Read wanga OBUCHACHILO 26 Bible Online

OBUCHACHILO 26 - wanga bible

OBUCHACHILO 26

¹Khandi inzala yindi yaliho mushialo, okhumeeta khunzala yeyimbeli, eyaliho mutsinyanga tsia Aburahamu. Kho Isaka natsia mushialo shia Gerari, khu Abimeleki omuruchi wa Abafilisiti.

²Mana OMWAMI Nyasaye naloleshela Isaka namuboolela ari, “Shiolatsiakhwo Misiri ta, omemenye butswa mushialo shia ndalakhuboolela.

³Omenye mushialo eshio, ne ndalabetsanga ninawe khandi ndalakhuhelesia tsikhabi, shichila ndalakhuhelesia iwe nende abolwibulolwo ebialo bino biosi. Khandi ndaloosia aka ndasuubisia okhukholela papawo Aburahamu.

⁴Ndalenjiyia abolwibulolwo shinga tsing'ining'ini tsiomwikulu, khandi ndalabahelesia ebialo bino biosi. Ne okhubirira mubolwibulolwo, amahanga koosi akokhushialo kalanyoola tsikhabi.

⁵Ndalakhuhelesia ikhabi, shichila papawo Aburahamu yambulila isie ne naliinda amalako nende amebaalo kanje.”

⁶Kho Isaka nahuuya natsia okhumenya Gerari.

⁷Ne olwa abasaatsa bomushialo eshio bamureeba khukomukhasiwe, yaboola ari, “Oyo nomukhaana wefwe.” Shichila yaria okhwiyama mbu, nomukhasiwe naparanga mbu, abandu bomushialo eshio bakhamwira khulwa Rebeka. Okhuba Rebeka yali owelikondo lilayi muno khandi eliokhuchamisia.

⁸Olwa Isaka yali niyakhamenyayo oluhoono olurambi, Abimeleki omuruchi wa Abafilisiti nali munzuye, yahenjelela mwitirisha ne nalola Isaka natiilatiilanga khu Rebeka nende okhumutsunzuuna.

⁹Kho Abimeleki nalanga Isaka ne namureeba ari, “Khane uno nomukhasiwo. Mbushiina noboola mbu, nomukhaana wenywe?” Isaka namukalusia naboola ari, “Okhuba ndapaara mbu, yakhachila ndafwa.”

¹⁰Abimeleki nareeba Isaka ari, “Okhukholeele shiina shino? Mulala khubandu bano niyakhanguuhe okhukona nomukhasiwo, wakhabeele nokhureereere ifwe eshikha.”

¹¹Kho Abimeleki nachetsiyia abandu naboola ari, “Omundu yesi yesi outiila khumusaatsa uno, noho okhutiila khumukhasiwe, aleerwa.”

¹²Mana Isaka naraaka ebiokhulia mushialo eshio ne mumuyika tsana okwo, nachesa ebiokhulia ebinji muno okhushila ebiayaraaka. Okhuba OMWAMI Nyasaye yali nahelesiye Isaka ikhabi.

¹³Mana Isaka nayindahala khandi nanyoola ebindu ebinji okhuula naba omuyinda muno.

¹⁴Yali namakondi amanji, tsing'ombe tsinyinji, nende abakholi abanji mana nikachila Abafilisiti nibatiilwa neshikhalikhali khulwa obuyindabwe.

¹⁵Kho, Abafilisiti nibabuka amayabo akamaatsi, kabakholi ba Aburahamu Samwana Isaka bali nibayaba Aburahamu mwene nashiliho mwoyo.

¹⁶Mana Abimeleki naboolela Isaka ari, “Tsia ehale okhurulekhwo, shichila oli namaani okhukhushila ifwe.”

¹⁷Kho Isaka narulaho natsia nakhoma liheema mwibanda lia Gerari ne namenya ebweneyo.

¹⁸Mana Isaka nayaba khandi amayabo kamaatsi, akali nikayabwa mutsinyanga tsia Aburahamu samwana, okhuba Abafilisiti bali nibakabuka olunyuma olwokhufwa khwa Aburahamu. Khandi nakakulikha ameera ka samwana yali niyakakulikha.

¹⁹Nebutswa olwa abakholi ba Isaka bayaba mwibanda ne nibanyoolamwo liyabo lieisebele eyamaatsi kafutukhanga,

²⁰abaayi abomushialo shia Gerari basoolana nende abaayi ba Isaka nibaboola bari, “Amaatsi kano nakefwe.” Mana Isaka nakulikha liyabo elo mbu, “Obuyingani,” shichila bayingana ninaye.

²¹Mana abakholi ba Isaka nibayaba liyabo lindi, khandi abaayi beshialo shia Gerari nibasolanilakhwo nabayi ba Isaka. Kho nalikulikha mbu, “Obusuku.”

²²Khandi yarulaho nayaba liyabo lindi, ne eliene elo shibaasoolanilakhwo ta, kho nalikulikha mbu, “Hano naheyangu,” naboola ari, “OMWAMI Nyasaye akhukaasiliye obwiyangu, ne bulano khulaba netsikhabi mushialo shino.”

²³Olunyuma Isaka yatikulukha natsia Beerisheba.

²⁴Mana OMWAMI Nyasaye namuloleshela eshilo shiatsana eshio, ne namuboolela ari, “Nisie Nyasaye, owa Aburahamu papawo, shiolaria ta, shichila endi ninawe, ndalakhuhelesia ikhabi, khandi ndalenjiyia olwibulolwo khulwa omukhalabani wanje Aburahamu.”

²⁵Kho Isaka niyombakhaho eshimalilo shiemisango ne namwinamila Nyasaye. Khandi nasimikhaho liheemalie. Mana abakholi ba Isaka nibayaba habwene yaho liyabo liamatsi.

²⁶Mana omuruchi Abimeleki narula Gerari nali halala nende Ahuzatsi omuchetsiyiwe nende Fikoli omusesiawe, nibatsia okhulola Isaka.

²⁷Ne Isaka namureeba ari, “Mwitsile okhundola mbushiina ne mumanyile mbu, mwasila isie khandi mwanonda mbu, emurulekhwo?”

²⁸Nibamukalusia nibaboola bari “Khulolanga mbu, OMWAMI Nyasaye ali ninawe, kho khwenyanga mbu, nochama, ifwe ninawe khwitsube mana khukhole indakano hakari wefwe ninawe mbu,

²⁹Shiolakhusaalisia ta, shinga olwa fwesi khulakhusaalisia iwe tawe. Ifwe khwakhukholela amalayi nikhukhuseebula nomulembe. Ne bulano niwe owa OMWAMI Nyasaye yahelesia ikhabi.”

³⁰Kho Isaka nabakaasilia ebiokhulia nibalia khandi nabahelesia eshiokhunywa nibanywa.

³¹Olwa bwashia, babuukha mumabwibwi nibakhola indakano ne nibetsubilana okhuchilinda. Mana Isaka nabakooba khunjila yabwe ne nibaseebulana mumulembe.

³²Khunyanga tsana eyo, abakholi ba Isaka betsa nibamuboolela khukeliyabo lia bali nibayabile, nibaboola bari, “Khunyoolile amaatsi.”

³³Naye nalikulikha ari, “Shiba,” khulweshio eliira lielitookho elo ni Beerisheba okhuula olwa leelo.

³⁴Olwa Esau yali nemiyika amakhumi kane, yateeshia omukhasi undi mbu, Yuditsi, omukhaana wa Beheri, Omuhiti khandi nateeshia oundi mbu, Besematsi, omukhaana wa Eloni, Omuhiti,

³⁵Abakhasi babili abo bakhola obulamu bwa Isaka nende Rebeka okhuba obutinyu.