Read wanga OBUCHACHILO 23 Bible Online

OBUCHACHILO 23 - wanga bible

OBUCHACHILO 23

¹Sara yamenya emiyika eshikhumi shilala nende amakhumi kabili namusaafu. Echio nichio echiali emiyika chia Sara yamenya khushialo.

²Sara yafwila habundu halangwa mbu, Kiriatsi-ariba (niho Heburoni), mushialo shia Kanani, mana Aburahamu niyekhuula nende okhulila amasika.

³Mana Aburahamu narula habundu aha omubili kwomukhayewe kwali, natsia naboolela Abahiti ari,

⁴“Isie endi omurende oumenyile mwinywe. Mungusiekhwo omukunda kwokhuyabilamwo omubili kwomukhaye wanje, endeshe okhukulola.”

⁵Nabo Abahiti nibakalusia Aburahamu nibaboola bari,

⁶“Omwami, recheresia, iwe oli omundu omukhongo khandi owobunyali mwifwe. Yabira omukhayewo mu ndala khu tsing'ani tsindayi etsia khuli ninatsio. Abulaho khwifwe oulakhwima ing'aniye noho kata okhukhwikalila okhuyabila omubili kwomukhayewo tawe.”

⁷Aburahamu nasinjila ne niyenamila Abahiti khulwokhubahelesia oluyali, abali bene shialo eshio.

⁸Khandi nababoolela ari, “Nimuba nimuchamile mbu, eyabile omubili kwomukhaye wanje hano yarulekhwo, chame mureebelekhwo Efuroni omusiani wa Zohari

⁹mbu, nachama yambelesie imbingaye eyili Makipela, eyili khundulo khwomukundakwe. Mumureebe naba nachama yambesie omukunda okwo khubukusi bwahabwene imbeli wenywe mwesi, kho mbu, kube okwanje kwokhuyabilangamwo abafu.”

¹⁰Efuroni mwene yali niyekhaale halala nende Abahiti bashie mumukhung'ano, hambi khushiliibwa shiokhwinjila mwitookho. Naye nakalusia Aburahamu, Abahiti boosi abaliho nibahulila naboola ari,

¹¹“Omwami wanje, rechelesia. Ndalakhuhelesia omukunda okwo nende ing'ani eyilimwo eyo, imbeli wabandu banje beene kho mbu, oyabilemwo omubili kwomukhayewo.”

¹²Mana Aburahamu niyenamila Abahiti beene shialo abo, khulwa okhubahelesia oluyali.

¹³Khandi naboolela Efuroni, Abahiti nibahulilanga ari, “Ekhusaaya mbu, nochama, orechelesiekhwo. Ndalakula omukunda okwo kwosi, fuchililila ekhurunje, mana eyabilemwo omubili kwomukhaye wanje.”

¹⁴Naye Efuroni nakalusia Aburahamu ari,

¹⁵“Omwami wanje, recheresia. Omukunda okuhela ebitonye bieifetsa ebikhumi bine bionyene nishiina hakari wanje ninawe? Yabila omubili kwomukhayewo.”

¹⁶Aburahamu nafuchilisania nende Efuroni, ne namuhelesia ebitonye bieifetsa ebikhumi bine imbeli wa Abahiti boosi, okhulondokhana nende obukusi bwabakholi bobukhala bomutsinyanga etsio.

¹⁷Nolwa omukunda kwali kwa Efuroni, okwali Makipela, ebukwe wa Mamure, kwahelesibwa Aburahamu kurio. Omukunda okwo kwalimwo ing'ani khandi kwalimwo emisaala kwosi.

¹⁸Aburahamu yahebwa omukunda okwo imbeli wa Abahiti, abali nibetsile mumukhung'ano okwo boosi, mana nikumanyikha mbu, nokukwe.

¹⁹Mana olunyuma Aburahamu nayabila omubili kwomukhayewe Sara, mung'ani eyali mumukunda kwa Makipela, okwali ebukwe wa Mamure (niyo Heburoni) mushialo shia Kanani.

²⁰Khulweshio, Abahiti bahelesia Aburahamu omukunda kwalinji okwabwe mbu, kube okukwe, ayabilenjemwo abafube.