Read wanga OBUCHACHILO 18 Bible Online

OBUCHACHILO 18 - wanga bible

OBUCHACHILO 18

¹Mana Nyasaye naloleshela Aburahamu hamisaala chiemiruba chia Mamure, olwa yali niyekhaale hamuliango kweliheemalie mushiteere.

²Aburahamu yachinguula tsimonitsie nahenga ikulu, ne nalola abasaatsa bataru nibasinjiile imbeliwe. Olwa yabalola, yarekukha tsimbilo okhurula hamuliango weliheema, natsia okhubaakanila ne niyenamia obwenibwe okhuula hasi,

³ne naboola ari, “Abaami banje, nimuchama mulaabure butswa khwitaala lianje nimulasinjilakhwo ta. Endi hano khulwa okhumukhalabanila inywe.

⁴Leshe emureererekhwo amaatsi matiiti mwosiekhwo ebilenje bienywe, kandi mwikhalekhwo mushiinikha shiomusaala muhuluushe.

⁵Olwa mulaba nimushihuluukhanga, ndalabareererakhwo eshiokhulia shitiiti mulie kho mbu, muyoole amaani kokhutsiililila noluchendo lwenywe, okhuba muli abacheni banje isie omukhalabani wenywe.” Kho nibamuboolela bari, “Khola shinga lwoboolile.”

⁶Mana Aburahamu niyenjila mwiheema matetekhana nende okhuboolela Sara ari, “Kaasiakhwo ebichelo bitaru ebiobusie obunyushe, onyoobe bwangu, mana okaasiekhwo emikaate.”

⁷Khandi Aburahamu niyelukha natsia mubiayobie, nabukulamwo eshimoosi eshinefu khandi eshilayi ne nahelesia omukholiwe, owashikaasia matetekhana.

⁸Mana Aburahamu nabukula amabeele aketsikubuli nende amabeele amayu nende inyama yeshimoosi, eya yali nakaasiye ne nababarenjeshelaho. Mana nasinjila ahambi ninabo mushiinikha shiomusaala, nabo nibalia eshiokhulia.

⁹Nibamureeba bari; “Sara omukhasiwo ali heena?” Naye nabakalusia ari, “Ali mwiheema.”

¹⁰Mulala khubo namuboolela ari; “Toto mwene khushise shinga shino omuyika kwitsanga, nenjelele, okhukhukoonya, ne omukhasiwo nabe nali nomwana omusiani.” Naye Sara yali narechelesinjia, nali mubwinjililo bweliheema, inyuma wa Aburahamu.

¹¹Aburahamu nende Sara bali abakofu muno, naye Sara yali niyabisia emiyika chiokhwibula omwana.

¹²Kho Sara natsekha omwene naboola ari, “Kho olwa ndamala okhukofula khandi omusaatsa wanje yesi nomukofu, mana enyala okhusaangaasia omubili toto?”

¹³Nyasaye nareeba Aburahamu ari, “Mbushiina Sara natseka nende okhuboola ari, ‘Ndakhanyala toto okhwibula omwana bulano olwa endi omukofu?’ ”

¹⁴“Shilikhwoho eshindu shiosi shiosi eshitinyu muno eshinyala okhukhaya Nyasaye? Mubise ebiahule, Sara yakhebule omwana omusiani.”

¹⁵Nebutswa Sara yekaana naboola ari, “Isie shienzeshile ta.” Okhuba yali nariire. Ne omumalaika namuboolela ari; “Iwe otseshile.”

¹⁶Mana abasaatsa abo nibarulaho nibatsia habundu habanyala okhulola Sodomu. Naye Aburahamu natsia ninabo okhubakooba khunjila.

¹⁷Nyasaye niyereeba ari, “Shindalabisa aka endi hambi okhukhola, okhurula khu Aburahamu tawe.

¹⁸Abolwibulolwe bakhabe abakhongo khandi abamaani, ne okhubirila muye, ndakhalaamile amahanga koosi ikhabi.

¹⁹Ndamwaahule ye kho mbu, anyale okhutsuuba abaanabe nende abolwibulolwe abetsa olunyumalwe, okhumbulila nende okhukhola akobulunjishi nende ookhukhola akobukhalachi bwa habwene. Ne nibaba nibakhola bario, nasi ndalareerera Aburahamu aka ndamusuubisia.”

²⁰Khandi OMWAMI Nyasaye naboola ari, “Okhuba okhwiyiniakana khwabandu beyiniakananga khu Sodomu nende Gomora nokhunji muno, khandi obwonooni bwabwe nobunji muno,

²¹ndaleekha mana enzie endole nikaba mbu, okhwiyiniakana khwabwe nokhwa habwene noho tawe. Ne nikaba kalali kario ta, khandi ndalamanya.”

²²Kho abasaatsa babili abo nibashiukhana nibachaaka okhutsia nibachoomile Sodomu. Nebutswa Aburahamu yatong'a nasinjiile nende OMWAMI Nyasaye.

²³Mana Aburahamu nasita ahambi, ne nareeba OMWAMI Nyasaye ari, “Toto nomululile abalunjishi mubamayanu noho?

²⁴Abandu abalunjishi nibaba nibalikhwo mwitookho omwo abaheela amakhumi karano, kho bulano oba nomulule habundu tsana ne nolekha okhuhonokosiaho khulwa abalunjishi abo amakhumi karano abalimwo?

²⁵Toto, shionyala okhumulula ababula eshikha halala nende abali neshikha ta. Shikanyalikha tawe! Shionyala okhukhola orio tawe. Noba nokhola orio, ababula eshikha baba balaheebwa eshinyasio halala nende ababula eshikha. Shikanyalikha kario tawe. Omuyaasi weshialo shiosi okhuula akhalache eshiina munjila ya habwene.”

²⁶Mana OMWAMI Nyasaye namukalusia ari, “Nemba nenyoola abandu abalunjishi abaheela amakhumi karano mwitookho lia Sodomu, ndalahonokosia litookho liosi khulwabwe.”

²⁷Aburahamu namukalusia naboola ari, “OMWAMI Nyasaye, umbeele tsimbabasi, okhuba isie endi butswa omundu namundu, ne shiekhoyile okhukhuboolela eshindu shiosi shiosi tawe.

²⁸Ne nikakhaba mbu, khubandu amakhumi karano abo, baleemakhwo barano, oba nomulule litookho elo liosi shichila mbu, barano babulakhwo?” Naye Nyasaye namukalusia naboola ari, “Nimba ninyoolamwo abandu amakhumi kane nabarano, ababula eshikha, shiemba ndalamulula litookho elo tawe.”

²⁹Aburahamu namureeba khandi ari, “Ne nikaba mbu, abandu amakhumi kane banyoolekhamwo?” Nyasaye namukalusia ari, “Khulwa abandu amakhumi kane ababula eshikha abo, shindalimulula tawe.”

³⁰Mana Aburahamu naboola ari, “Iwe OMWAMI Nyasaye, shiolasinyishila tawe. Nikakhaba mbu, abandu amakhumi kataru banyoolekhamwo?” Naye Nyasaye namukalusia ari, “Nimba ninyoolamwo abandu amakhumi kataru, shindalalimulula tawe.”

³¹Aburahamu naboola ari, “OMWAMI Nyasaye, umbeele tsimbabasi, okhuba ndiyahuliile omwene okhuboola. Nikakhaba mbu, abandu amakhumi kabili banyoolekhamwo?” OMWAMI Nyasaye namukalusia naboola ari, “Khulwa abandu amakhumi kabili ababula eshikha abo, shindalalimulula tawe.”

³²Khandi Aburahamu naboola ari, “Iwe OMWAMI Nyasaye, shiolaasinyishila ta, nebutswa ndalaboola khandi lulala lwonyene. Ne nikakhaba mbu, abandu ekhumi banyoolekhamwo?” OMWAMI Nyasaye namukalusia naboola ari, “Khulwa abandu ekhumi, ababula eshikha abo, shindalalimulula tawe.”

³³Mana olwa OMWAMI Nyasaye yali niyakhamala okhuboola nende Aburahamu, yarulaho natsia, naye Aburahamu nakalukha ingowe.