Read wanga OBUCHACHILO 2 Bible Online

OBUCHACHILO 2 - wanga bible

OBUCHACHILO 2

¹Kho, nolwa obulongwi bwelikulu nende eshialo nende obwa buli ebilimwo biosi bwamalisibwa burio.

²Mana khunyanga yomusafu, Nyasaye namala emilimochie echia yali nakholile, ne nahuluukha.

³Kho Nyasaye nahelesia inyanga yomusafu ikhabi, ne nachikhola okhuba indakatifu, shichila khunyanga eyo, Nyasaye yahuluukha okhurula khumilimochie chiosi echia yali nakholile mubulonji bwebindu.

⁴Kho, nolwa olwa likulu nende eshialo bialongwa birio. Khunyanga eya OMWAMI Nyasaye yalonjelamwo eshialo nende likulu,

⁵Omumela kwosi kwosi kwokhulukongo kwali nikushili okhumela, khandi amayililiitsa kokhulukongo kali nikashili okhumela tawe. Shichila OMWAMI Nyasaye yali nashili okhuchimba ifula okhukwa khushialo. Ne omundu yesi yesi owokhulima omukunda shiyaliho tawe.

⁶Nebutswa ling'ong'ong'we liamaatsi liatuumuukha okhurula khushialo. Mana nilitosia liloba liokhushialo shiosi.

⁷Mana OMWAMI Nyasaye nalonga omundu okhurula khwiloba, ne naheelela mumooluke omuya kwobulamu. Mana omundu oyo naba eshilonje eshili mwoyo.

⁸Mana OMWAMI Nyasaye naraaka omukunda elubeka lwebukwe, mu Edeni. Ne ebweneyo narayo omundu owa yali nalonjile.

⁹Mana OMWAMI Nyasaye nakhola buli tsimbia tsiemisaala emilayi, khandi echili emilayi khulwa ebiokhulia, okhukhula okhurula khwiloba. Ne hakari womukunda okwo, yarakaho omusaala kwobulamu khandi okwokhumanyilisia amalayi nende amabi.

¹⁰Omwalo kwaliho mu Edeni omwo, okwarulangamwo amaatsi akokhusamilila omukunda okwo. Ne okhurula ebweneyo, omwalo okwo kwakabukhanangamwo emialo chindi chine.

¹¹Omwalo kwambeli kwalangwa mbu, Pishoni, nikwo okukholomokhanga nikubotokhana eshialo shiosi eshia Hawila, ewa itsahabu yili.

¹²Ne itsahabu yeshialo eshio ni indayi. Khandi amarashi nende amachina kobukusi kaliyo.

¹³Omwalo kwakhabili kulangwa mbu, Gihoni, okwenekwo nikwo okukholomokhanga okhubotokhana eshialo shia Etsiopia shiosi.

¹⁴Omwalo kwakhataru kulangwa mbu, Tigiri, okubiriranga ebukwe wa Asiria. Nakwo omwalo kwakhane kulangwa mbu, Yufurate.

¹⁵OMWAMI Nyasaye nabukula omundu, ne namura mumukunda kwa Edeni okhukulima nende okhukuliinda.

¹⁶Mana OMWAMI Nyasaye nalachilisia omundu oyo ari, “Oli omulekhuule okhulia khubiamo biomukunda okwo.

¹⁷Nebutswa shiolaliakhwo khubiamo biomusaala okwobumanyilisi bwamalayi nende amabi ta, shichila olwa wakhaliekhwo khu biamo biakwo, wakhafwe.”

¹⁸Kho OMWAMI Nyasaye naboola ari, “Shibuli obulayi mbu omundu abe yenyene tawe. Nditsa okhumukaasili omukhoonyi oumukhoyele.”

¹⁹Kho OMWAMI Nyasaye nalonga buli isolo khandi buli linyonyi okhurula khwiloba ne nebireera khumundu oyo okhulola ameera aka yakhanyala okhubikulikha. Ne buli eliira elia omundu oyo yakulikha buli eshilonje eshilimwoyo, nilio eliali eliira liashio.

²⁰Omundu oyo nahelesia tsing'ombe tsiosi ameera katsio, nende amanyonyi kokhwikulu nende buli isolo yokhulukongo. Nebutswa khulwa omundu, shiyanyoolekha omukhoonyi oumukhoyeele tawe.

²¹Kho OMWAMI Nyasaye nakhola omundu oyo okhukona tsindoolo tsinyinji. Ne olwa yali nashikonanga, yabukula olubafulwe lulala ne niyekala nende inyama aha yalurusia yaho.

²²Ne olubafu olwa OMWAMI Nyasaye yali narusiye khutsimbafu tsiomusaatsa oyo, yalongakhwo omukhasi ne namureerera omusaatsa oyo.

²³Mana omusaatsa oyo naboola ari, “Uno bulaano ni likumba liokhumakumba komubili kwanje, khandi ni inyama yokhunyama yokhumubili kwanje. Alalangwa mbu, omukhasi, okhuba arusibwe khumundu.”

²⁴Khulweshio, omusaatsa alalekhanga samwana nende nyina, mana bahambaana nomukhasiwe, nibaba omubili mulala.

²⁵Omusaatsa oyo nomukhasiwe boosi bali eshiehechenye, nebutswa shibalolakhwo tsisoni okhuba eshiechenye tawe.