Read wanga OBUCHACHILO 25 Bible Online

OBUCHACHILO 25 - wanga bible

OBUCHACHILO 25

¹Aburahamu yateeshia omukhasi undi oulangwa mbu, Ketura.

²Ketura namwibulila Zimurani, Yikishani, Medani, Midiani, Ishibaki nende Shuha.

³Yokishani yali samwana Sheba nende Dedani, nabo abolwibulo lwa Dedani bali Ashurimu, Letushimu nende Leumumimu.

⁴Abasiani ba Midiani bali Efa, Eferi, Hanoki Abida nende Elida. Abo boosi bali abolwibulo lwa Ketura.

⁵Aburahamu yahelesia Isaka ebindu biosi ebia yali ninabio.

⁶Nebutswa Aburahamu yabahelesia abaana babakhasi ababikha ebihaanwa bionyene butswa. Ne olwa yali nashili mwoyo, yabarusia khumwanawe Isaka, nabayila mushialo shiebukwe, ehale okhurula khu Isaka.

⁷Aburahamu yamenya emiyika eshikhumi shilala nende amakhumi musaafu nachirano.

⁸Mana Aburahamu nafwa nali omukofu omuyindifu muno, nalonda khubekhobe abafwa.

⁹Abasianibe Isaka nende Ishimaeli nibamuyabila mung'ani ya Makipela, eyali ebukwe wa Mamure, mumukunda kwali kwa Efuroni, omusiani wa Zohari, Omuhiti.

¹⁰Omukunda okwo nikwo okwa Aburahamu yali niyakula okhurula khu Abahiti. Mana Aburahamu nayabilwa ahambi nende aha omukhasiwe Sara yali niyayabilwa.

¹¹Olunyuma lwokhufwa khwa Aburahamu, Nyasaye yahelesia Isaka ikhabi, ne Isaka namenya Beerilahairoi, eshisina mbu, “Liyabo elia oyo ouliho mwoyo, oundolanga isie.”

¹²Abalondakhwo bano, nibo abolwibulo lwa Ishimaeli omusiani wa Aburahamu, owa Hagari Omumisiri, owali omukholi wa Sara yebulila Aburahamu.

¹³Ameera kabasiani ba Ishimaeli okhulondokhana nende okhwibulwa khwabwe, owambeli okhuula khu owokhumalilikha kali, Nebayotsi, Kedari, Adibeeli, Mibisamu.

¹⁴Mishima, Duma, Masa,

¹⁵Hadadi, Tema, Yeturi, Nafishi, nende Kadema.

¹⁶Abo nibo abali abasiani ba Ishimaeli, abali abakuka betsimbia ekhumi natsibili. Ebimenyo biabwe nende tsingongo etsia bamenyangamwo tsiali tsiakulikhwa ameera kabwe.

¹⁷Ishimaeli yafwa nali nemiyika eshikhumi shilala nende amakhumi kataru namusaafu ne nayabilwa halala nende abekhobe.

¹⁸Abolwibulo lwa Ishimaeli bamenyanga mushialo eshili hakari ha Habila nende Shuri, eshili ahambi khu lwakho lwa Misiri, elubeka wa Ashuri. Bamenyayo nibalarecheresaninjia nende abasiani babwe bandi abolwibulo lwa Aburahamu tawe.

¹⁹Abalondakhwo bano nibo abolwibulo lwa Isaka omusiani wa Aburahamu. Aburahamu yali samwana Isaka.

²⁰Naye Isaka yali nemiyika amakhumi kane, olwa yateeshia Rebeka omukhaana wa Betsweli Omuaramia wa Mesopotamia, omukhaana wabwe Labani.

²¹Rebeka yali omukhasi omukumba, nikachila Isaka nasaaya OMWAMI Nyasaye, naye OMWAMI Nyasaye nahulila okhusaayakhwe, mana Rebeka nahela inda.

²²Rebeka nashili okhwibula yamanya mbu, alebula amakhwana, shichila yahulila nikatuyananga mundamwe, mana niyereeba ari, “Mbushiina kano nikanzikholekhakhwo?” Kho natsia okhureeba OMWAMI Nyasaye eshifune,

²³naye OMWAMI Nyasaye namukalusia ari, “Oli nabaana abasiani babili mundamwo. Babili abo bakhabe amahanga kabili akahukhaane. Ne omushe khu babili abo, yakhabe owamaani okhushila omukhulundu ne omukhulundu yakhakhalabanile omushe.”

²⁴Olwa tsinyangatsie tsiokhwibula tsiola, yebula amakhwana.

²⁵Owaranjilila okhurula yafwana shinga ipala ne omubilikwe kwosi kwali namaswa kho nibamukulikha mbu, Esau.

²⁶Ne olunyuma omusiani wabwe nalondakhwo, omukhonokwe kwali nikutiilile eshisisilo shia Esau, kho nibamukulikha mbu, Yakobo. Olwa Isaka yabeebula, yali nemiyika amakhumi kasasaba.

²⁷Olwa abasiani abo bakhula nibaba abakhogo, Esau yamala abe omuyiimi owamachesi khandi owachama obulamu bwomubulimo. Naye Yakobo yali omuholelefu, omwayi wamakondi owachama okhwikhala hango.

²⁸Isaka yaheela Esau shichila yalitsangakhwo inyama indai yeisolo, eya Esau yayiimanga, nebutswa Rebeka naye yali yaheela Yakobo.

²⁹Inyanga yindi Yakobo yali nateekhanga eshiokhulia, Esau niyenjila narula mukhuyiima nachonyile khandi nahulilanga inzala.

³⁰Mana Esau naboolela Yakobo ari, “Nochama, lekha endiekhwo eshiokhulia shioteekhanga eshio, shichila enjonyile muno.” (Kho nibamulanga mbu, Edomu[11])

³¹Yakobo namukalusia ari, “Ndalakhuhelesia eshiendekhanga nikaba mbu, olangusia obukhulundubwo bwokhwibulwa.”

³²Esau namuboolela ari, “Inzala yenya okhunzira, obukhulundu bwanje buli nabukhoonyi shiina khwisie?”

³³Yakobo namuboolela ari, “Ranjilila hunziitsubile mbu, olambelesia obukhulundubwo inyanga yino.” Kho Esau niyetsuba ne nahelesia Yakobo obukhulundubwe bwokhwibulwa.

³⁴Mana Yakobo nahelesia Esau obusuma nende eshitiani. Yalia khandi nanywa ne nasinjila narula natsia. Nolwa Esau yalechelesia ario obukhulundubwe bwokhwibulwa.