Read wanga OBUCHACHILO 29 Bible Online

OBUCHACHILO 29 - wanga bible

OBUCHACHILO 29

¹Mana Yakobo natsiililila noluchendolwe, ne niyoola mushialo shiabandu bebukwe.

²Ne olwa yahenga, yalola liyabo liamaatsi mumukunda, na lola, amatuuli kataru ka amakondi kali nikakonile ahambi neliyabo elo, okhuba amakondi kanywesibungwa amaatsi okhurula mwiyabo elo,

³Buli olwa amakondi ketsanga okhunywa amaatsi mwiyabo elo, abaayi bako barusinjia lichina eliafuunikhanga khwiyabo elo, bakanywesia mana khandi bakalusia lichina elo khwiyabo tsana.

⁴Kho Yakobo nareeba abaayi abo ari “Abasiani befwe, murulanga hena?” Ne nabo nibamukalusia bari, “Khurulanga Harani.”

⁵Kho Yakobo nabareeba ari, “Mwamanyakhwo omundu mbu, Labani, omusiani wa Nahori?” Nabo nibakalusia bari, “Khwamumanya.”

⁶Naye nabareeba ari, “Nomulamu?” Nabo nibakalusia nibaboola bari, “Nomulamu, ne lola, omukhaanawe oulangwa mbu, Raeli ngwoyo yetsanga namakondi!”

⁷Yakobo nababoolela ari, “Shishili eshiteere, shibili ebise biebiayo okhukhung'asibwa halala tawe. Nywesie amakondi amaatsi mana mutsie mwaye.”

⁸Nebutswa bamukalusia bari, “Shikhunyala okhutsia ta, okhuula olwa amakondi koosi ka khung'ana halala, mana lichina liserenjesibwe okhurula khwiyabo, kho khunywesie amakondi.”

⁹Ne olwa Yakobo yali nashiboolanga nabaayi ario, Raeli yetsa namakondi ka samwana, shichila ye niye owakaayanga.

¹⁰Ne bulaano olwa Yakobo yalolakhwo Raeli, omukhaana wa Labani khotsanyene, Yakobo yatsia khwiyabo naserenjesia lichina elo okhurula khwiyabo elo. Kho nanywesia amakondi ka Labani, omusiani wabwe nyinamwana.

¹¹Khandi Yakobo nafumbeelela Raeli ne nalila nomwoyo omukhongo.

¹²Kho Naboolela Raeli mbu, ye nomwikho wa Labani, shichila yali omwana wa Rebeka. Naye Raeli niyelukha natsia okhuboolela samwana.

¹³Olwa Labani yahulila amakhuwa ka Yakobo omusiani womukhana wabwe yaboola, yelukha natsia okhumwakaanila. Mana namufumbeelela nende okhumutsunzuuna, ne namureera munzumwe. Mana Yakobo namuboolela amakhuwa ako koosi,

¹⁴Naye Labani namuboolela ari, “Toto mwene oli likumba lianje khandi inyama yanje.” Kho Yakobo namenya ninaye khulwa oluhoono lwomwesi mulala.

¹⁵Mana Labani naboolela Yakobo ari, “Iwe oli omwikho wanje, nebutswa shiokhoyile okhuukholela emilimo butswa tawe. Mboolelakhwo mbu, omurungokwo kulaba shiina?”

¹⁶Labani yali nabaanabe abakhaana babili. Owambeli yali Lea, naye omushe yali Raeli.

¹⁷Lea shiyali owokhuchamisia ta, nebutswa Raeli yali nelikondo lilayi muno.

¹⁸Yakobo yaheela Raeli, kho naboolela Labani ari, “Ndalakhukholela emilimo khulwemiyika musaafu khulwa omukhaanawo omushe mbu Raeli.”

¹⁹Naye Labani nakalusia Yakobo ari, “Nobulayi okhukhuhelesia iwe okhushila okhuhelesia omusaatsa undi butswa. Menya ninasi.”

²⁰Kho Yakobo nakholela Labani emilimo khulwemiyika musaafu. Nebutswa chialolekha khuye shinga tsinyanga tsindiiti butswa, khulwa obuheeli bwa Yakobo yali niyaheela Raeli.

²¹Kho Yakobo naboolela Labani ari, “Mbelesia omukhasi wanje emuteeshie, shichila tsinyanga tsiokhukhola emilimo khulwa okhumuteeshia ndakholile ndatsimalile.”

²²Kho Labani nakhung'asia abasaatsa bahabundu yaho boosi nende okhukaasia lisabo.

²³Nebutswa nibwakheela, Labani yabukula omukhaanawe Lea narerera Yakobo, ne Yakobo nakona ninaye.

²⁴(Labani yabukula omukholiwe Zilipa, nahelesia Lea okhuba omukholiwe).

²⁵Mana mumabwibwi, Yakobo nanyoola mbu, owa yali nakonile ninaye yali Lea. Kho Yakobo nareeba Labani ari, “Eshiokholile shino nishiina? Shindaakhola emilimo khulwa Raeli? Ne mbushiina niungatia?”

²⁶Labani nakalusia Yakobo ari, “Mushialo shiefwe shino, shikakholungwa kario, mbu ohaane omukhaana omushe omukhulundu nashili okhuteekha tawe.

²⁷Iwe mala lichuma elala lino noli nende Lea shinga olwa amalako kalaka khubateshianiye. Mana khulakhuhelesia Raeli khulwa okhuukholela emilimo khulwemiyika chindi musaafu.”

²⁸Yakobo yamala akhole ario. Ne olunyuma lwa Yakobo okhuba nende Lea khulwa lichuma elala, Labani yamala ahelesie Yakobo Raeli okhuba omukhasiwe.

²⁹(Labani yabukula omukholiwe Biliha, nahelesia Raeli okhuba omukholiwe).

³⁰Kho Yakobo nakona nende Raeli khandi, ne naheela Raeli okhushilakhwo shinga olwa yali niyaheela Lea. Mana nakholela Labani emiyika chindi musaafu.

³¹Ne olwa OMWAMI Nyasaye yalola mbu, Lea shiyaheelwa ta, yamwikulila okhwibula. Nebutswa Raeli yatong'a nali omukumba.

³²Mana Lea nahela inda, ne niyebula omwana omusiani. Namukulikha mbu, Rubeni, shichila yaboola ari, “Okhuba OMWAMI Nyasaye aluutsi obusandibwi bwanje. Bulaano, omusaatsa wanje alaaheela isie.”

³³Khandi Lea nahela inda yakhabili. Ne niyebula omwana omusiani khandi. Kho naboola ari, “OMWAMI Nyasaye yambelesiye omwana omusiani shichila ahuliile shinga olwa ndasilwa.”

³⁴Khandi nahela inda, ne niyebula omwana omusiani, kho naboola ari, “Bulaano, omusaatsa wanje alahambaana ninasi shichila emwibuliile abaana abasiani bataru.” Khulweshio, yamukulikha mbu, “Lawi.”

³⁵Khandi Lea nahela inda ne niyebula omwana undi omusiani khandi. Naboola ari, “Olwene luno, nditsa okhwitsoomia OMWAMI Nyasaye.” Khulweshio, namukulikha eliira mbu, Yuda. Kho nasinjila okhwibula.