Read wanga OBUCHACHILO 28 Bible Online

OBUCHACHILO 28 - wanga bible

OBUCHACHILO 28

¹Kho Isaka nalanga Yakobo ne namulaamila tsikhabi, khandi namukaania obutinyu ari, “Shiolateeshiakhwo omukhasi Omukanani tawe.

²Otsie Mesopotamia, munzu ya Betsweli kuukayo, samwana mamawo, mana obukuleyo omukhaana okhurula munzu mwa khotsayo Labani.

³Esaaya mbu, Nyasaye Owobunyali Bwosi akhuhelesie tsikhabi khandi okhukhole wibule abaana abanji mana babe amahanga amanji.

⁴Esaaya khandi mbu, Nyasaye akhuhelesie iwe nende abolwibulolwo tsikhabi shinga etsia yahelesia Aburahamu mbu, mana onyale okhubukula eshialo shia wamenyamwo shinga omucheni, eshialo eshia Nyasaye yahelesia Aburahamu!”

⁵Isaka yaseebula ario Yakobo. Ne Yakobo natsia Mesopotamia, ewa Labani, omusaatsa Omuaramu, omusiani wa Betsweli, omusiani wabwe Rebeka, nyinamwana Yakobo nende Esau.

⁶Esau yamanya mbu, Isaka alaamiile Yakobo ikhabi khandi mbu, amurumile okhutsia Mesopotamia mbu, abukuleyo omukhasi. Khandi namanya mbu, yamulaamila ikhabi nende okhumukaania obutinyu mbu, shialateshiakhwo omukhasi Omukanani tawe.

⁷Khandi yamanya mbu, Yakobo yali nahuliile aka samwana nende nyina bali nibamubooleele ne natsiile Mesopotamia.

⁸Kho olwa Esau yamanya mbu, abakhaana Abakanani shibaachamisia Isaka samwana ta,

⁹yatsia wa Ishimaeli, omusiani wa Aburahamu, nabukulayo omukhasi, owalangwa mbu, Mahalatsi omukhaana wabwe Nebayotsi, okhumeeta khubakhasi bandi, aba yali ninabo.

¹⁰Kho Yakobo narula Beerisheba natsia Harani.

¹¹Ne niyoola habundu undi aha yeyalisia eshilo shieinyanga eyo, okhuba bwali nibwilile. Yamala nabukula elala khumachina, akali habundu yaho, niyeyichikha nakona tsindoolo.

¹²Nali mundoolo, yaloora mbu, aluutsi ingaasi niyisinjisiibwe khushialo, nakwo omurwe kwayo kwali nikuulile mwikulu, abamalaika ba Nyasaye bali nibaniinanga khandi nibekhanga khungaasi eyo.

¹³Khandi OMWAMI Nyasaye yali nasinjiile hekulu weingaasi eyo, naboolanga ari, “Nisie Nyasaye wa Aburahamu khandi Nyasaye wa papawo Isaka. Ndalakhuhelesia iwe nende abolwibulolwo eshialo shia wiyalisiiyemwo shino.

¹⁴Ne olwibulolwo lwakhabe olunji shinga olufu lwokhushialo, khandi wakhalaandaale nosalaana okhuula mutsimbeka tsieshialo tsiosi. Mana okhubirira mwiwe nende mulwibulolwo, tsinzibulo tsiokhushialo tsiosi tsiakhanyoole tsikhabi.

¹⁵Isie endi halala ninawe, ne ndalakhulindanga hosi hosi aha otsia, nende okhukhukalusia mushialo shino, okhuba shindilikhulekha ta, okhuula olwa ndiliba nikhukholeele koosi aka ndakhakhusuubisia.”

¹⁶Mana Yakobo nabuukha ne naboola ari, “Toto mwene OMWAMI Nyasaye ali habundu hano, nasi shiemanyilenjekhwo ta.”

¹⁷Yakobo natiilwa noburi ne nareeba ari, “Habundu hano nahokhuriisia muno! Toto mwene hano shihachweya okhuba inzu eya OMWAMI Nyasaye ta, nishio eshiliibwa shiokhutsia mwikulu.”

¹⁸Kho Yakobo nabuukha mumabwibwi, nabukula lichina lia yali niyeyichiishe nalirechekha okhuba eshiitsulilo ne nalitsushililakhwo amafura.

¹⁹Yakobo nakulikha habundu tsana mbu, “Betseli,” nebutswa eliira lielitookho elo olwambeli lialangungwa mbu, “Luzi.”

²⁰Mana Yakobo niyetsuba naboolela OMWAMI Nyasaye ari, “Noba ninasi halala, niuniinda khuluchendo lwenziakhwo luno, niumbelesia ebiokhulia nende tsingubo tsiokhwifwala,

²¹khandi noba niunjelesia ingo wa papa wanje mumulembe, kho, olaba noli Nyasaye wanje.

²²Ne lichina lieshiitsulilo lierecheeshe okhuba isiilo lino, lilaba Ihekalu yokhukhwinamilamwo iwe, nasi ndalakhuhelesia eshitonye shielikhumi okhurula khubindu biosi ebia olambelesinjia.”