Read wanga OBUCHACHILO 17 Bible Online

OBUCHACHILO 17 - wanga bible

OBUCHACHILO 17

¹Olwa Aburamu yali nemiyika amakhumi shienda nende shienda, OMWAMI Nyasaye yamuloleshela ne namuboolela ari, “Isie nisie Nyasaye Owobunyali Bwosi. Buli lwosi okholenje amalayi imbeli wanje ne khandi obe omulunjishi.

²Ne ndalakhola indakano hakari wanje ninawe khandi ndalenjiyia abolwibulolwo.”

³Mana Aburamu niyenamia obwenibwe hasi, ne Nyasaye namuboolela ari,

⁴“Ekhola indakano yanje hakari wanje ninawe ne wakhabe samwana abamahanga abanji.

⁵Eliiralio shililaba Aburamu[5] ta, nebutswa lilaba Aburahamu[6]shichila ekhukholile iwe okhuba samwana amahanga amanji.

⁶Ndalakhuhelesia olwibulo lwabandu abanji, ne abandi khubo baliba abaruchi.

⁷Ndalatinyisia indakano eya ndakhola hakari wanje ninawe, nende abolwibulolwo, nende abakhetse olunyumalwo mubisoni biabwe biosi, okhuba indakano yemiyika chiosi, mbu isie embe Nyasayewo khandi Nyasaye wabolwibulolwo olunyumalwo.

⁸Khandi ndilikhuhelesia iwe nende abolwibulolwo abetsa olunyumalwo eshialo shino, eshia iwe olimwo omucheni. Eshialo shia Kanani shiosi shiliba eshiabolwibulolwo emiyika chiosi, ne khandi ndiliba Nyasaye wabwe.”

⁹Mana Nyasaye naboolela Aburahamu khandi ari, “Ne khulwa iwe nende abolwibulolwo abetsa olunyumalwo munzibulo tsiabwe tsiosi, okhuula mulinde indakano yanje.

¹⁰Ino niyo indakano yanje eya iwe nende abolwibulolwo, abetsa olunyumalwo mukhoyile mbu, mwesi muchilinde. Buli mundu weshisaatsa mwinywe okhuula ashebwe.

¹¹Mulashebwa khulwa okhukhalaka lifunga. Ne eshio nishio eshilaba eshilolelo shieindakano yanje ninenywe.

¹²Buli omwana omusiani mwinywe owetsinyanga munane okhuula ashebwe. Buli omundu weshisaatsa mwinywe, abe omusumba owebulilwa mungo wenywe noho owakulwa amapesa okhurula khubarende,

¹³buli mundu mwinywe okhuula ashebwe. Ne shino shilaba eshilolelo khumibili chienywe mbu, indakano yanje ninenywe yibe yemiyika chiosi.

¹⁴Omundu weshisaatsa yesi yesi oulashebwa ta, alarusibwa muboluyia lwanje, okhuba alaba nafunaache indakano yanje.”

¹⁵Khandi Nyasaye naboolela Aburahamu ari, “Nawe shiolalangakhwo omukhasiwo eliira mbu, Sarai tawe, nebutswa okhurula bulano alalangwa mbu, Sara.

¹⁶Ndalamuhelesia ikhabi ne khandi ndalakhuhelesia omwana omusiani okhubirira muye. Ndalahelesia Sara ikhabi ne alaba nyinamwana amahanga. Abaruchi babandu okhuula balirula muye.”

¹⁷Mana Aburahamu niyenamia obwenibwe hasi ne natsekha niyereeba mumwoyokwe ari, “Mana omusaatsa ouli nemiyika eshikhumi shilala yakhebula omwana? Mana Sara nali nemiyika amakhumi shienda yakhebula omwana?”

¹⁸Mana Aburahamu nareeba Nyasaye ari, “Mbushiina nolalekha Ishimaeli yabukula obulaame bwanje?”

¹⁹Naye Nyasaye nakalusia Aburahamu ari, “Ta, Sara omukhasiwo alakhwibulila omwana omusiani, ne olimukulikha eliira mbu, Isaka.[7] Ndiliralisia indakano yanje nende omwana oyo nende abolwibulolwe inziayo, khandi ndakhachikhole okhuba indakano yemiyika chiosi.

²⁰Ne embuliile akosabile okhulondokhana nende Ishimaeli. Lola, ndalamuhelesia ikhabi khandi ndalakhola aboluyialwe okhuba abanji muno. Yakhabe samwana abaruchi ekhumi nababili khandi ndakhamukhole okhuba lihanga likhongo.

²¹Nebutswa ndalatinyisia indakano yanje nende Isaka, owa Sara alakhwibulila iwe, khubise shinga bino omwika kwitsa.”

²²Olwa Nyasaye yamala okhuboola nende Aburahamu, yarulaho nalekhana nende Aburahamu.

²³Naye Aburahamu nabukula Ishimaeli omusianiwe, nende abasumbabe boosi, abali nibebulilwa munzuwe nende aba yali niyakula namapesake. Inyanga eyo Aburahamu yasheba buli oweshisaatsa yesi yesi owali munzuye shinga olwa Nyasaye yali namubooleele.

²⁴Olwa Aburahamu yashebwa, yali nemiyika amakhumi shienda nende shienda.

²⁵Naye Ishimaeli omusianiwe yashebwa nali nemiyika ekhumi nachitaru.

²⁶Aburahamu nende Ishimaeli omusianiwe bashebwa khunyanga ndala eyo,

²⁷khandi abeshisaatsa beinzu ya Aburahamu, abebulilwa munzuye nende abakulwa okhurula khubacheni, boosi bashebwa halala ninaye.