Read wanga OBUCHACHILO 22 Bible Online

OBUCHACHILO 22 - wanga bible

OBUCHACHILO 22

¹Olunyuma lwamakhuwa ako, Nyasaye yateema Aburahamu. Nyasaye nalanga ari, “Aburahamu!” Naye Aburahamu nafuchilila ari, “Endi hano.”

²Nyasaye namuboolela ari, “Bukula omusianiwo omuteelwa Isaka, owa waheela muno, mana otsie mushialo shia Moria, omusinze nomuhaana shinga omusango omusambe khushikulu eshia ndalakhumanyia.”

³Kho Aburahamu nabuukha mumabwibwi, nabukula abakholibe ababuukha babili nende omusianiwe Isaka. Kho narechekha tsikhwi khulwa omusango okwo. Ne narula niyekhala khusishili ne natsia habundu aha Nyasaye yali namubooleele.

⁴Khunyanga yakhataru, Aburahamu yachinguula tsimonitsie, ne nalola habundu tsana ehalekhwo okhurula aha yali.

⁵Mana Aburahamu naboolela abakholibe ababuukha abo ari, “Toonye hano nende isishili yino, nasi nende omuraaka uno khwambushe injelekha khwinamile Nyasaye kho khuchelele.”

⁶Kho Aburahamu nabukula tsikhwi tsiomusango etsio natukha omusianiwe Isaka khumurwe. Khandi nabukula omubano emumemu, ne nibatsia boosi babili halala.

⁷Mana Isaka nareeba samwana ari, “Endolanga omulilo nende tsikhwi. Nebutswa likondi liomusango tsana lili hena!”

⁸Aburahamu namukalusia ari, “Mwana wanje, Nyasaye mwene alahaana eshimeeme shiomusango omusambe.” Kho boosi nibalondokhana nibatsia.

⁹Olwa boola aha Nyasaye yali namubooleele, Aburahamu yombakhaho eshimalilo eshiemisango, niyanzakhwo tsikhwi, ne naboha omusianiwe Isaka nomukoye namwalisia khu tsikhwi etsiali khushimalilo shiemisango eshio.

¹⁰Mana Aburahamu nanyiila omukhonokwe nabukula emubano mbu, asinze omusianiwe.

¹¹Nebutswa omumalaika wa Nyasaye yamulanga okhurula mwikulu naboola ari, “Aburahamu, Aburahamu!” Naye Aburahamu nakalusia ari, “Endi hano.”

¹²Omumalaika oyo namuboolela ari, “olasaalisiakhwo omuraaka oyo kata okhumukhola eshindu shiosi shiosi eshibi ta, okhuba emanyile mbu, ohelesinjia Nyasaye oluyali khandi omuriitsanga, okhuba shiohandile khumwanawo omuteelwa oyo tawe.”

¹³Naye Aburahamu nachinguula tsimonitsie, ne nalola likondi limiiku namukongowe, nilitiililwe tsinzika tsialio mushitsakha. Mana Aburahamu natsia nabukula likondi limiiku elo nalihaana shinga omusango omusambe mushilenje shiomusianiwe Isaka.

¹⁴Khulweshio, Aburahamu nakulikha habundu tsana mbu, “OMWAMI Nyasaye alahaana.” Okhuula bulano, habundu yaho hashilangungwa butswa mbu, “Khushikulu eshia OMWAMI Nyasaye, alahaana.”

¹⁵Khandi omumalaika wa Nyasaye nalanga Aburahamu olwakhabili okhurula mwikulu namuboolela ari,

¹⁶“OMWAMI Nyasaye aboola ari, ‘Isie ndayetsubile omwene mbu, shichila wakholile kano, khandi shiohandile khumwanawo omuteelwa ta,

¹⁷ekhusuubisia mbu, ndalakhukhuhelesia tsikhabi, khandi ndalenjiyia abolwibulolwo shinga tsing'ining'ini, khandi shinga omuyeshe kwokhulukuku lweinyanza. Khandi abolwibulolwo okhuula bakhahule abasuku babwe boosi.

¹⁸Ne okhubirira mutsinzibulotsio, amahanga akeshialo koosi kakhanyoole tsikhabi shichila olindile lilako lianje.’ ”

¹⁹Kho Aburahamu nakalukha wa abakholibe bali, ne boosi halala nibatsia Berisheba, ewa Aburahamu yamala namenya.

²⁰Mana olunyuma lwamakhuwa ako koosi, Aburahamu naboolelwa ari, “Milika yesi yebuliile omusiani wenywe Nahori abaana mbu,

²¹Uzi omwikulanda, Busi omusiani wabwe, Kamueli samwana Aramu,

²²Khesedi, Hazo, Pilidashi, Yidilafu, nende Betsweli.”

²³Betsweli naba samwana Rebeka. Abasiani munane abo nibo aba Milika yebulila Nahori, omusiani wabwe Aburahamu.

²⁴Okhumeetakhwo, omukhasi omubiikha owalangwa mbu, Reuma yebula Teba, Gahamu, Tahashi nende Maaka.