Read wanga OBUCHACHILO 3 Bible Online

OBUCHACHILO 3 - wanga bible

OBUCHACHILO 3

¹Ne inzokha nayo yali injesichesi muno okhushilakhwo isolo yindi yosi yosi, eya OMWAMI Nyasaye yali niyalonga. Inzokha eyo niyireeba omukhasi oyo yiri, “Toto Nyasaye yaboola mbu, shimulaliakhwo khubiamo biomusaala kwosi kwosi okwomukunda kuno ta?”

²Naye omukhasi oyo nachikalusia naboola ari, “Khunyala okhuliakhwo khubiamo biemisaala chiosi echiomukunda kuno,

³habula Nyasaye yaboola ari, ‘Shimulaliakhwo khubiamo biomusaala okuli hakari womukunda kuno ta. Khandi shimulatiilakhwo ta, mwitsukhana mwafwa.’ ”

⁴Nebutswa inzokha eyo niyikaania omukhasi oyo yiri, “Shimulafwa tawe.”

⁵Okhuba Nyasaye amanyile mbu, nimuliakhwo khubiamo biomusaala okwo, tsimoni tsienywe tsilatimbusibwa, ne mulaba shinga Nyasaye. Mulamanyilisia amalayi nende amabi.

⁶Kho lwomukhasi oyo yalola mbu, omusaala okwo kwali omulayi khulwa eshiokhulia, khandi mbu, kwali okwokhuchamisia khandi okwokhukhola omundu okhuba omuchesi, yabukulakhwo eshiamo shiakwo ne nalia. Khandi nabukulakhwo ebiamo biakwo bindi nahelesia omusaatsawe naye yesi nalia.

⁷Mana boosi babili nibaba nobuchesi obunji, ne nibamanya mbu, bali eshiechenye. Kho nibanaba halala amasafu komukhuyu nikekhola ebifwalo ne nibeboyela mushilenje.

⁸Mana khubwile nibahulila OMWAMI Nyasaye nachendanga mumukunda, ne omusaatsa oyo nomukhasiwe nibebisa mumisaala chiomukunda okhurula aha OMWAMI Nyasaye yali.

⁹Nebutswa OMWAMI Nyasaye yalanga omusaatsa oyo ne namureeba ari, “Oli hena?”

¹⁰Naye omusaatsa oyo nakalusia naboola ari, “Embuliile okhuchendakhwo mumukunda, mana nemba omurii, shichila embeele eshiechenye, kho nindibisa.”

¹¹OMWAMI Nyasaye namureeba ari, “Niwiina oukhubooleele mbu, oli eshiechenye? Oliilekhwo khubiamo biomusaala kwa ndakhukaania mbu, shiolaliakhwo ta noho?”

¹²Omusaatsa oyo nakalusia naboola ari, “Omukhasi owa wambelesia okhumenya ninaye, niye oumbelesiyekhwo ebiamo biokhumusaala okwo mana nendia.”

¹³Mana OMWAMI Nyasaye nareeba omukhasi oyo ari, “Nishiina eshiokholile shino?” Omukhasi oyo namukalusia ari, “Inzokha niyo eyingaatiiye mana nendia.”

¹⁴OMWAMI Nyasaye nabooleela inzokha ari, “Okhuba okholile kano, mutsisolo nabulimo tsiosi, iwe oli mushilaamo shiobubi, Olamoolanga hasi khundayo, khandi olakhombanga olufu, tsinyanga tsiobulamubwo tsiosi.

¹⁵Ndalaraho obusuku hakariwo nende omukhasi, nende hakari wa abolwibulolwo nende olwibulo lwomukhasi. Omundu alasaasakanga omurwekwo nawe olalumanga eshisisiloshie.”

¹⁶Nyasaye naboolela omukhasi oyo ari, “Ndalameeta muno obutsunwibwo bweinzibula, olebulanga abaana mubutsunwi obululu. Ne, kata kario, olekombanga omusaatsawo nawe olabetsanga hasi woburuchibwe.”

¹⁷Khandi Nyasaye naboolela Adamu ari, “Khulwa okhuba orecheresiye amakhuwa komukhasiwo, ne nolia khubiamo biomusaala, okwandakhukaania nemboola endi, ‘Shiolaliakhwo khukwo ta,’ liloba lili mushilaamo shiobubi khulwa obwonoonibwo. Iwe olakholanga emilimo emitinyu khwiloba kho mbu, onyoole eshiokhulia tsinyanga tsiobulamubwo tsiosi.

¹⁸Amahwa nende amarakalu bilamela khwiloba elo, nawe olaliitsanga emimela chiomumukunda.

¹⁹Olakholanga emilimo namaani norula oluchesi kho mbu, onyoole ebiokhulia, okhuula lwolikalukha khwiloba elia warulakhwo, Okhuba iwe walongwa okhurula khwiloba, khandi olikalukha kwiloba.”

²⁰Mana omusaatsa oyo nakulikha omukhasiwe eliira mbu, Hawa, okhuba yali nyinamwana abandu boosi.

²¹Kho OMWAMI Nyasaye nakaasilia Adamu nende Hawa ebifwalo biamaseelo ne nabafwala.

²²Mana OMWAMI Nyasaye naboola ari, “Bulano omundu amalile okhuba shinga ifwe, amanyile amalayi nende amabi. Khandi yakhetsukhana yanyiila omukhonokwe nokhubukulakhwo ebiamo biokhumusaala kwobulamu ne nalia, ne namenya emiyika chiosi.”

²³Khulweshio OMWAMI Nyasaye yalonda Adamu okhurula mumukunda kwa Edeni kho mbu, aleshe okhukulima.

²⁴OMWAMI Nyasaye yalonda Adamu okhurula mumukunda okwo, ne nara Ebilonje bietsimbaha[2] elubeka lwebukwe lwomukunda kwa Edeni, nende olukanga olumwesukhanga nilushiukhana tsimbeka tsiosi, okhuliinda injila eyitsia khumusaala kwobulamu.