Read wanga OBUCHACHILO 21 Bible Online

OBUCHACHILO 21 - wanga bible

OBUCHACHILO 21

¹OMWAMI Nyasaye yamala achenihe Sara ne namuhelesia ikhabi shinga olwa yali niyamusuubisia.

²Mana Sara nahela inda, ne niyebulila Aburahamu omwana omusiani mubukofubwe, khubise bia Nyasaye yali niyamuboolela.

³Aburahamu nakulikha omusianiwe, owa Sara yali niyebuule eliira mbu, Isaka.

⁴Mana olwa Isaka yali niyakhoola tsinyanga munane, Aburahamu yamusheba shinga olwa Nyasaye yali niyamulaka okhukhola.

⁵Isaka omusian wa Aburahamu yebulwa Aburahamu nali nemiyika eshikhumi shilala.

⁶Mana Sara naboola ari, “Nyasaye yambelesiye inzekho nende obutsatsahafu, ne omundu yesi yesi ouhulilakhwo kano yesi alanzekha.”

⁷Khandi nameeta okhureeba ari, “Owakhabooleele Aburahamu mbu, isie Sara ndakhanyalile okhununia abaana niwiina? Kata kario isie emwibuliile omwana omusiani mubukofubwe.”

⁸Mana omwana oyo nakhula, ne khunyanga yokhunuunikhakhwe, Aburahamu namukholela lisabo likhongo.

⁹Inyanga yindi Sara yalola Ishimaeli nabayanga[8] nende omwanawe Isaka. Ishimaeli oyo yali omusiani owa Hagari, omukhasi Omumisiri yali niyebulila Aburahamu.

¹⁰Mana Sara naboolela Aburahamu ari, “Londa omukhasi omusumba uno nende omusianiwe barule hano, shichila omwana womukhasi omusumba shialaba owobulaame halala nende omwana wanje Isaka tawe.”

¹¹Likhuwa elo liasinisia Aburahamu muno, shichila Ishimaeli yesi yali butswa omusianiwe shinga olwa Isaka yali.

¹²Nebutswa Nyasaye yaboolela Aburahamu ari, “Shiolasinyikha khulwa omuraaka oyo nende omukhasiwo omusumba oyo tawe. Eshia Sara akhuboolela okhukhola, okhole butswa, okhuba iwe wakhanyoole abolwibulolwo okhubirira mu Isaka shinga olwa ndalaka.

¹³Khandi ndalakhola omusiani womusumbawo Hagari abe nende lihanga likhongo, shichila yesi nowolwibulolwo.”

¹⁴Kho Aburahamu nabuukha mumabwibwi, ne nabukula eshiokhulia nende eshisiko shieliseelo nishitsuulemwo amaatsi nahelesia Hagari. Nabukula omwana oyo nara khumukongo kwa Hagari ne namulonda mbu aruleho atsie. Mana Hagari narulaho natsia nachaaka okhuchendachenda mushitsiimi shia Berisheba.

¹⁵Olwa amaatsi kahwa mushisiiko shieliseelo eshio, Hagari yebala omwana oyo mushitsakha.

¹⁶Olunyuma natsia niyekhala hasi ehalekhwo hambi tsimita eshikhumi shilala, ahahengaane nende omwana oyo. Kho naboola omwene mumwoyo ari, “Shinobulayi omwana wanje afwe nindololanga tawe.” Ne olwa nyinamwana omwana oyo yali nashiikhaaleho, omwana oyo yachaaka okhulila.

¹⁷Mana Nyasaye nahulila omwana oyo nalilanga. Ne omumalaika wa Nyasaye nali mwikulu yalanga Hagari ne namureeba ari, “Hagari, eshikhunyasinjia nishiina? Shiolaria ta, shichila Nyasaye ahuliile okhulila khwomwana oyo aha ali yaho.

¹⁸Buukha, otsie obukule omwana oyo, mana amuhotselesie, shichila ndakhamukhole okhuba lihanga likhongo.”

¹⁹Mana Nyasaye namanyia Hagari liyabo liamaatsi, ne Hagari natsia niyetsusia amaatsi mushisiiko shieliseelo eshio khandi nanywesia omwanawe.

²⁰Mana Nyasaye naba halala nende omwana oyo, naye omwana oyo nakhula, namenya mushitsiimi, ne naba omuyiimi omusitsa wokhuyiima nobuyingo.

²¹Yamenyanga mushitsiimi shia Parani. Naye nyinamwana namureerera omukhasi okhurula mushialo shia Misiri.

²²Mubise ebio, Abimeleki nende Fikoli, omusesia wabelihe ba Abimeleki, baboolela Aburahamu bari, “Nyasaye ali halala ninawe mu liosi liosi elia okhola.

²³Khulweshio, bulano khola eshiitsubo hano imbeli wa Nyasaye mbu, shiolingaatiakhwo isie, kata abolwibulo lwanje nende boosi abakhebulwe olunyuma muluyia lwanje tawe. Nebutswa, obe omwisiikwa khwisie, shinga olwa isie siesi ndabeele omwisiikwa khwiwe.”

²⁴Naye Aburahamu nakalusia naboola ari, “Nditsuba mbu, ndalakhola endio.”

²⁵Olwa Aburahamu yeyiniakanila Abimeleki khulwa liyabo liamaatsi, liabakhalabani ba Abimeleki bali nibamunuulile,

²⁶Abimeleki yamukalusia naboola ari, “Shiemanyilekhwo oukholile likhuwa elo ta, shiwayambooleelekhwo ta, khandi ndalashialihulilakhwo ta, okhuula olwa ndakhalihulila bulano.”

²⁷Kho Aburahamu nabukula amakondi nende tsing'ombe tsiheyi, nahelesia Abimeleki, nabo babili nibakhola indakano.

²⁸Aburahamu nabukula ebimeeme biamakondi ebisubeeni musaafu, nabiahukhasia okhurula mu mirukochie.

²⁹Mana Abimeleki nareeba Aburahamu ari, “Eshifune shiokhwahukhasia ebimeeme biamakondi ebisubeeni musaafu okhurula mumirukochio nishiina?”

³⁰Aburahamu namukalusia naboola ari, “Olabukula biamakondi ebisubeeni musaafu ebio, okhurula mumikhono chianje kho mbu, obe omuloli wanje mbu, nisie owayaba liyabo lino.”

³¹Niko achila habundu yaho nihakulikhwa mbu, Berisheba[9] shichila yaho niho aha boosi babili bakholela eshitsubo shiabwe?

³²Kho nibakhola indakano nibali Berisheba. Mana Abimeleki nende Fikoli, omusesia wabelihe ba Abimeleki nibarula nibakalukha mushialo eshia Abafilisiti.

³³Mana Aburahamu naraaka omusaala kwomukomari mushialo shia Berisheba ne niyenamilaho OMWAMI Nyasaye, Nyasaye oumenyangaho inziayo.

³⁴Mana Aburahamu namenya mushialo eshia Abafilisiti tsinyanga tsinyinji.