Read wanga OBUCHACHILO 27 Bible Online

OBUCHACHILO 27 - wanga bible

OBUCHACHILO 27

¹Olwa Isaka yali nakofuule, natsio tsimonitsie nitsiabofula, yalanga Esau, omusianiwe omukhulundu ari, “Mwana wanje” Naye Esau nakalusia ari, “Endiho papa.”

²Isaka namuboolela ari, “Lola, engofuule ne shiemanyile inyanga yokhufwa khwanje tawe.

³Bulano bukula ebimanulwabio, imotia[12] nende obuyingobwo mana otsie mubulimo, uyiimilemwo isolo

⁴mana ungaasilie eshiokhulia eshilayi, eshia ndachama, undeerere mbu, endie mana ekhulaamile tsikhabi neshili okhufwa.”

⁵Naye Rebeka yali narechelesinjia, olwa Isaka yali naboolelanga omusianiwe Esau amakhuwa ako. Kho olwa Esau yatsia mubulimo okhuyiima isolo mbu arere,

⁶Rebeka naboolela omusianiwe Yakobo ari, “Embuliile papawo naboolelanga omusiani wenywe Esau mbu,

⁷‘Ndeerera inyama yeisolo, yoyiimile khandi ungaasilie eshiokhulia eshilayi mana ekhulaamile ikhabi imbeli ewa OMWAMI Nyasaye neshili okhufwa.’

⁸Bulano mwana wanje, hulila amakhuwa kanje shinga olwa ekhulaka.

⁹Otsie mubiayo mana undeerere ebimeeme bietsimbusi bibili, endeeshele papawo eshiokhulia eshilayi eshia yachama.

¹⁰Mana olayilila papawo alie, kho akhulaamile iwe tsikhabi nashili okhufwa.”

¹¹Naye Yakobo naboolela nyina ari, “Lola, mama, omusiani wefwe Esau ali namaswa, nasi omubili kwanje nomurerere.

¹²Haundi papa alaahabaasiakhwo mana endoleshe okhuba omubeeyi khuye. Ne ndaleereerera eshilaamo shiobubi mushilenje shiokhunyoola tsikhabi.”

¹³Mana nyina namukalusia ari, “Mwana wanje, lekha eshilaamoshio shiobubi eshio shibe khwisie. Hulila butswa akekhuboolela mana undeerere ebimeeme bietsimbusi ebio.”

¹⁴Kho Yakobo natsia nabukula ebimeeme nareerera nyina. Naye nyina nateekha eshiokhulia shieshuya eshilayi, eshia Isaka samwana Yakobo yachama.

¹⁵Mana Rebeka nabukula tsingubo tsindayi tsiomusianiwe omukhulundu Esau, etsiali nitsiabiikhwa munzu, ne nafwala omusianiwe omushe Yakobo.

¹⁶Khandi Rebeka nabukula amaseelo kebimeme nafwala Yakobo khumakhono nende khwikosi ebiali ebirerere.

¹⁷Mana Rebeka nahelesia Yakobo eshiokhulia eshilayi eshio nende omukaate, ebia yali nateeshile.

¹⁸Kho Yakobo niyenjila munzu wa Isaka yali, ne nalanga ari, “Papa,” naye Isaka nakalusia ari, “Endiho,” mana samwana namureeba ari, “Niwe wiina mwana wanje?”

¹⁹Yakobo nakalusia samwana naboola ari, “Nisie omusianiwo omukhulundu Esau. Ekholile shinga olwa wayambooleele okhukhola, bulano buukha olie inyama yeisolo, eya eyiimile, mbu unaamile tsikhabi.”

²⁰Nebutswa Isaka yareeba omusianiwe Yakobo ari, “Ne mwana wanje, okhachinyoolile orie butswa bwangu?” Naye Yakobo namukalusia naboola ari, “Shichila OMWAMI Nyasaye, Nyasaye owa iwe winamilanga niye ounyaliile okhuchinyoola bwangu.”

²¹Mana Isaka naboolela Yakobo ari, “Sita ahambi ekhuhabaasiekhwo mwana wanje, kho emanye noba noli toto omusiani wanje Esau noho tawe.”

²²Kho Yakobo nasita ahambi khu Isaka samwana, naye Isaka namuhabaasiakhwo ne naboola ari, “Omwoyo, nokwa Yakobo, ne amakhono, naka Esau.”

²³Mana Isaka nalamanyilisia mbu, ni Yakobo ta, shichila amakhonoke kali akamaswa shinga aka Esau, omusiani wabwe. Kho Isaka nalaamila Yakobo tsikhabi.

²⁴Isaka nareeba khandi ari, “Toto mwene niwe omusiani wanje Esau?” Naye Yakobo niyeyama ari, “Nisie.”

²⁵Kho Isaka naboola ari, “Ndeererakhwo inyama yeisolo, yoyiimile endiekhwo, nasi ndalakhulaamila tsikhabi.” Kho Yakobo nareerera samwana eshiokhulia eshio, nalia khandi namureerera idivai nanywa.

²⁶Mana Isaka naboolela Yakobo ari, “Mwana wanje, sita ahambi hano ufumbeelele.”

²⁷Naye Yakobo nasita ahambi nende samwana, ne namufumbeelela. Mana Isaka nahunyilisia ebifwalo bia Yakobo, ne namulaamila tsikhabi naboola ari, “Okhuhunya khwomusiani wanje nokhulayi shinga okhwomukunda okwa OMWAMI Nyasaye alaamiile tsikhabi!

²⁸Nyasaye akhwamilie tsikhabi shinga liime liomwikulu, khandi akhuhelesie emikunda nakhuhelesia imele neidivai inyinji.

²⁹Esaaya mbu, tsimbia tsiabandu tsikhukhalabanile, khandi amahanga kandi kakhwinamile iwe. Obe omwami wabasiani benywe, khandi abaana abasiani ba mamawo bakhwinamile iwe. Abakhulaamila eshilaamo shiobubi basiushilwe, nabo abakhulaamila tsikhabi boosi banyoole tsikhabi.”

³⁰Ne olwa Isaka yali niyakhamala okhulaamila Yakobo tsikhabi, kata Yakobo nashili okhurula ewa Isaka Samwana yali, Esau omusiani wabwe Yakobo yenjila narula mukhuyiimakhwe.

³¹Yesi nateekha eshiokhulia eshilayi ne nareerera samwana, namuboolela ari, “Papa, chama obuushe mana oliekhwo inyama yeisolo, eya ekhuyiimiile mbu, ulaamile tsikhabi.”

³²Mana Isaka samwana namureeba ari, “Niwe wiina?” Naye Esau nakalusia ari, “Nisie Esau, omusianiwo omukhulundu.”

³³Mana Isaka natechela obutinyu ne nareeba ari, “Ne ouyiimile inyama yeisolo, niyandeerela nasi nendia yoosi noshili okhwitsa, mana emulaamile tsikhabi, akhabeele wiina? Ne bulano isie emalile okhumulaamila tsikhabi, mana toto amalile okhunyoola tsikhabi.”

³⁴Olwa Esau yahulilakhwo amakhuwa ka samwana ako, yalila obutinyu nakhupa tsimbungu obululu, ne nasaaya samwana ari, “Papa nochama, kata siesi umbekhwo tsikhabi.”

³⁵Naye Isaka namukalusia naboola ari, “Omusiani wenywe Yakobo yetsile hano niyangaatia ne abukuule tsikhabitsio.”

³⁶Esau naye nakalusia naboola ari, “Nakatoto yakulikhwa habwene mbu, Yakobo, eshisina mbu, omukaati, shichila wayangaatiye khabili khosi. Olwambeli, yangaatia nabukula obukhulundu bwanje, khandi bulano lola, yakhabukula tsikhabi tsianje.” Mana nareeba samwana ari “Nasi shiundesheelekhwo ikhabi yosi yosi ta?”

³⁷Isaka nakalusia Esau ari, “Lola, emukholile okhuba omwamiwo khandi ekholile abekhobe boosi okhuba abakhalabanibe. Khandi emuhele imele nende idivai. Kho nishiina mwana wanje, eshia ndakhakhukholelakhwo.”

³⁸Esau natsiililila okhusaaya samwana ari, “Papa, shiokhalikhwo kata neikhabi ndala yonyene wambakhwo ta?” Mana Esau nachinguula omwoyokwe niyekhuula obutinyu.

³⁹Mana Isaka namukalusia naboola ari, “Olamenya khulwa amaani kolukangalwo khandi olamenya ahale khu biamo bielime liomwikulu.

⁴⁰Olamenya obulamubwo khulwa okhwira nende okhunuula abandu ebindu, khandi wakhabe omukhalabani womusiani wenywe. Nebutswa lwolikhaya okhuhulila akeke, nolwa olirula muburuchibwe.”

⁴¹Mana Esau nasila Yakobo khulwa tsikhabi tsia samwana yali nalaamiile Yakobo, mana Esau napaara mumwoyokwe ari, “Tsinyanga tsiokhufwa khwa papa tsili ahambi okhuula, ne olwa amasikake kakhabe nikahwele, ndakheere omusiani wefwe Yakobo.”

⁴²Nebutswa olwa amapaaro komusiani mukhulundu Esau, kamanyishila Rebeka, Rebeka yalanga omusianiwe omushe Yakobo namuboolela ari, “Omusiani wenywe Esau yeleminjia omwoyo khulwokhwikaasia okhukhwira iwe.

⁴³Khulweshio mwana wanje, hulila amakhuwa kanje. Rula otsie Harani, ewa omusiani wefwe Labani ali.

⁴⁴Mana omenyeyo okhuula lwoburuma bwomusiani wenywe Esau buliba nibuhwele,

⁴⁵khandi niyebiliile akawamukholeele. Ne ndiliruma amakhuwa mbu bakhwendeyo. Mbushiina efwilwe inywe abasiani banje mwesi babili khunyanga ndala?”

⁴⁶Mana Rebeka niyeyiniakanila Isaka ari, “Ndachoonyile nobulamu khulwa abakhasi Abahiti, aba Esau yateeshia bano. Yakobo naba nateeshia mulala khubakhaana Abahiti shinga aba Esau yateeshia bano, ouli mulala khubakhaana bomushialo shino, nobulayi kata ifwe.”