholi wa Sarai, okharula heena, ne khandi okhatsia heena?” Naye Hagari namukalusia naboola ari, “Ndilukhanga okhurula khu Sarai, oomwami wanje.”

⁹Omumalaika oyo naboolela Hagari ari, “Kalukha khumwamiwo Sarai mana omuhulile.”

¹⁰Omumalaika owa OMWAMI Nyasaye namuboolela khandi ari, “Enzia okhwinjiyia muno abandu bolwibulolwo mbu, babe abanji abalanyala okhubalwa tawe.”

¹¹Khandi omumalaika oyo nameeta okhumuboolela ari, “Oli nomwana munda, ne olebula omwana omusiani. Olamukulikha mbu, Ishimaeli shichila OMWAMI Nyasaye ahuliile okhuhaabakhwo.

¹²Ishimaeli yakhamenye yenyene mushitsiimi shinga isishili nabulimo. Aliba omusuku wa buli mundu, ne buli mundu aliba omusukuwe. Ne alimenya mubusuku niyasilana nabaana babwe boosi.”

¹³Mana Hagari niyereeba omwene ari, “Toto mwene endutsi Nyasaye ne eshili mwoyo?” Kho Hagari nakulikha OMWAMI Nyasaye awaboola ninaye mbu, “Nyasaye oulolanga.”

¹⁴Khulweshio, liyabo elo liakulikhwa mbu, Beeri Laharoyi[4] lili hakarikari wa Kadeshi nende Beredi.

¹⁵Mana Hagari niyebulila Aburamu omwana omusiani, naye Aburamu nakulikha omwana wa Hagari yamwibulila oyo eliira mbu, Ishimaeli.

¹⁶Aburamu yali emiyika amakhumi munane nende chisasaba, olwa Hagari yamwibulila Ishimaeli.