Read wanga OBUCHACHILO 19 Bible Online

OBUCHACHILO 19 - wanga bible

OBUCHACHILO 19

¹Olwa Abamalaika babili abo betsa Sodomu khungoloobe, Loti yali niyekhaale mushiliibwa shielitookho elo. Olwa Loti yabalola, yabuukha okhubaakaanila niyenamia obwenibwe okhuula hasi,

²ne naboola ari, “Abaami banje, emusaaya mbu, mukotoshe mwinjilekhwo munzu wanje, mwiyalisiemwo mushilo khandi mwiyosiekhwo ebilenje bienywe, kho munyalilwe okhubuukha mumabwibwi nimutsia khuluchendo lwenywe.” Nabo nibamukalusia nibaboola bari, “Ta, lekha butswa khutsie, eshilo khuleyalisia khumihanda chielitookho lino.”

³Nebutswa Loti yabasaaya obutinyu, mana nibakotokha nibatsia ninaye ewuwe, nibenjila munzuwe, naye nabarecheshela lisabo, nakaasia omukaate kubulamwo limela ne nibalia.

⁴Nebutswa olwa abacheni abo bali nibalashieyalisia ta, abasaatsa belitookho lia Sodomu, abaraaka nende abakofu boosi halala, babotokhana inzu.

⁵Mana nibalanga Loti, nibamureeba bari, “Abasaatsa betsile ewuwo eshilo shino bali hena? Bayinie elwanyi okhureerere kho mbu, khubakone.”

⁶Loti narula elwanyi, niyekalaho omuliango inyumawe,

⁷ne naboola ari, “Baana befwe, emusaaya mbu, mulakholekhwo obwonooni obubi burio tawe.

⁸Endi nende abaana banje abakhaana babili abashili abashisila, leshe emureerere abeenabo, mana mubakhole shinga olwa mwenya. Habula mulakholekhwo eshindu shiosi shiosi khubasaatsa bano ta, shichila betsile munzu wanje, ne bali hasi wobulindi bwanje.”

⁹Nebutswa abasaatsa abo baboolela Loti bari, “Rula imbeli wefwe!” Khandi nibaboola bari, “Omundu uno yetsa hano shinga omucheni, ne bulano yenya okhwikhola omuyaasi! Bulano khwitsa okhukhukholela amabi okhushila akakhwakhabakholeele.” Mana nibalunyia Loti obutinyu nende okhusita ahambi mbu, bafunache omuliango.

¹⁰Nebutswa abasaatsa bali mukari banyiila emikhono chiabwe elwanyi, nibenjisia Loti munzu ne nibekalaho omuliango.

¹¹Mana nibabofusia abasaatsa abali hamuliango kweinzu eyo boosi, abatiiti nende abakhongo, nibakoyaana, nibahabaasia okhutiila khumuliango ne nibalanyoola aha kuli tawe.

¹²Mana abasaatsa babili abo nibareeba Loti bari, “Olikhwo nomwikho undi yesi yesi hano, banyakhufialayo abeshisiani, abasianibo, abakhaanabo, noho kata omundu undi yesi yesi owoli ninaye mwitookho lino? Barusie habundu hano,

¹³shichila khuli ahambi okhusasia habundu hano. OMWAMI Nyasaye ahuliile okhwiyiniakana khwabandu khulwobwonooni obumayanu bwabandu ba habundu hano, Ne akhurumile mbu, okhulisasia litookho lia Sodomu.”

¹⁴Kho Loti narula, natsia naboolela banyakhufialanyene, abali nibenyanga okhuteeshia abakhaanabe ari, “Buushe, murule habundu hano, shichila OMWAMI Nyasaye ali ahambi okhusasia litookho lino.” Nebutswa Loti yalolekha shinga oubayanga khubanyakhufialanyene abo.

¹⁵Olwa eshialo bwali nibushietsanga, abamalaika batinyisia Loti nibaboola bari, “Buukha, obukule omukhasiwo nende abakhaanabo babili abali hano bano, mwakhetsukhana mwasishila mukhusasibwa khwelitookho lino.”

¹⁶Loti niyeng'oyosiakhwo. Habula, okhuba OMWAMI Nyasaye yalolela Loti tsimbabasi, abasaatsa abo batiila Loti, omukhasiwe nende abakhaanabe babili abo emikhono, ne nibababukula nibabarusia elwanyi welitookho elo.

¹⁷Ne olwa bali nibabarusia elwanyi welitookho, bababoolela bari, “Mwilushe muhonokosie obulamu bwenywe, shimulakhupakhwo lishemo, noho okhusinjilakhwo habundu hosi hosi mwibanda tawe. Mwilushe mutsie mwibise mubikulu, mwakhetsukhana mwerwa.”

¹⁸Naye Loti nababoolela ari, “Abaami banje!

¹⁹Toto mukholeele isie akolukoosi khandi muhoniye obulamu bwanje. Nebutswa shienyala okhwilukha nenzia mubikulu ta, okhuba amasila ako kakhetsukhana kakhanyoolelesia neshili okhuulayo mana ndafwa.

²⁰Shimulolanga litookha lituutu lialia? Leshe ndilushe enzie injelekha bwene eyo, okhuba lili ahambi. Shinga olwa mulola, nilitookho lituutu butswa, nebutswa ndalabayo mumulembe!”

²¹Naye mulala khubamalaika abo naboolela Loti ari, “Nobulayi, efuchiliile akosabile. Shindalasasia litookho lioboolilekhwo elo tawe.

²²Khola bwangu, yilukha otsieyo, okhuba shindalakhola eshindu shiosi shiosi ta, okhuula olwolaba niulileyo.” Khulweshio litookho elo liakulikhwa mbu, Zoari, eshisina mbu, “Lituutu.”

²³Loti yoola Zoari nibushiele eliuba nilifwindanga.

²⁴Mana OMWAMI Nyasaye nakwisia amachina keshibiriiti nende omulilo shinga ifula okhurula mwikulu.

²⁵Mana nasasia amatookho ako, nende amabanda koosi, nende boosi abamenyanga mumatookho ako nende emimela chiokhwiloba chiosi pe.

²⁶Nebutswa omukhasi wa Loti, owali enamukongo wa Loti, yakhupa lishemo inyuma ne nakwa lichina liomunyu.

²⁷Mumabwibwi inyanga yalondakhwo, Aburahamu yatsia nasinjila habundu aha Nyasaye yali namulolesheelenje.

²⁸Mana nahenga mwibanda lia Sodomu nende Gomora khandi nahenga omukunda kwomwibanda elo kwosi, ne nalola omwosi okufwana shinga okwelirumbi nikutuumuukhanga okhurula mwibanda elo nikutsia mwikulu.

²⁹Kho olwa Nyasaye yamulula amatookho komwibanda, omwa Loti yali niyamenya, yetsulila aka Aburahamu yamuboolela ne nahonokosia Loti okhurula mukhufwa.

³⁰Loti yatikulukha narula Zoari ne natsia okhumenya mubikulu halala nende abakhaanabe babili, shichila yali nariire okhumenya mwitookho lia Zoari. Kho namenya nabakhaanabe babili abo mumbangatsi yelichina.

³¹Mana omukhaanawe omukhulundu naboolela omushe oyo ari, “Papa wefwe nomukofu, ne abulaho omusaatsa khushialo ounyala okhukhuteeshia ifwe kho mbu, khwibule abaana tawe.

³²Chenda khunywesie papa wefwe amalwa keidivai ameele mana khukone ninaye, khutsiililisie olwibulo khulwa okhwibula ninaye abaana.”

³³Kho nibanywesia sabwe amalwa keidivai eshilo shieneshio. Mana omukhaana mukhulundu oyo natsia munzu mwa samwana ne nakona nende samwana. Samwana yali nameelile, kho shiyamanya lwomukhaanawe yetsa nakona ninaye kata olwa yabuukha tawe.

³⁴Ne inyanga yalondakhwo, omukhaana omukhulundu naboolela omushe ari, “Ndakonile nende papa eshilo shiabeele. Lekha khumunywesie khandi amalwa keidivai ameele eshilo shieinyanga yino, mana iwe winjile munzu omwo, okone ninaye, kho mbu, wesi wibule abaana ninaye.”

³⁵Mana nibanywesia sabwe amalwa keidivai eshilo eshio, ne omukhaana omushe oyo nabuukha ne nakona nende samwana.

³⁶Nolwa abakhaana ba Loti babili abo bahela tsinda okhurula khu sabwe.

³⁷Omukhaana omukhulundu oyo niyebula omwana omusiani, ne namukulikha mbu, Moabu, niye kuukanyene oluyia lwa Abamoabu, oluliho okhuula bulano.

³⁸Omukhaana omushe oyo yesi khandi niyebula omwana omusiani namukulikha mbu, Benami, niye kuukanyene oluyia lwa Abamoni, oluliho okhuula bulano.